Dŭm gru hmô anei ba klei tŭ dưn bruă duh mkra jăk mkă hŏng êlâo. Bùi Công Oách bi mklă, dŭm klei bi mlih kơ klei mĭn pla mjing leh anăn rông mnơ̆ng mơ̆ng mnuih ƀuôn sang mâo klei kruăk knăl mơ̆ng knuă druh, đảng viên kđông kahan răng mgang knông lăn Dak Ruê: “ Mơ̆ng hruê mâo knuă druh răng mgang knông lăn kơ bruă kƀĭn hŏng bruă Đảng, kơ klei mđĭ kyar bruă duh mkra mơ̆ng mnuih ƀuôn sang jăk snăk. Lač kơ klei gĭt gai mơ̆ng Bruă Đảng ăt msĕ mơh dŭm phung lĭng kahan răng mgang knông lăn kčĕ kơ anôk dlăng bruă đảng mâo lu boh phŭn kơ klei đĭ kyar bruă duh mkra. Thŭn anei mnuih ƀuôn sang ba mjeh mdiê mâo hnơ̆ng jăk leh anăn ST25 hlăm bruă mkra mjing leh anăn gru hmô anei hmei dôk bi lar.”

Jing mnuih tal êlâo pŏk ngă gru hmô rông êmô mjeh jăk hlue si hdră phưi ti să Ea Bung, Đỗ Xuân Trường, Khua dlăng bruă Đảng alŭ 5, brei thâo, êlâo dih mnuih ƀuôn sang rông êmô mjeh điêt alŭ wăl, rông phưi, amâo đei tŭ dưn ôh. Kyua knuă druh răng mgang knông lăn jih ai kčĕ leh anăn đru lu mta, ñu bi mlih tŭ jing rông êmô mjeh jăk mơ̆ng knhal jih thŭn 2020. Thŭn dih, ñu mâo prăk mnga giăm 100 êklăk prăk leh anăn thŭn anei mĭn tĭng srăng mâo lu hĭn mkrah ênoh anei. Lu gŏ êsei hlăm alŭ, să ăt dôk hlue ngă leh anăn tal êlâo mâo klei tŭ dưn kyua dưi mđĭ lar klei găl mâo: “Knuă druh răng mgang knông lăn jing phung ktrâo bruă, boh nik đru prăk kơ mnuih ƀuôn sang rông mnơ̆ng, mjing klei găl đĭ kyar bruă duh mkra, msir klei ư̆ êpa lăm lui klei ƀun ƀin. Mnuih ƀuôn sang mphŭn mâo klei tŭ dưn. Klei găl hĭn tinei jing phŭn mkăp mnơ̆ng ƀơ̆ng êbeh, pô tinei mkra mjing mdiê lu, mâo drăng lu pô kă pioh ƀơ̆ng jih thŭn. Mbĭt anăn, ênhă lăn prŏng snăn pô pla rơ̆k, pla ktơr nao kwă pioh kơ êmô ƀơ̆ng.”

Dưi ba ti să Ea Bung ngă K’iăng khua bruă Đảng să, Trung tá Nguyễn Văn Thanh, knuă druh kđông kahan răng mgang knông lăn Dak Ruê, brei thâo, phung đảng viên răng mgang knông lăn msĕ si ñu păn kjăp alŭ wăl, thâo săng boh klei mkra mjing mnuih ƀuôn sang. Mbĭt anăn, phung diñu brei kriăng hriăm, mâo klei thâo ti lu anôk, mơ̆ng anăn kơh thâo kčĕ, đru kơ mnuih ƀuôn sang mkra mjing tŭ dưn: “ Mơ̆ng bruă bi kƀĭn mbĭt hŏng mnuih ƀuôn sang hlăm klei hdĭp ăt msĕ mơh hlăm bruă duh ƀơ̆ng, mkra mjing snăn klei găl ti Ea Bŭng mâo lu kei găl, ƀiădah bruă mđĭ kyar rông mnơ̆ng leh anăn pla mjdiê mâo lu klei găl ƀiădah ka dưi ba yua jih, dôk bi luič liê lu. Kyua anăn, kâo jhŏng kčĕ hŏng bruă Đảng mđĭ bruă gĭt gai hlăm bruă klam mđĭ kyar bruă duh mkra, ala ƀuôn. Boh nik tinei jing kƀĭn kơ 2 êpul phŭn jing mdiê leh anăn tal dua jing rông êmô.”

Thượng tá Phạm Đức Khá,  Pô ngă bruă kđi čar Kđông kahan răng mgang knông lăn Dak Ruê brei thâo, ti krĭng taoh kbưi lăn ala sah kba Ea Bung, klei dleh dlan hĭn jing si bĕ ngă čiăng mđĭ klei hdĭp mda mnuih ƀuôn sang. Klei hdĭp mnuih ƀuôn sang hơĭt kjăp, đĭ kyar kơh snăn knông lăn srăng kjăp, klei dưi dưi rơ̆ng. Kyua anăn, sĭt tiŏ nao phung knuă druh răng mgang knông lăn hgŭm ngă bruă ti să leh anăn đảng viên hgŭm dŭm anôk dlăng bruă đảng, ruah bi klă phung knuă druh, đảng viên mâo klei thâo săng ti alŭ wăl. Phung knuă druh, đảnh viên dưi mđĭ lar leh jăk bruă klam, đru mkŏ mjing să Ea Bung ƀrư̆ hruê ƀrư̆ đĭ kyar, krơ̆ng kjăp klei êđăp ênang krĭng knông lăn: “Hlăm klei hlue ngă bruă klam kđi čar mơ̆ng anôk bruă hlăm wưng kơ anăp snăn bruă klam phung knuă druh nao đru ti să, ăt msĕ mơh đảng viên hgŭm mkŏ mjing ti dŭm anôk bruă đảng alŭ, ƀuôn, să knông lăn dưi mđĭ lar leh jăk klei tŭ dưn. Đru mguôp leh kơ gưl bruă Đảng dŭm alŭ mđĭ klei thâo, klei dưi bi ktưn mơ̆ng gưl bruă Đảng mkŏ mjing bruă đảng doh mnhač, kjăp ktang. Dưi mđĭ lar leh jăk bruă klam jing anôk mkŏ plah wah bruă Đảng kđông kahan răng mgang knông lăn leh anăn bruă Đảng să.”

Thŭn 2021, să Ea Bung dưi tŭ yap jing să djăp hnơ̆ng čuăn krĭng ƀuôn sang mrâo leh anăn anei jing să tal êlâo ti knông lăn Dak lak truh hdră kñăm kơ hdră anei. Mkŏ mkra krĭng ƀuôn sang mrâo dôk bi mguôp kjăp hŏng bruă mkŏ mjing ai tiê jih jang mnuih ƀuôn sang kjăp ktang ti krĭng knông lăn Ea Bung./.