Đinh Thị Ngoại-  Khua êpul hgŭm phung mniê ƀuôn Lơk, să Nghiã An, kdriêk K’Bang brei thâo, mđing kơ hdră hrăm mbĭt mkŏ mkra krĭng ƀuôn sang mrâo, 5 thŭn êgao, mnuih ƀuôn sang hlăm ƀuôn đru dŭm êtuh hruê ai mă bruă leh anăn êbeh 1 êklai prăk, čŏng ruh mnư̆ mnang pŏk mlar ktuê êlan hlăm ƀuôn, mkra mrâo 4 ktuê êlan nao pưk hma. 5 gŏ êsei ƀun dưi đru lăm lui sang tĭ rưč. Thŭn 2022, prăk hrui wĭt kah knar 41 êklăk prăk/čô, ênoh gŏ êsei ƀun hrŏ lu, hlăm ƀuôn amâo lŏ mâo ôh sang jưh êjai. Đinh Thị Ngoại brei thâo:

 “Hlăm hdră mkŏ mkra krĭng ƀuôn sang mrâo, mnuih ƀuôn sang ƀuôn Lơk gĭr hgŭm, mđing kơ hdră bi hgŭm, mkŏ mkra êlan bê tông, êlan krĭng ƀuôn sang. Leh ba yua klei kreh knhâo hdră mnêč hlăm bruă mkra mjing snăn prăk hrui wĭt lu hĭn, ƀuôn sang doh siam hĭn, bruă duh mkra đĭ kyar hĭn mkă hŏng êlâo”.

Ƀuôn Lơk jing 1 hlăm ênoh 206 alŭ, ƀuôn mnuih djuê ƀiă ti čar Gia lai bi mlih mrâo leh pŏk ngă Asăp mtrŭn mrô 12 mơ̆ng Anôk dlăng bruă Đảng kơ klei mđĭ ktang gĭt gai mơ̆ng dŭm gưl bruă Đảng kơ klei mkŏ mkra krĭng ƀuôn sang mrâo hlăm mnuih djuê ƀiă.  Hlue anăn, hŏng prăk knŭk kna leh anăn ala ƀuôn giăm 1.500 êklai prăk, hŏng klei đru mguôp êbeh 96.500 hruê mă bruă, leh anăn mnuih ƀuôn sang myơr êbeh 400.000m2 lăn. Leh 5 thŭn, ară anei kluôm čar mâo 110 alŭ, ƀuôn mnuih djuê ƀiă djăp hnơ̆ng čuăn krĭng ƀuôn sang mrâo, klei hdĭp mnuih ƀuôn sang dưi mđĭ. Čiăng lŏ dơ̆ng mđĭ lar boh tŭ dŭm klei găl đru kơ mnuih ƀuôn sang bi hrŏ ƀun kjăp, hlăm klei bi kƀĭn ksiêm wĭt 5 thŭn hlue ngă Asăp mtrŭn 12, Hồ Văn Niên-  Khua dlăng bruă Đảng čar Gia Lai mtă:

 “Hdră bruă kđi čar ngă bruă jih hnơ̆ng, hrăm mbĭt, tŭ dưn, ngă nanao leh anăn klă sĭt, iêo mkrum leh anăn ba yua tŭ dưn, bi mguôp dŭm ênoh prăk mơ̆ng hdră bruă; đru kơ mnuih ƀuôn sang ba yua prăk brei čan tŭ dưn. Dŭm knơ̆ng, dhar bruă mơ̆ng čar hmao păn kjăp klei dleh dlan, gun kpăk čiăng ktrâo lač amâodah hmao mkăp klei dưi ksiêm dlăng, msir mgaih. Jih ai tiê hlue ngă čiăng klei tŭ dưn mơ̆ng  Asăp mtrŭn 12 klă sĭt truh hŏng mnuih ƀuôn sang”.