Kdriêk Xín Mần, čar Hà Giang truh kơ ară anei mâo bi leh êbeh 80% ênoh čuăn klei đru kơ sang dôk hŏng mnuih djuê ƀiă, krĭng čư̆ čhiăng. Amâo mâo djŏ knŏng dŭm anăn, alŭ wăl lŏ ngă jih ai tiê hlăm bruă mkŏ mjing dŭm klei bi hmô bruă duh ƀơ̆ng kơ mnuih ƀuôn sang. Bruă sang čư̆ êa amâo mâo uêñ hrue lehanăn mlam tui duah nanao êpul bi hgŭm, kñăm mđĭ boh mnga mnơ̆ng pla mjing. Jih jang klei bi kƀĭn mâo mkŏ mjing jêñ jêñ. Phung knuă druh, msĕ si khua adŭ bruă mnuih ngă bruă, phung knap mñai kdriêk Xín Mần Đặng Thu Chang hâo mdah hdră pô ngă bruă, kơ klei bi liê ngăn prăk, lehanăn ƀuăn hlăm sa hrue kăm hưn sa blư̆:

 Kdriêk mă bruă hŏng jih ai tiê. Dŭm boh să rơ̆ng brei mâo nanao klei hâo mdah, brei mâo klei ƀuăn, čoh čuăn bruă klam mơ̆ng pô djă akŏ hlăm jih jang bruă ngă. Hlăm anăn bi êdah klă mngač hĭn jing bruă klam mơ̆ng asei pô hlăm klei mă bruă, tơdah amâo mâo leh ôh ênoh kčah čuăn čŏng pô tŭ klei ƀuah mkra ti anôk bi kƀĭn jih thŭn”.

Boh sĭt mơ̆ng klei ksiêm 3 hdră lăn čar kñăm ti dŭm alŭ wăl, k’iăng khua Êpul gơ̆ng bruă djuê ana mơ̆ng anôk bruă kƀĭn ala Trần Thị Hoa Ry bi êdah kơ klei alŭ wăl ngă jăk bruă klam, ƀiădah ăt mâo mơh lu alŭ wăl adôk kƀah klei anei:

Dŭm alŭ wăl mâo gưl bruă Đảng, bruă sang čư̆ êa mđing kiă kriê kjăp, tiŏ nao phung knuă druh djăop klei thâo. Lehanăn mơ̆ng klei dăp djŏ mnuih ngă bruă snăn, kyuanăn hlăm klei ngă bruă mâo ngă leh hŏng klei kjăp, lehanăn kăp kčĕ kơ êpul kiă kriê mâo dŭm hră mtrŭn dôk hlăm klei dưi pô ngă mtam hŏng klei pral. Kâo ƀuh diñu amâo mâo guôn tơdah tuôm hŏng klei dleh dlan, klei gun kpăk ôh bi ruh mgaih, ƀiădah mơ̆ng gưl nah dlông čŏng bi mâo mtam hdră ngă bruă, tơl hnơ̆ng djă ti kngan ktrâo ti bruă kơ phung knuă druh ngă bruă nah gŭ”.

Lŏ wĭt yăl dliê kơ kdriêk ƀun krĭng dlông čư̆ boh tâo Xín Mần, Hà Giang. Bruă dưn yua jih klei găl, klei thâo ngă bruă mơ̆ng mnuih ƀuôn sang, klei thâo bi hmô jăk mơ̆ng phung knuă druh, đảng viên lehanăn klei sa ai hrăm mbĭt mơ̆ng jih jang bruă kđi čar, anăn yơh jing klei yuôm bhăn čiăng kơ bruă lăn čar kñăm mâo klei tŭ dưn. Tui si khua knơ̆ng bruă sang čư̆ êa čar Hà Giang Nguyễn Văn Sơn, ăt kyua klei anăn mơh pioh kơ Hà Giang jing sa hlăm 3 boh čar hlăm kluôm ala ba êlan êlâo akâo ngă klei bhiăn bi hmô mbha gưl, lehanăn jao klei dưi:

čar amâo mâo dưi ngă brei ôh kơ kdriêk, kdriêk kăn dưi ngă brei rei kơ să, lehanăn mklăk wĭt hŏng anăn msĕ mơh, gưl dlông kăn dưi ngă brei rei kơ čar. Knŏng ti čar yơh ară anei dôk huĭ kơ soh, tăp năng dôk mtrưm nanao snăn, mơ̆ng anăn mơh ayŏng adei hlăm kdriêk ăt tui huĭ kơ soh mơh, ngă mă wư pêč amâo mâo klă mngač lŏ jao kơ să, să hlŏng wi wư amâo mâo thâo bĭt êlan mă bruă. Kyuanăn bi mkŏ mjing hĕ hdră êlan mă bruă truăn klă mngač mtam mơ̆ng phŭn jing mơ̆ng anôk bruă kƀĭn ala, mơ̆ng knŭk kna hŏng klei klă mngač jih jang djăp mta bruă, bi mbha kơ dŭm krĭng, kwar. Êjai anăn, knuă druh ngă bruă amâo lŏ huĭ kơ soh ôh, lehanăn knuă druh ngă bruă čŏng ngă mtam hŏng jih ai tiê.

Mđĭ hnơ̆ng klei mbha gưl, mjing klei bi đăo knang. Alŭ wăl srăng jhŏng yơh ngă, jhŏng yơh hlăm klei gĭr mđĭ bi pral, hlăm bruă đua klam pioh bi leh ênŭm 3 mta bruă lăn čar kñăm. Anăn jing klei k’iăng khua knơ̆ng bruă čuăl mkă lehanăn duh bi liê čar Quảng Bình Mai Hồng Ngọc bi êdah:

Siămdah, bruă bi hmô klei mbha gưl kơ kdriêk ăt brei mâo klei mđing, mâo klei kăp ksiêm kjăp hĭn mơ̆ng dŭm anôk bruă kiă kriê hdră lăn čar kñăm, lehanăn pral mâo mtam klei kăp đru, ktrâo atăt kơ dŭm kdriêk, să, pô duh bi liê mơ̆ng phŭn mkŏ mjing, bi mklă, jao hdră djă yua prăk pioh ngă bruă truh kơ klei bi leh, tĭng mkă ênoh bi liê jih jang knhal tuič.

Hŏng klei čŏng ngă, mâo ai tiê jhŏng, thâo kiă kriê, hŏng klei kpă, amâo mâo ñĕ đuĕ ôh, ƀiădah pral thâo ƀuh jih jang klei dleh dlan, klei gun kpăk, Bruă kƀĭn ala lŏ dơ̆ng mđrăm mbĭt hŏng knŭk kna tui duah djăp hdră mghaih msir bi djŏ hĭn, boh nik êjai wưng dôk ngă 3 hdră lăn čar kñăm hlăm wưng thŭn 2021-2025 knŏng adôk hlăm brô dua thŭn bi leh ênoh čuăn kčah. Hrue 29/11/2023, Klei bi kƀĭn tal 6 bruă kbĭn ala gưl 15 bi mklă leh hdră mtrŭn yuôm bhăn kơ bruă anei. Anei jing gưl tal êlâo sa mta bruă mơ̆ng anôk bruă kƀĭn ala ksiêm dlăng mâo mkŏ mjing hlăm mkrah wưng bi ksiêm wĭt, mbĭt hŏng anăn êjai dôk ngă bruă, kñăm mâo klei mkra wĭt. Gưl tal êlâo, sa mta klei kăp ksiêm mơ̆ng gưl dlông bi mguôp jih 3 hdră lăn čar kñăm yuôm bhăn. ksiêm hŏng ai tiê klă mngač, anăn jing bi rŭ mdơ̆ng, lehanăn bi kdơ̆ng ktang hŏng klei ngă soh, kñăm čiăng kơ jih jang bruă ƀrư̆ hrue kjăp hĭn. Khua bruă kƀĭn ala Vương Đình Huệ mñă msĕ snăn hlăm lu klei bi kƀĭn lehanăn brei thâo;    

Bruă kƀĭn ala tŭ ư brei knŭk kna pral mkŏ mjing, ba mdah hŏng bruă kƀĭn ala ti anôk bi kƀĭn giăm hĭn, jih bruă čih mkra hdră mtrŭn kơ bruă bi hmô hlue ngă dŭm klei bhiăn, hdră êlan hjăn kơ bruă bi mbha gưl ti gưl kdriêk dưi bi mklă čoh cuăn, mbha jao, lehanăn djă yua ngăn prăk mŏng knŭk kna, êjai dôk ngă bruă lăn čar kñăm.

Lu phung bi ala mâo klei čang hmăng, hdră mtrŭn mơ̆ng anôk bruă kbĭn ala srăng mghaih msir jih ya mta bruă adôk ka djŏ hlăm klei dôk ngă bruă lăn čar kñăm. Pô bi ala Rơ Châm Hphik, êpul mơ̆ng Gia Lai lač:

Hdră mtrŭn jing sa bruă mjêč, lehanăn bi pral, jing djŏ hŏng ai tiê mnuih ƀuôn sang, jing bi ruh mgaih jih ya mta klei dôk dleh kpăk hlăm klei hlue ngă bruă lăn čar kñăm.

Mbĭt hŏng bruă bi mklă hdră mtrŭn kăp ksiêm mơ̆ng gưl dlông kơ bruă “Kơ bruă hlue ngă jih jang hdră mơ̆ng anôk bruă kƀĭn ala mtrŭn kơ hdră lăn čar kñăm mkŏ mkra krĭng ƀuôn sang mrâo wưng thŭn 2021-2025; bi hrŏ ƀun hŏng klei kjăp wưng thŭn 2021-2025; mđĭ kyar klei duh mkra ala ƀuôn krĭng mnuih djuê ƀiă, lehanăn krĭng čư̆ čhiăng wưng thŭn 2021-2030”, Bruă kƀĭn ala ăt ba jao kơ knŭk kna mdah hŏng anôk bruă kƀĭn ala hlăm klei bi kƀĭn giăm anei kơ sa hdră mtrŭn pioh lông ngă klei mbha gưl, jao klei dưi, bi hrŏ klei ngă hră mơar, kñăm ruh mgaih jih klei dleh dlan, klei gun kpăk, đru ngă hdră lăn čar kñăm bi tŭ jing, truh wưng kčah djŏ hdră, mjing klei bi đăo knang, lehanăn ba klei hdĭp jăk yâo hŏng mnuih ƀuôn sang./.