Hlăm lu thŭn leh êgao, bruă pla čê, kphê mơ̆ng gŏ sang K’Kras, ti wăl krah Lộc Thắng, kdriêk Bảo Lâm (Lâm Đồng) mâo nanao tue jĕ giăm taih kbưi hriê čuă dlăng hriăm êmuh hdră dlăng kriê wiê ênăk. Ñu jing mnuih djuê ƀiă êbeh 10 thŭn mtam mâo djŏ ruah jing mnuih duh mkra pla mjing mbruă. Kyua jhŏng bi mlih hdră êlan ngă bruă, ƀrư̆ ƀrư̆ bi mlih djăp mta mjeh mrâo, lui hĕ jih mjeh hđăp amâo lŏ jăk ôh, ba yua hdră dlăng kriê wiê ênăk ênuk mrâo, răng mgang mnơ̆ng pla mjing amâo mâo ba yua êa drao hluăt ôh, ngă djŏ klei ktrâo atăt mơ̆ng knuă druh bruă lŏ hma kčĕ mtô, đang čê, lehanăn đang kphê ñu prŏng giăm 4 ha đĭ jing jăk siam, ba wĭt nanao hơĭt hlăm grăp thŭn dŭm êtuh êklăk prăk/thŭn. lehanăn klei hdĭp hlăm gŏ sang ñu đĭ nanao hlăm grăp thŭn:

“Mâo klei Đảng lehanăn knŭk kna mđing uêñ, lehanăn klei đru mơ̆ng anôk bruă lŏ hma, bruă sang čư̆ êa kdriêk Bảo Lâm... brei kâo mâo nao hriăm adŭ mjuăt hriăm bruă dlăng kriê mnơ̆ng pla mjing, lehanăn brei čan hbâo pruê tla ƀrư̆ ƀrư̆. Kâo gĭr dlăng kriê wiê ênăk mnơ̆ng pla mjing, ba yua klei kreh knhâo hlăm bruă pla čê, kphê snăn mnơ̆ng kâo pla mjing mâo klei tŭ dưn nanao, ba wĭt boh mnga hơĭt nanao hŏng gŏ sang pô"”

         Amâo mâo djŏ knŏng hjăn K’Kras ƀiădah lu mnuih djuê ƀiă hlăm čar Lâm Đồng bi kpưn đĭ tlaih mơ̆ng klei dleh dlan knap mñai, mkŏ mjing klei hdĭp trei mđao, jăk yâo. Tơdah hlăm 10 thŭn êlâo, giăm 100 gŏ êsei mnuih djuê ana K’ho ti alŭ anôk dôk mrô 4, să Dă Ploa, kdriêk Dă Huoai (Lâm Đồng) mâo êbeh 60% dôk hlăm klei dleh dlan, snăn truh kơ ară anei klei hdĭp digơ̆ đĭ kyar leh, mâo gŏ êsei đĭ nao kơ mdrŏng sah.  Tui si Ka Rom, jing khua alŭ mrô 4, să Dă Ploa, mâo hĕ klei tŭ dưn anei kyua jing kyua mâo Đảng lehanăn knŭk kna pŏk ngă leh lu hdră êlan hŏng mnuih djuê ƀiă tinei. Boh nik mâo duh bi liê rŭ mkra bruă nah gŭ, bi hrŏ ƀun hŏng klei kjăp, đru kơ ênoh čhĭ mjeh mnơ̆ng pla, mnơ̆ng rông, bi mlih hdră êlan dlăng kriê mnơ̆ng pô pla mjing, snăn mâo ba wĭt leh klei tŭ dưn jăk. Mơ̆ng anăn mơh ƀuh klei hdĭp mda mnuih ƀuôn sang mâo leh klei bi mlih êdi, dơ̆ng mơ̆ng mnơ̆ng dhơ̆ng hlŏng kơ klei hdĭp ai tiê bi mlih hĭn leh mkă hŏng êlâo. Ka Rom, lač:

“Mâo Đảng lehanăn knŭk kna uêñ mđing duh bi liê brei leh mjeh mnơ̆ng pla mnơ̆ng rông, mâo pŏk mtô bi hriăm hdră êlan mă bruă, dlăng kriê wiê ênăk mnơ̆ng pla mjing kơ mnuih ƀuôn sang. Mơ̆ng anăn, klei hdĭp mnuih ƀuôn sang mâo leh klei bi mlih sĭt, dơ̆ng thâo săng, lehanăn lui jih ya mta jing klei bhiăn amâo mâo lŏ djŏ, lehanăn dơ̆ng msưh kdŭn jih klei hdĭp dleh dlan knap mñai. Mâo klei thâo mđing uêñ hĭn kơ anak aneh nao sang hră mơar, ƀuôn sang mđrăm mbĭt bi mkŏ mkra klei hdĭp mda dhar kreh lehanăn đĭ kyar”.

        Mơ̆ng thŭn 2016 truh kơ thŭn 2020, čar Lâm Đồng mâo duh bi liê leh giăm 630 êklai prăk kơ dŭm să, ƀuôn dôk hlăm klei dleh dlan hĭn. K’Bát, Khua bruă Đảng ƀuôn Păng Dung, să Dă K’Nàng, kdriêk Đam Rông brei thâo, mơ̆ng prăk duh bi liê anei, klei hdĭp mda mnuih ƀuôn sang hlăm krĭng djuê ƀiă mâo leh klei bi mlih klă mngač, amâo lŏ dôk jưh knang kơ klei knŭk kna đru ôh, ƀiădah čŏng kpưn đĭ hlăm klei duh ƀơ̆ng, msưh kdŭn klei ư̆ êpa, lehanăn ară anei mâo leh lu gŏ êsei kpưn đĭ tlaih mơ̆ng klei dleh dlan nao hlăm klei mdrŏng sah, mkŏ mkra krĭng ƀuôn sang pô đĭ kyar.

“Mơ̆ng leh mâo ngă lu hdră êlan mơ̆ng Đảng knŭk kna duh bi liê, boh nik dŭm bruă ti alŭ wăl mâo ngă leh ba wĭt klei tŭ dưn jăk. Mnuih ƀuôn sang sa ai hŏng jih hdră êlan anăn, nao hlăm klei bi đru, mguôp hrue ai mă bruă, myơr lăn ala mkra êlan, bi hgŭm hlăm klei duh ƀơ̆ng. Mơ̆ng anăn, krĭng ƀuôn sang klă sĭt êdah leh klei đĭ kyar, mâo klei bi mlih prŏng leh êdi mkă hŏng êlâo.”

        Čar Lâm Đồng mâo truh 1,3 êklăk čô mnuih, hlăm anăn mnuih djuê ƀiă êbeh 25%. Lu thŭn leh êgao kyua mâo klei duh bi liê Đảng lehanăn knŭk kna hlăm djăp mta, snăn klei hdĭp mnuih ƀuôn sang ti krĭng taih kbưi, krĭng mnuih djuê ƀiă hlăm čar mâo leh knhuang đĭ kyar mrâo, kluôm dhuôm hĭn hlăm djăp mta klei. Hlăm wưng thŭn 2022 - 2025, čar Lâm Đồng lŏ duh bi liê truh 1.700 êklai prăk Anei jing klei Đảng lehanăn knŭk kna duh mĭn kơ krĭng mnuih djuê ƀiă hlăm čar Lâm Đồng mâo ai tiê thâo gĭr mđĭ kyar amâo mâo mdei./.