Thŭn anei jing thŭn tal êlâo, jih jang mnuôr mbông êa mơ̆ng knơ̆ng kdơ̆ng êa Ia Mơr mâo bi leh, dưi ba leh êa kơ kdrăn lŏ phung ƀuôn sang ti alŭ Klah, Să Ia Mơr. Anei jing thŭn tal êlâo, phung ƀuôn sang djuê ana Jrai ti Ia Mơr ngă lŏ dưi mâo leh êa, hrô kơ klei ngă hma hang msĕ si êlâo dih. Siu Thŏ, khua ƀuôn lač, hlăm yan tal êlâo pla mjing, phung ƀuôn sang dôk lu klei bư̆ ban, ƀiădah boh mnga ăt mâo 4 tôn/ha, êbeh kơ 4 blư̆ mkă hŏng hma hang. Boh tŭ dưn anei, đru leh kơ dŭm gŏ êsei hlăm ƀuôn tui hriăm klei ngă lŏ bhang:Êlâo dih knŏng pla sa yan mdiê grăp thŭn, mâo mơ̆ng 100 – 200kg mdiê đuič, ară anei mâo ngă leh dua yan grăp thŭn mâo wiă mơ̆ng 7-8 tôn/ha. Phung ƀuôn sang ară anei ba mjeh mrâo mboh hĭn, phung ƀuôn sang mơak snăk. Lač jăk kơ Đảng, knŭk kna đru leh kơ phung ƀuôn sang.

Mbĭt hŏng klei knơ̆ng kdơ̆ng êa mâo ba yua leh hŏng klei tŭ dưn, mbĭt anăn knơ̆ng bruă đang ksu kphê ăt jăk mơh, đru leh kơ phung duh mkra pla mjing mâo klei đĭ kyar jăk hlăm bruă knuă, mjing bruă knuă mă lehanăn mâo ênoh ba wĭt hơĭt kơ mnuih mă bruă hlăm alŭ wăl. Rơ Lan Bên, kkiêng thŭn 1995, ti ƀuôn Khôi, să Ia Mơr hơ̆k kdơ̆k brei thâo, thŭn anei prăk mlan dua ung mô̆ ñu mâo ƀơk hơĭt mơ̆ng 13 - 15 êklăk prăk/mlan.

Êngao anăn, gŏ sang ñu lŏ mâo 2 sao kphê, 6 sao mdiê lŏ, lehanăn rông dŭm drei êmô, snăn mâo djăp mnơ̆ng yua lehanăn klei huă ƀơ̆ng: “Mơ̆ng hrue mŭt ngă bruă hlăm knơ̆ng bruă ksu phăn riêk ktăk ksu hlăm 3 thŭn, leh 3 thŭn mă prăk phăn jao tloh mdơ̆ng sa boh sang jih 200 êklăk prăk. Thŭn êdei kơnăn kâo tloh blei êdeh hŏng ênoh 57êklăk prăk jing mta êdeh Sonic, lehanăn bi liê kơ anak nao sang hră mơar. Hlăm sang blei mprăp leh djăp ênŭm mnơ̆ng yua, snăn klei hdĭp hlăm gŏ sang ară anei hơĭt leh. Êlâo dih gŏ sang kâo dleh dlan êdi, ară anei amâo mâo lŏ huĭ kơ klei ư̆ êpa ôh”.

Ia Mơr jing să knông lăn mâo lu knhuah cách mạng, hlăk hlê dôk rŭ mdơ̆ng bruă nah gŭ, lehanăn anăp drông djăp mta klei găl mrâo. Nguyễn Tuấn Anh - k’iăng khua knơ̆ng bruă sang čư̆ êa să brei thâo, pui kmlă mâo dhiang ba truh leh hlăm ƀuôn sang, dŭm anôk msĕ si sang bi kƀĭn ƀuôn, sang hră mơar, sang êa drao să ăt dưi mkra mđĭ, lŏ mkra mrâo. Boh nik êlan klông hlăm ƀuôn, hlăm lŏ hlŏng truh kơ êlan dơ̆ng čar, lehanăn dưi mâo pui kmlă pioh mtrang mngač dơ̆ng leh sơăi, đru kơ Ia Mơr mâo klei găl bi mjĕ êrô hlăm bruă bi mnia mblei. Nguyễn Tuấn Anh lač: “Êlan klông ară anei jăk leh mprăp bi leh bruă mkra êlan dơ̆ng čar mrô 665, lehanăn mkra mnuôr mbông êa hlăm lŏ. Anei jing bruă yuôm bhăn pioh kơ phung ƀuôn sang bi găn êrô čhĭ mnia, mđĭ kyar bruă duh mkra klei hdĭp mda ti să Ia Mơr mâo klei đĭ kyar”.

Khădah klei hdĭp mda phung ƀuôn sang ti să knông lăn Ia Mơr, kdriêk Ia Mơr, kdriêk Čư̆ Prông adôk lu klei dleh dlan, ƀiădah mâo klei mđing mơ̆ng bruă sang čư̆ êa dŭm gưl, lehanăn phung ƀuôn sang djăp djuê ana tinei knư̆ hrue knư̆ mâo klei găl hĭn, mjing leh knơ̆ng kơ bruă mđĭ kyar klei hdĭp mda, tui duah klei trei mđao, đĭ kyar, đru bi răng mgang kjăp klei êđăp ênang ti knông lăn nah yŭ lăn čar anei./.