Krĭng Lăn Dăp Kngư jing alŭ wăl čư̆ čhiăng prŏng, mâo 5 čar jing Kon Tum, Gia Lai, Dak Lak, Dak Nông leh anăn Lâm Đồng. Anei jing anôk hdĭp mda mơ̆ng êpul êya mnuih ƀuôn sang jing dŭm djuê ana mnuih djuê ƀiă mâo knhuah dhar kreh lu jơr, êdah êdi. Krĭng Lăn Dăp Kngư mâo yăn adiê êđăp, wăl dliê kmrơ̆ng lu jơr, knhuah dhar kreh phŭn, lu wăl kriê pioh, mnơ̆ng kriê pioh mâo UNESCO čih yap. Dŭm klei anei mkŏ mjing klei găl prŏng, mdê hjăn čiăng mđĭ kyar bruă hiu čhưn ênguê dhar kreh, yang ƀuôn, wăl mnơ̆ng hdĭp, bruă hiu čhưn ênguê mlir krĭng, mkŏ mjing boh tŭ kơ bruă duh mkra. Ƀiădah, hlăm boh sĭt, bruă ba yua dŭm klei găl anei adôk mâo lu klei dleh kpăk leh anăn adôk tuôm hŏng lu klei dleh dlan msĕ si knhuah thơ̆ng kơ bruă mkŏ mjing bruă hiu čhưn ênguê ka ênŭm drum, klei mkŏ krĭng ka tŭ dưn, mnơ̆ng yua đru kơ bruă hiu čhưn ênguê ka ênŭm ôh.

Hlăm klei kƀĭn trông, phung thơ̆ng kơ bruă, phung kreh knhâo hưn mdah, bi trông kơ dŭm boh klei djŏ tuôm msĕ si klei mĭn kơ klei đĭ kyar kjăp bruă hiu čhưn ênguê dhar kreh leh anăn bruă hiu čhưn ênguê wăl mnơ̆ng hdĭp, klei găl leh anăn ba yua, dưn yua dŭm ai dưi kơ klei mđĭ kyar bruă hiu čhưn ênguê dhar kreh leh anăn bruă hiu čhưn ênguê wăl mnơ̆ng hdĭp krĭng Lăn Dăp Kngư. Bi klă mnơ̆ng dhơ̆ng leh anăn mkŏ klei mtrŭt mđĭ bruă hưn mdah kñăm đĭ kyar kjăp bruă hiu čhưn ênguê krĭng Lăn Dăp Kngư. Klei găl, klei lông dlăng leh anăn dŭm boh klei mâo hlăm klei đĭ kyar kjăp bruă hiu čhưn ênguê dhar kreh leh anăn bruă hiu čhưn ênguê wăl mnơ̆ng hdĭp krĭng Lăn Dăp Kngư hlăm wưng ară anei. Tă hdră, duah hdră êlan mđĭ kyar kjăp bruă hiu čhưn ênguê dhar kreh leh anăn bruă hiu čhưn ênguê wăl mnơ̆ng hdĭp krĭng Lăn Dăp Kngư…Pô bi ala êpul čih mkra mơ̆ng Sang hră gưl prŏng krĭng Lăn Dăp Kngư hưn mdah klei mtô mblang kơ klei mđĭ kyar bruă hiu čhưn ênguê knang kơ yang ƀuôn krĭng Lăn Dăp Kngư hluê êlan kjăp, Nai prĭn Nguyễn Thị Hải Yến brei thâo:

 “Boh klei tinei si srăng ngă čiăng kơ phung tuê hiu čhưn ênguê hriê ti krĭng Lăn Dăp Kngư lu hĭn, leh anăn si srăng ngă leh diñu hriê lŏ čiăng hriê lu hĭn. Êpul hmei mâo đa đa klei bi êdah kơ hdră êlan hlăm wưng kơ anăp msĕ si mđĭ kyar bruă duh mkra kơ yang ƀuôn alŭ wăl hŏng klei duh bi liê kơ anôk bruă hiu čhưn ênguê klă klơ̆ng, amâodah rơ̆ng kơ wăl hdĭp mđa, kriê dlăng kjăp ngăn dŏ, duh bi liê mđĭ kyar bruă mkŏ mkra hiu čhưn ênguê, mâo klei nao hgŭm mơ̆ng mnuih ƀuôn sang alŭ wăl”.

Phung čih mčeh, phung ksiêm duah, phung kriê dlăng ăt đru mguôp lu klei blŭ, ba mdah lu hdră êlan kơ bruă mtrŭt mđĭ klei hâo hưn, mđĭ klei thâo săng mơ̆ng êpul êya yang ƀuôn kơ bruă mđĭ kyar kjăp bruă hiu čhưn ênguê dhar kreh, bruă hiu čhưn ênguê wăl mnơ̆ng hdĭp, bi kluôm dŭm hdră êlan, hdră mtrŭn, mkŏ mjing boh kdrŭt bi lar bruă klam mơ̆ng êpul êya yang ƀuôn hlăm klei mđĭ kyar bruă hiu čhưn ênguê kjăp nao mbĭt hŏng bruă kriê pioh leh anăn bi lar dŭm boh tŭ dhar kreh krĭng wăl, mkŏ mkra krĭng ƀuôn sang mrâo, iêo jak dŭm ai dưi yang ƀuôn duh bi liê bruă mkŏ mkra đru kơ bruă hiu čhưn ênguê…Hlăk mblang kơ klei mĭn, tă hdră mđĭ kyar bruă hiu čhưn ênguê kjăp mơ̆ng čar Gia Lai hlăm wưng kơ anăp, Trương Hải Long- k’iăng khua bruă Đảng čar, khua bruă sang čư êa čar brei thâo:

 “Čar bi klă dŭm hdră tă mđĭ kyar bruă hiu čhưn ênguê truh ti thŭn 2030. Tal 1 jing mđĭ kyar bruă mkŏ mkra hiu čhưn ênguê, rŭ mjing anôk mdei msăn bruă hiu čhưn ênguê, mkŏ mjing dŭm hdră mkăp mđĭ kyar bruă hiu čhưn ênguê mrâo, dŭm sang jưh 4 mtŭ, 5 mtŭ leh anăn klŭm ba yua, dưn yua dŭm hdră mkăp mâo leh klei bi klă, bi mguôp bruă hiu čhưn ênguê, pŏk mlar klei mjĕ mjuk, bi mguôp, mkŏ, kñăm hluê ngă dŭm hdră hiu čhưn ênguê hŏng êlan mklin, mkŏ mjing wăl mnơ̆ng hdĭp bruă hiu čhưn ênguê, mkŏ mjing klei kdlưn hĭn kơ bruă hiu čhưn ênguê”.

 Phung bi ala ba mdah leh lu hdră êlan klă klơ̆ng čiăng mđĭ  kyar kjăp bruă hiu čhưn ênguê dhar kreh leh anăn bruă hiu čhưn ênguê wăl mnơ̆ng hdĭp krĭng Lăn Dăp Kngư, hlăm anăn mâo: Bi kluôm dŭm hdră êlan, hdră kčah mbruă mkŏ mjing boh kdrŭt kơ bruă mđĭ kyar bruă hiu čhưn ênguê, msĕ si đru mkăp brei ngăn prăk, prăk jia, lăn ala, ênua, duh bi liê bruă knŭk kna, êpul hgŭm bruă, êpul bi mguôp bruă duh mkra, bi mguôp yang ƀuôn. Iêo mthưr, iêo jak dŭm ai dưi yang ƀuôn duh bi liê mđĭ kyar bruă mkŏ mkră, hdră mnêč bruă hiu čhưn ênguê, ăt msĕ hŏng anôk mdei msăn hlăp lêñ, bruă mkŏ mkra êlan klông, klei blŭ hrăm, klei êđăp ênang, bruă mdrao mgŭn. Mbĭt hŏng anăn, čiăng mtrŭt mđi bruă mtô mjuăt bi hriăm, hriăm mbŏ mđĭ hnơ̆ng tŭ jăk ai dưi mnuih mă bruă, boh nik jing mnuih mă bruă hlăm alŭ wăl, mnuih mă bruă jing mnuih djuê ƀiă nao hgŭm mă bruă hlăm dŭm anôk bruă  mnia mblei, bruă hiu čhưn ênguê.