Dơ̆ng mơ̆ng aguah ưm mtam, phung ƀuôn sang 3 boh ƀuôn jing Ƀuôn Pa, Ƀuôn Năng, lehanăn Ƀuôn Hoang mtluk mtlak mơak mñai hŏng kdrăp čŭt hơô djuê ana pô truh kơ sang bi kƀĭn ƀuôn ti ƀuôn Pa, anôk mkŏ mjing Hrue mơak klei bi mguôp prŏng dŭm alŭ wăl anôk dôk ti să Čư̆ Prao, kdriêk Mdrak, čar Daklak. Dua nah êlan bŏ hŏng hla čhiăm gru bi kđhĭt angĭn thut, mâo ênai čing čhar, klei bi kưt mmuiñ mơak mñai. Truh ti sang bi kƀĭn ƀuôn Ƀuôn Pa mơ̆ng ưm, Y-Li Niê, khua ƀuôn Ƀuôn Hoang lač: “Ară anei mơak leh, 3 boh ƀuôn bi kƀĭn hlăm sa anôk ƀuh mơak hĭn, hmư̆ klei kưt mmuiñ êjai, ênai čing čhar êjai, lehanăn phung ayŏng adei hrăm mbĭt dôk bi mnăm kpiê êsei”.

Leh ruĕ klei kdŏ, amai H’Ñuiñ ksơr ti Ƀuôn Năng, să Čư̆ Prao lač, hrue anei êpul kdŏ mơ̆ng ƀuôn mơak snăk mâo mdah kơ phung ƀuôn sang dlăng. Ƀuh phung ƀuôn sang hriê kuh kŭm ênŭm ênap, dôk mđing dlăng klei kdŏ, snăn klei mơak dưi lŏ mđĭ hĭn: “Hrue anei hmei kdŏ klei kdŏ mâo anăn pia mnga ƀlang, čang hmăng klei kdŏ anei lŏ bi hdơr kơ knhuah gru klei bhiăn anak Êđê pô pioh lŏ bi djă kriê kơ dŭm gưl êdei”.

Tui si Y – Liñ Niê, k’iăng khua bruă mặt trận să Čư̆ Prao, Ƀuôn Pa; Ƀuôn Năng, lehanăn Ƀuôn Hoang mâo truh 346 gŏ sang, hŏng êbeh 1.440 čô mnuih. 3 boh ƀuôn mâo 5 djuê ana ayŏng adei hdĭp mbĭt hrăm, hlăm anăn anak Êđê yơh jing lu hĭn êbeh 90%. Grăp thŭn, hlăm Hrue bi mguôp jih jang djuê ana, bruă sang čư̆ êa să mkŏ mjing klei kkuh mơak ti grăp boh ƀuôn, siămdah thŭn anei Knơ̆ng bruă sang čư̆ êa să bi mklă mkŏ mjing bi klin dŭm alŭ wăl anôk dôk, kñăm bi kơrŭ ai tiê thâo bi mguôp jih jang djăp djuê ana mâo hlăm alŭ wăl. Lehanăn mjing klei găl kơ phung ƀuôn sang mâo klei bi mjĕ mjuk dhar kreh mbĭt: “Hrue 18/11 grăp thŭn kreh mkŏ mjing kdrêč knăm, lehanăn kdrêč huă mnăm ti alŭ wăl anôk dôk. Grăp thŭn tui si klei bhiăn mâo tông čing čhar lehanăn mnăm kpiê čeh, lehanăn bi kdŏ. Alŭ wăl anôk dôk ƀuh mơak hlak hĭn”.

Nao ti anôk mkŏ mjing hrue mơak bi mguôp jih jang djuê ana mâo mkŏ mjing lu boh ƀuôn mbĭt hlăm să Čư̆ Prao, kdriêk Mdrak, Y-Ƀiêr Niê, K’iăng khua bruă Đảng čar Daklak lač, ară anei, hlăm lu boh ƀuôn ti čar Daklak dôk mkŏ mjing sơăi bruă dhar kreh, kdŏ mmuiñ kkuh mơak 92 thŭn Hrue bi mguôp prŏng jih jang djuê ana (18/11/1930 – 18/11/2022). Bruă anei jing leh klei mtluk mtlak mơak mñai êdi hŏng phung ƀuôn sang, kyua mâo ngă lu mta bruă, jiă knhuah gru dhar kreh djuê ana pô mơ̆ng jih jang djăp djuê ana ti Việt Nam, đru lŏ hyuă kjăp hĭn klei thâo bi mguôp jih jang djuê ana:Mta kñăm mơ̆ng hrue mơak anei, jing čiăng kơ jih jang phung ƀuôn sang pô thâo dưn yua hĭn knhuah gru dhar kreh djuê ana pô, bi hriăm êmuh hdơ̆ng găp hlăm klei dôk dơ̆ng ƀơ̆ng huă ya mta jing klei jăk, klei siam. Mơ̆ng anăn srăng bi djŏ hdră mjuăt bi hriăm kñăm lŏ thâo săng lu hĭn, mơ̆ng anăn mâo klei bi mguôp kjăp hlăm klei hdĭp mda ala ƀuôn, djŏ hŏng hdră bhiăn knŭk kna, kñăm čiăng rŭ mdơ̆ng ƀuôn sang pô knư̆ hrue knư̆ jăk yâo hin"”

Hlăm dŭm hrue leh êgao, djăp ƀuôn êlan hlăm čar Daklak mkŏ mjing sơăi Hrue mơak bi mguôp jih jang djuê ana, mâo wăt phung khua kiă kriê bruă Đảng, bruă sang čư̆ êa alŭ wăl. Msĕ si, ti êpul hŭm mrô 5, să Êa Bar, kdriêk Ƀuôn Đon mâo klei myun dưi drông Phạm Minh Tấn, k’iăng khua bruă Đảng čar, Y Giang Gry Niê Knơng, khua hlăm bruă Đảng čar, Khua bruă mặt trận čar, lehanăn phung khua kiă kriê dŭm knơ̆ng dhar bruă, gưl bruă Đảng, bruă sang čư̆ êa alŭ wăl nao bi mguôp mbĭt. Blŭ hrăm ti anei, mâo Phạm Minh Tấn, k'iăng khua bruă Đảng čar čih pioh, lehanăn bi mni dŭm klei đru mguôp prŏng mơ̆ng phung ƀuôn sang dŭm alŭ anôk dôk mrô 5 mâo ngă leh dŭm bruă bi ktưn thâo khăp kơ lăn čar, lehanăn jih jang klei dŭm gưl bruă Đảng, bruă sang čư̆ êa, bruă mặt trận, djăp êpul êya mtrŭt mjhar wưng leh êgao. Lehanăn čang hmăng kơ dŭm gưl bruă Đảng, bruă sang čư̆ êa, bruă mặt trận lehanăn êpul êya, lehanăn phung ƀuôn sang 5 alŭ anôk dôk lŏ dơ̆ng hyuă hĭn klei thâo bi mguôp, gĭr hgao klei dleh dlan, klei lông dlăng pioh mđĭ kyar klei duh mkra, đru bi rŭ mdơ̆ng ƀuôn sang pô, mđĭ kyar klei hdĭp knư̆ hrue knư̆ trei mđao jăk yâo./.