Gŏ sang jing knap mñai, kƀah lăn pla mjing, djiê ung mâo leh 3 thŭn hŏng anei kyua ruă kjham, H Rung Mlô (kreh iêo amí Trâm) ti buôn Ea Kjoh A, să Ea Drông, wăl krah Buôn Hồ hjăn păn klam jih jang bruă rông 2 čô anak hriăm hră mơar. Ti anăp klei hdĭp dleh dlan snăn, ñu mâo leh klei đru sa drei êmô ana mđai, lehanăn sa hlâo bê pioh rông. Mbĭt hŏng anăn, mâo hdră êlan klei bi đru lŏ đru kčĕ brei leh kơ ñu bruă dlăng kriê mnơ̆ng rông: 

 Kâo mâo đru leh sa drei êmô, lehanăn bê mơ̆ng hdră đru kơgŏ êsei ƀun, dleh dlan hlăm klei duh ƀơ̆ng. Lehanăn mâo klei čang hmăng suaih pral pioh duh ƀơ̆ng, rông mnơ̆ng mâo klei duh mĭn kơ anak aneh hriăm hră mơar tŭ jing’.

 “Kpưn đĭ” jing bruă ngă mâo êpul bi đru mơ̆ng tar rŏng lăn pia klah čŭn jing (CARE) ti Việt Nam bi mguôp hŏng anôk bruă yang ƀuôn lehanăn dŭm êpul êya bi đru čar Daklak. Mơ̆ng anăn, hlăm 2 thŭn 2023-2024, bruă anei kñăm đru kơ dŭm gŏ sang dôk hlăm klei dleh dlan duah ƀơ̆ng, boh nik hŏng phung amai adei mniê ti 2 să Ea Drông lehanăn Čư̆ Bao, wăl krah Buôn Hồ. Tui si Vũ Lan Hương, pô kiă kriê êpul bruă CARE ti Việt Nam lač, bruă anei srăng mđrăm mbĭt hŏng 4.000 čô mnuih hlue hŏng hdră “Djă ti kngan ktrâo ti bruă”, dơ̆ng mơ̆ng bruă mkra war êning, bi lŭk mnơ̆ng ƀơ̆ng, răng mgang klei ruă kơ mnơ̆ng rông hlŏng truh kơ klei bi tĭng mka ênoh bi liê ngă prăk. Ktrâo atăt mkŏ mjing klei mkiêt mkriêm, mkŏ mjing keh bi đru hlăm yang ƀuôn pioh kơ mnuih ƀuôn sang bi čan lĭng. Mkŏ mjing jih jang bruă bi tuôm, hŏng dŭm êpul bruă kăp hrui blei, mkra mjing boh mnga mnơ̆ng dhơ̆ng mâo. Dah kbưi hĭn jing anăp mkŏ mjing bi mâo mnơ̆ng dhơ̆ng djăp ênoh čuăn OCOP. Vũ Lan Hương brei thâo, hlăm 2 thŭn bruă anei mâo đru leh kơ êbeh 15.000 čô mnuih, lehanăn dưi bi lar lu hĭn klei tŭ dưn hlăm yang ƀuôn, boh nik mđing hĭn êdi jing hŏng phung amai adei mniê mnuih djuê ƀiă:

 Mơ̆ng hdră êlan mă bruă anei hmei srăng mđing hĭn kơ 3 mta bruă phŭn jing mđĭ klei thâo duh ƀơ̆ng hlăm klei pla mjing lehanăn rông mnơ̆ng. Đru mnuih ƀuôn sang thâo mkă tĭng hlăm klei yua prăk kăk, lehanăn pioh prăk kăk kơ klei duh mĭn kơ bruă knuă. Lehanăn klei yuôm bhăn hĭn jing čiăng kơ digơ̆ thâo duh ƀơ̆ng hŏng klei kjăp, thâo bi mnia mblei, snăn hlăm jih 3 mta bruă lač anăn bi mđrăm mbĭt hŏng klei hdĭp mda mnuih ƀuôn sang, kñăm čiăng si srăng ngă dưi mâo nanao klei thâo bi mguôp hdơ̆ng pô hlăm ƀuôn sang hŏng yang ƀuôn, mđĭ hĭn bruă klam mơ̆ng phung mniê ngă jăk hĭn jih jang bruă dơ̆ng mơ̆ng mphŭn duh mkra pla mjing hlŏng truh kơ klei ba čhĭ boh mnga pô mâo”.

  Čư̆ Bao lehanăn Ea Drông jing dua boh să knŏng hdĭp hŏng brua lŏ hma, lehanăn êbeh 80% ênoh mnuih jing mnuih djuê ƀiă, klei hdĭp mda mnuih ƀuôn sang dôk hlăm klei dleh dlan sơăi. Võ Văn Sự, Khua adŭ bruă duh mkra wăl krah   Buôn Hồ brei thâo, leh ksiêm dlăng brei ƀuh 2 boh să anei mâo lu klei găl kơ bruă rông êmô lehanăn rông bê. Kyuanăn, klei lông ngă bruă anei msĕ si ƀuh leh klei čang hmăng kơ mnuih ƀuôn sang dưi mâo klei đĭ kyar hĭn hlăm bruă duh ƀơ̆ng:

Lăn ala yan adiê ti Buôn Hồ lehanăn hlăm dua să lač anăn jing găl guôp hŏng bruă rông mnơ̆ng. Boh nik jing rông bê, lehanăn ară anei čhĭ bê mâo ênoh mơh, anôk čhĭ mnia hơĭt. Kyuanăn hlăm klei hlue ngă bruă anei. Đăo knang tal êlâo jing bi mlih klei thâo săng hlăm bruă rông mnơ̆ng hlăm mnuih djuê ƀiă, đru mdul hĭn klei hdĭp mda, mđĭ ƀrư̆ ƀrư̆ klei hdĭp mda. Lehanăn mơ̆ng bruă anei, srăng dưi bi lar lu hĭn hlăm yang ƀuôn"”/.