Mbĭt hŏng êpul tông čing mơ̆ng mnuih prŏng, ƀuôn Groi Wet, xã Glar, kdriêk Đak Đoa, lŏ mkŏ mjing leh êpul tông čing hđeh mâo êbeh 20 čô phung hđeh nao hriăm tông. Mâo hĕ dŭm gưl phung hđeh dơ̆ng thâo bi kriê pioh knhuah gru dhar kreh hlăm ƀuôn sang pô klei anăn jing bruă prŏng mơ̆ng đảng viên Alip. Adei Uyết, 13 thŭn, mnuih tông čing hlăm êpul hđeh ti ƀuôn Groi Wet, lač:

 “Hlăk dôk hriăm adŭ 4 kâo nao hriăm tông čing leh mơh. Phŭn tal êlâo hriăm hŏng klei dleh, ƀiădah leh hriăm knư̆ hrue knư̆ dơ̆ng raih. Mâo aê Alip mtô tông čing, lehanăn mâo hiu tông leh hlăm lu anôk, kâo lač jăk kơ aê Alip".

        Dăl hlăm giăm 20 thŭn hŏng anei leh, pô mbruă Alip amâo lŏ nik ôh ñu mâo mtô leh jih jang dŭm boh adŭ kơ phung hđeh ti dŭm boh ƀuôn hlăm krĭng. Ñu mơak; kyuadah ară anei phung hđeh mâo leh ai tiê thâo khăp, čiăng hriăm, thâo khăp mđing hmư̆, lehanăn khăp čiăng tông čing, snăn ñu ăt srăng ngă nanao:

Huĭ kơ ñu luič hĕ, snăn kâo gĭr mtô bi hriăm. Êlâo dih, phung hđeh amâo mâo čiăng hriăm ôh, kăn čiăng hmư̆ rei, ară anei diñu khăp snăk, lehanăn mâo nao bi lông leh truh ti dŭm kdriêk, ti čar. Pô jing Đảng viên snăn gĭr yơh bi hriăm diñu čang hmăng mgi dih diñu jing phung thâo kriê pioh knhuah gru dhar kreh djuê ana pô”.

        Ti să Glar, jing anôk lu mnuih djuê ana Bahnar, grăp čô đảng viên jing pô ba akŏ nanao hlăm djăp mta bruă, ngă klei bi hmô jăk hŏng mnuih ƀuôn sang tui hriăm, bi kriê pioh knhuah gru dhar kreh djuê ana pô lehanăn mđrăm mbĭt mđĭ kyar klei hdĭp mda. A Sin - khua bruă Đảng ƀuôn, lehanăn jing khua ƀuôn Dôr 1, mâo klei hâo hưn nanao hŏng phung hlăk ai hđeh êlăk bi thâo răng mgang klei êđăp ênang êlan klông, bi đru răng mgang klei êđăp ênang yang ƀuôn. Gŏ sang ñu ba akŏ nanao hlăm bruă dlăng kriê wiê ênăk kphê, pla mjing kphê djăp ênoh čuăn 4C, lehanăn mđĭ ai phung ƀuôn sang duh mkra bi mâo klei tŭ dưn:

        Pô ngă klei bi hmô amâo mâo lu ôh, ƀiădah leh pô blŭ snăn pô ngă yơh klei pô blŭ, ngă jih ai tiê čiăng đru mnuih ƀuôn sang. Msir klei ư̆ êpa bi hrŏ klei ƀun knap, snăn brei mâo klei thâo gĭr, kreh kruiñ, mơ̆ng anăn blŭ hŏng mnuih ƀuôn sang, mâo mnuih ƀuôn sang hmư̆. Sitôhmô 2 - 3 thŭn êlâo, pô lŏ duh mĭn dlăng kriê wiê ênăk kphê bi jăk, phung ƀuôn sang ƀuh snăn diñu tui hlue. Drei lač, kphê drei pla leh êlâo amâo mâo jing, amâo mâo mboh ôh, snăn lŏ mjut mjing čiăng kơ kphê mboh hĭn”.

Ară anei, bruă Đảng să Glar, kdriêk Đăk Đoa mâo 15 êpul bi mguôp hlăm Đảng hŏng 160 čô đảng viên, hlăm anăn mâo truh 100 čô đảng viên jing mnuih djuê ƀiă. Phung đảng viên mâo nanao klei thâo bi hmô, hlue ngă jăk jih jang bruă bi ktưn khăp čiăng kơ lăn čar, msĕ si bruă mkŏ mkra krĭng ƀuôn sang mrâo, myơr lăn mkra êlan, msir klei ư̆ êpa bi hrŏ klei ƀun knap, đru bi răng mgang klei êđăp ênang yang ƀuôn hlăm alŭ wăl pô. Mbĭt hŏng klei knŭk kna duh bi liê, mâo klei bi mguôp hlăm jih jang hlăm jih jang bruă kđi čar, hlăm mnuih ƀuôn sang snăn să Glar mâo bi leh ênoh čuăn bruă mkŏ mkra krĭng ƀuôn sang mrâo thŭn 2017 lehanăn hlăk lŏ dơ̆ng mkŏ mkra krĭng ƀuôn sang mrâo hlue ênoh čuăn kdlưn hĭn Y Suôn - K’iăng khua bruă Đảng să Glar, brei thâo:

         “Bruă Đảng să mâo klei mđing kơ bruă bi mŭt đảng viên mrâo hlăm krĭng mnuih djuê ƀiă. Hŏng krĭng mnuih djuê ƀiă, snăn đảng viên mnuih tinăn jing pô jăk êdi pioh kơ bruă hâo hưn mjuăt bi hriăm bruă kđi čar, mđĭ hĭn ai tiê klei mĭn mnuih ƀuôn sang hlăm alŭ wăl mâo klei thâo săng, dưn yua yơh klei găl jing đảng viên, bi kjăp ai tiê plah wah Đảng hŏng mnuih ƀuôn sang ti să.”

        Ară anei să Glar knŏng adôk 4% ênoh gŏ êsei ƀun, jih jang ênoh čuăn mơ̆ng să mkŏ mkra krĭng ƀuôn sang mrâo mâo krơ̆ng kjăp, klei hdĭp mda mâo mđĭ kyar nanao, dhar kreh djuê ana mâo kriê pioh, hlăm klei tŭ ư jing anăn, snăn mâo klei đru mguôp prŏng mơ̆ng phung đảng viên mnuih djuê ƀiă ti să Glar, čiăng kơ ƀuôn sang knư̆ hrue knư̆ mdrŏng sah jăk siam./.