Ktrâo ti êlan betong siam sĭn hlăm ƀuôn khua mduôn K’Keo, ti ƀuôn Hàng Làng, să Gung Ré, kdriêk Di Linh (Lâm Đồng) mơak brei thâo, krĭng ƀuôn sang hlăm să mâo leh klei bi mlih lu mkă hŏng êlâo. Kyua mâo leh êlan klông jăk găl, boh mnga bruă lŏ hma mâo čhĭ amâo lŏ lĕ hlăm klei phung ghan mnia kpĭ ênoh ôh, lehanăn êwang êlan mâo hrut giăm hĭn mơh truh kơ krah să... snăn klei hdĭp mda mnuih ƀuôn sang mâo leh klei bi mlih jăk. Mâo hĕ boh tŭ dưn anei, kyua mâo klei   Đảng lehanăn knŭk kna mđing hlăm djăp mta, hlăm anăn mâo hdră ala čar kñăm kơ bruă mkŏ mkra krĭng ƀuôn sang mrâo.

           “Dưi thâo săng anei jing bruă tŭ dưn, snăn jih jang mnuih ƀuôn sang bi sa ai. Wưng leh êgao, mnuih ƀuôn sang mâo duh myơr ana mnơ̆ng pla, lăn ala lehanăn đru mguôp hrue ai čiăng mđrăm mbĭt hŏng knŭk kna mkŏ mkra krĭng ƀuôn sang mrâo. Knŭk kna đru leh mnuih ƀuôn sang pŏk êlan nao truh hlăm hma, êlan hlăm ƀuôn. Čiăng kơ ƀuôn êlan mâo klei găn êrô jăk, mjing klei găl kơ mnuih ƀuôn sang mđĭ kyar klei hdĭp mda, mjing kơ krĭng ƀuôn sang knư̆ hrue knư̆ mâo klei bi mlih hĭn”.

          Amâo mâo djŏ knŏng ti ƀuôn Hàng Làng, să Gung Ré, ƀiădah bruă mkŏ mkra krĭng ƀuôn sang mrâo mâo ba wĭt leh klei tŭ dưn kơ tar ƀuôn êlan ti kdriêk Di Linh, čar Lâm Đồng. Ti ƀuôn Duệ, să Đinh Lạc, leh mâo tŭ yap jing ƀuôn dhar kreh thâo bi hmô, mnuih ƀuôn sang tinei mđrăm mbĭt hŏng bruă sang čư̆ êa mkŏ mjing lehanăn bi leh ênoh čuăn krĭng ƀuôn sang mrâo dưi lŏ mđĭ hĭn.

Tui si M’Hiu Nguyên, Khua bruă Đảng ƀuôn Duệ, ăt kyua mâo mnuih ƀuôn sang thâo ƀuh klei tŭ dưn mơ̆ng bruă mkŏ mkra krĭng ƀuôn sang mrâo ba wĭt kơ asei mlei pô, kơ ƀuôn sang pô mơ̆ng anăn jih jang mnuih bi krăp sa ai ngă bruă mbĭt. Hlăm anăn, hdră mă bruă hlăm knăm 6 krĭng ƀuôn sang mrâo mâo đĭ lar leh jăk, đru kơ ƀuôn sang mjing kdrưh hŏng ƀuôn prŏng mơh: Mâo pui kmlă, mâo êdeh hiu mă djah, lehanăn hlăm êlan klông pưk sang doh mngač nanao. M’Hiu Nguyên, lač:

           “Ară anei ti ƀuôn Duệ hlăk mâo leh klei bi mlih jăk. Knuă druh lehanăn mnuih ƀuôn sang hrăm mbĭt bi sa ai hŏng knăm 6 krĭng ƀuôn sang mrâo. Msĕ si, bruă êlan klông hlăm ƀuôn mtah siam, doh, djah djâo mâo hwai êmiêt khuăt, pui mtrang mngač hlăm djăp êlan klông, ƀô̆ mta krĭng ƀuôn sang mâo mlih mrâo. Snăn jing jih jang bruă krĭng ƀuôn sang, tinăn klei hdĭp mnuih ƀuôn sang ƀuh leh klei bi mlih sĭt”.

          Di Linh jing kdriêk mnuih djuê ƀiă mâo ênoh lu hĭn, êbeh 40%, hlăm anăn lu jing mnuih djuê ana K’ho. Truh kơ ară anei kluôm kdriêk mâo leh 18/18 să djăp ênoh čuăn krĭng ƀuôn sang mrâo, 2 să djăp ênoh čuăn krĭng ƀuôn sang mrâo kdlưn hĭn lehanăn 1 boh să jing krĭng ƀuôn sang mâo klei bi hmô jăk. Vũ Đức Nhuần, K’iăng khua knơ̆ng bruă sang čư̆ êa kdriêk Di Linh brei thâo, lŏ dơ̆ng ngă tŭ jing bruă mkŏ mkra krĭng ƀuôn sang mrâo wưng thŭn 2021-2025, Êpul khua kiă kriê bruă Đảng kdriêk Di Linh mâo mkŏ mjing leh mta bruă 04 bi sĭt bruă knuă knăm 6 mkŏ mkra krĭng ƀuôn sang mrâo ti tar ƀuôn êlan. Găn giăm 1 thŭn ngă bruă, hdră anei mâo ling lar leh hlăm jih jang mnuih ƀuôn sang, lehanăn hlăm phung knuă druh    đảng viên. Hlăm ăan, bruă klam prŏng êdi hlăm mnuih ƀuôn sang hŏng klei mkŏ mkra krĭng ƀuôn sang mrâo knư̆ hrue knư̆ bi êdah leh klei tŭ jing. Anei dưi yap jing knơ̆ng phŭn čiăng kơ kdriêk bi leh dŭm mta cuăn lehanăn anăp tŭ yap jing kdriêk krĭng ƀuôn sang mrâo hlăm thŭn 2024. Vũ Đức Nhuần, lač:

           “Mta bruă 04 hrue 18 mlan 01 thŭn 2023 Êpul kiă kriê bruă Đảng kdriêk jing leh hdră êlan ngă bruă êđăp ênang kluôm dhuôm kơ bruă mkŏ mkra krĭng ƀuôn sang mrâo. Jao ênoh čuăn kơ grăp boh să, grăp boh ƀuôn čiăng bi leh ênŭm ênoh čuăn kơ krĭng ƀuôn sang mrâo. Wăt hlăm kdriêk mâo leh 9 ênoh čuăn kơ krĭng ƀuôn sang mrâo ăt brei bi leh. Hlăm wưng leh êgao snăn truh knăm 6, knăm 7 snăn khua kdriêk, khua bruă Đảng kdriêk khua hlăm knơ̆ng bruă sang čư̆ êa kdriêk tiŏ nao truh hlăm grăp boh să čiăng mđĭ ai, mtrŭt mjhar mnuih ƀuôn sang, lehanăn mdrăm mbĭt hŏng mnuih ƀuôn sang hwai mdoh mnuôr mbông êa, ktrâo atăt mnuih ƀuôn sang ngă klei bi mlih mrô... mjing leh klei sa ai prŏng hlăm mnuih ƀuôn sang hŏng bruă klam pô đru bi mkŏ mkra krĭng ƀuôn sang mrâo”.

            Amâo mâo djŏ knŏng ktưn bi djăp ênoh čuăn krĭng ƀuôn sang mrâo ti thŭn 2024, kdriêk Di Linh lŏ mâo ênoh čuăn hlăm thŭn 2025 srăng ngă dŭm ênoh čuan kdriêk krĭng ƀuôn sang mrâo ti hnơ̆ng kdlưn hĭn, prŏng hĭn, hŏng ênoh ƀiă êdi jing  8 să djăp ênoh čuăn krĭng ƀuôn sang mrâo ti hnơ̆ng kdlưn hĭn, lehanăn 5 boh să jing krĭng ƀuôn sang ngă klei bi hmô. Dôk hlăm hdră êlan thâo bi mguôp jih jang djuê ana, mă mnuih ƀuôn sang jing knơ̆ng, jing pô phŭn hlăm bruă mkŏ mkra krĭng ƀuôn sang mrâo, dăo sĭt kdriêk Di Linh srăng pral bi leh dŭm ênoh čuăn kčah leh, đru bi rŭ mdơ̆ng krĭng dlông Di Linh ƀrư̆ hrue mdrŏng siam./.