Jing sa čô nao dưi jao ngă bruă ti krĭng mnuih djuê ƀiă Đầm Ròn, kdriêk Dam Rông, čar Lâm Đồng mơ̆ng thŭn 1980, leh giăm 40 thŭn nao mbĭt hŏng bruă mtô mjuăt bi hriăm, thŭn 2018, Liêng Jrang Ha Tương, ti ƀuôn Đa Tế, să Dă M’Mrông wĭt leh bruă leh anăn dưi jao păn ngă khua bruă đảng nah tŭ ti alŭ. Hŏng bruă păn mrâo, Liêng Jrang Ha Tương dưi bi lar jăk bruă klam mơ̆ng đảng viên, mbĭt hŏng phung đảng viên mkăn hlăm anôk bruă jêñ jêñ ngă klei bi kƀĭn, hluê ngă tŭ dưn dŭm hdră mtrŭn kơ klei mđĭ kyar bruă duh mkra, dhar bruă, yang ƀuôn, mđĭ hnơ̆ng klei hdĭp, ai tiê kơ mnuih ƀuôn sang. Liêng Jrang Ha Tương brei thâo, čiăng kơ mnuih ƀuôn sang hlăm ƀuôn hur har mă bruă knuă, mkŏ wĭt ana pla mjing, mđĭ hĭn boh tŭ bruă pla mjing, asei ñu pô leh anăn phung đảng viên mkăn hlăm anôk bruă srăng nao êlâo, mâo klei bi hmô hlăm bruă hluê ngă. Boh nik, srăng bi lar bruă klam đảng viên, hur har hluê hriăm leh anăn hluê ngă klei mĭn, knhuah hdĭp Hồ Chí Minh hŏng dŭm mta bruă ngă klă klơ̆ng.

 “Hŏng đảng viên srăng jing pô nao êlâo, srăng jing pô ngă êlâo, mơ̆ng anăn yơh mnuih ƀuôn sang dưi bi mlih klei mĭn, ƀuh klă boh tŭ dưn bruă pô ngă. Msĕ si hlăm wưng êgao, hmei mâo leh hdră êlan klă klơ̆ng, pla mjing djam mtam ăt msĕ mơh rông ŭn mnŭ…čiăng bi hơĭt klei hdĭp mda gŏ sang. Mơ̆ng dŭm bruă dưi ngă, hmei dưi hyuă kjăp hlăm jih jang mnuih ƀuôn sang leh anăn diñu hluê ngă, bi hơĭt klei hdĭp mda gŏ sang pô, bi hrŏ ênoh bi liê blei mnơ̆ng ƀơ̆ng grăp hruê. Anei ăt jing klei kâo ƀuh hŏng phung đảng viên êjai hluê hriăm drei srăng ngă dŭm mta bruă klă klơ̆ng msĕ sơnăn”.

Leh 5 thŭn ngă khua bruă Đảng nah gŭ, Liêng Jrang Ha Tương dưi mâo lu klei kruăk knăl leh anăn klei khăp siam hlăm grăp čô knuă druh, đảng viên leh anăn mnuih ƀuôn sang hlăm ƀuôn. Mơ̆ng dŭm mta bruă klă klơ̆ng hlăm bruă nao êlâo čoh bruă ngă hma, mkŏ wĭt ana pla mjing đru mđĭ hnư hrui wĭt, lu mnuih ƀuôn sang hlăm ƀuôn hur har hluê ngă. Klă klơ̆ng, mâo leh giăm 50 gŏ sang mnuih djuê ƀiă hlăm ƀuôn jhŏng mlih ênhă pla mdiê amâo jing čiăng pla ana rông hluăt, lu gŏ sang pla thiăm djam mtam, mđĭ kyar bruă rông mnơ̆ng, amâodjŏ knŏng mgaih msir klei čiăng kơ mnơ̆ng ƀơ̆ng huă ƀiădah lŏ ba kơ anôk čhĭ mnia. Mơ̆ng anăn, klei hdĭp mnuih ƀuôn sang hlăm ƀuôn ƀrư̆ ƀrư̆ mâo klei hơĭt leh anăn đĭ kyar hĭn. Dŭm klei bhiăn amâo mâo lŏ djŏ hlăm klei bi kuôl ung mô̆, klei djiê brŭ ăt dưi lăm lui, dŭm knhuah siam dhar kreh djuê ana dưi kriê pioh leh anăn bi lar. Êlan klông mtah, doh, siam, rơ̆ng kơ dŭm hnơ̆ng čuăn kơ alŭ, ƀuôn kreh dhar. Liêng Jrang Ha Tương, mnuih djuê ana K’Ho ti ƀuôn Đa Tế, să Dă Mrông brei thâo:

            “Hlăm ƀuôn Đa Tế pô mâo khua bruă đảng nah gŭ ti alŭ gĭt gai, êlan klông hlăm ƀuôn mâo klei jăk, dŭm boh klei hlăm ƀuôn mâo klei hơĭt, doh siam leh anăn khuăt”.

Ƀuôn Đa Tế, să Dă Mrông, kdriêk Dam Rông mâo giăm 220 gŏ sang, giăm 1000 čô mnuih ƀuôn sang, lu jing mnuih djuê ƀiă, hnơ̆ng gŏ sang ƀun ƀin mâo mkrah wah. Kyua mâo klei mlih hlăm knhuah mĭn, hdră ngă, ƀrư̆ ƀrư̆ mkŏ wĭt ana pla mjing, čoh bruă ngă hma leh anăn dưn yua klei kreh knhâo, hdră mnêč hlăm bruă pla mjing…hnơ̆ng gŏ sang ƀun ƀin mâo klei hrŏ adôk ti gŭ 20%. Hlăm ƀuôn kčưm mâo đa đa klei bi hmô ngă bruă mâo hnư hrui wĭt dŭm êtuh êklăk prăk grăp thŭn.

Năng mđing hĭn, čiăng ngă jăk bruă dlăng kriê alŭ ƀuôn, čiăng răng mgang klei êđăp ênang leh anăn mâo klei găl hlăm bruă hâo hưn, mtrŭt mjhar mnuih ƀuôn sang hluê ngă jăk dŭm hdră kčah mtrŭn mơ̆ng Đảng, klei bhiăn lăn čar, Liêng Jrang Ha Tương lŏ kčĕ hŏng phung đảng viên hlăm alŭ, Êpul mnuih ƀuôn sang kač rŭp êlan ƀuôn, bi êdah klă nik lu klei hưn kơ dŭm hdră bruă yang ƀuôn, êlan klông, sang kƀĭn ƀuôn, anôk bi kƀĭn klei đăo leh anăn grăp boh sang mơ̆ng grăp gŏ sang. Hră kač anei dưi yuôl ti sang kƀĭn dhar kreh ƀuôn čiăng čiăng grăp bư̆ mâo mnuih ƀuôn sang, phung tuê hriê čuă, hlăp lêñ, hluê hriăm leh anăn čuă dlăng dưi thâo klă. Mbĭt anăn, ăt jing tur knơ̆ng čiăng kriê dlăng mnuih ƀuôn sang, ênoh mnuih dôk, dôk êjai, hriê dôk, đuê̆ nao…jing klei bi hmô kriê dlăng mrâo dôk dưi pŏk mar ti să Dă Mrông leh anăn wăt ti kdriêk Dam Rông.

Hluê si Nguyễn Hoàng Mai, Khua dlăng bruă Đảng nah gŭ, khua bruă sang čư êa să Dă Mrông, Liêng Jrang Ha Tương jing sa čô mâo kơhưm leh anăn jing đảng viên mâo klei bi hmô. Hŏng bruă klam jing khua dlăng bruă đảng alŭ ƀuôn, ñu mâo klei đru mguôp hur har hlăm bruă mkŏ mjing Đảng, bruă sang čư êa, mtrŭt mjhar mnuih ƀuôn sang hur har mđĭ kyar bruă duh mkra ala ƀuôn, bi hrŏ ƀun hŏng klei kjăp leh anăn hrăm mbĭt mkŏ mkra krĭng ƀuôn sang mrâo, jing gru hmô êdah êdi čiăng kơ phung đảng viên mda asei hluê ngă.

“Đa Tế ară anei jing alŭ mâo lu klei jăk. Leh anăn hlăm anôk bi kƀĭn sang dhar kreh ƀuôn ăt mkŏ mjing dŭm pŏk mdhă hưn mơ̆ng anôk bruă Đảng nah gŭ, êpul mnuih ƀuôn sang, mơ̆ng dŭm êpul êya čiăng čih yao klei ngă bruă mơ̆ng dŭm anôk bruă anei, grăp mlan, grăp wưng tlâo mlan mâo klei bi klă klă anăp hlăm pŏk mdhă hưn čiăng mâo klei bi mkă gĭr ktưn. Dưi lač, hŏng bruă klam jing khua bruă Đảng nah gŭ ti alŭ, Liêng Jrang Ha Tương dưi bi lar lu boh tŭ dưn, mâo bruă Đảng nah gŭ, bruă sang čư êa să pah mni, mđĭ ai leh anăn hmăng hmưi hlăm wưng kơ anăp Liêng Jrang Ha Tương srăng lŏ dơ̆ng bi lar dŭm boh tŭ dưn anei čiăng ba ƀuôn Đa tế ƀrư̆ hruê ƀrư̆ đĭ kyar. Jing sa anôk bruă đảng nah gŭ bi hmô mơ̆ng Dă Mrông, leh anăn lu să mkăn srăng hluê hriăm leh anăn hluê ngă.

Kyua klei gĭr ktưn, hur har, nao êlâo hlăm bruă hluê ngă dŭm hdră bruă mơ̆ng alŭ wăl mtrŭt mjhar, bi hmô čiăng kơ phung đảng viên mda asei leh anăn mnuih ƀuôn sang ti alŭ wăl hluê ngă, đảng viên Liêng Jrang Ha Tương, pô dlăng bruă đảng nah gŭ ƀuôn Đa Tế jing gru hmô êdah êdi mơ̆ng ƀuôn sang, mâo mă lu hră pah mni mơ̆ng kdriêk Dam Rông, čar Lâm Đồng./.