Mkŏ mjing hlăm wưng 3 hruê mơ̆ng hruê 29/11 – 1/12/2023 ti ƀuôn prŏng Kon Tum, čar Kon Tum, Hruê knăm dhar kreh, mjuăt asei mlei leh anăn hiu čhưn ênguê dŭm djuê ana krĭng Lăn Dăp Kngư gưl tal 1, thŭn 2023 kñăm bi mni kơ boh tŭ dhar kreh knhuah gru jăk siam mơ̆ng dŭm djuê ana krĭng Lăn Dăp Kngư, mbĭt anăn lŏ rang mdah, mtrŭt mđĭ bruă hiu čhưn ênguê. Hruê knăm mơ̆ng Phŭn bruă dhar kreh, mjuăt asei mlei leh anăn hiu čhưn ênguê bi mguôp hŏng đa đa Phŭn, dhar bruă gưl dlông leh anăn 5 čar alŭ wăl krĭng Lăn Dăp Kngư mâo: Kon Tum, Gia Lai, Dak lak, Dak Nông leh anăn Lâm Đồng mkŏ mjing. Nao hlăm hruê knăm mâo hlăm brô 1000 čô thâo mbruă, phung kdŏ mmuñ, phung bi lông leh anăn phung bi ala dŭm djuê ana dôk hdĭp mda ti 5 čar krĭng Lăn Dăp Kngư.

Blŭ mphŭn pŏk leh anăn gĭt gai knăm mơak, bi ala kơ Đảng, knŭk kna, Đại tướng Tô Lâm, Khua hlăm Phŭn bruă kđi čar, Khua phŭn bruă kahan ksiêm mñă klă: Đảng leh anăn knŭk kna uêñ mĭn nanao kơ bruă mđĭ kyar kluôm leh anăn kjăp krĭng Lăn Dăp Kngư. Mơ̆ng hruê mlih mrâo truh kơ ară anei ba mdah leh lu hdră mtrŭn, asăp mtrŭn, klei bi klă kơ boh klei anei. Hruê 6/10/2022 Phŭn bruă kđi čar gưl 13 mâo leh hdră mtrŭn mrô 23 kơ klei mđĭ kyar bruă duh mkra ala ƀuôn leh anăn răng mgang klei êđăp ênang krĭng Lăn Dăp Kngư truh ti thŭn 2030, tă hdră truh thŭn 2045, hlăm anăn bi klă “Mkŏ mjing dhar kreh krĭng Lăn Dăp Kngư mrâo mrang, jiă kma knhuah gru djuê ana, sa ai hlăm klei bi lu jơr, mpŭ kơ dŭm mta mdê hĭn hlăm dhar kreh dŭm djuê ana, dlăng anăn jing boh kdrŭt, tur knơ̆ng kơ klei đĭ kyar leh anăn ñŭ kma tar rŏng lăn mơ̆ng krĭng”.

 “Lŏ dơ̆ng bi klă hdră mtrŭn 13 mơ̆ng Đảng leh anăn hdră êlan mđĭ kyar dhar kreh truh ti thŭn 2030, Hruê knăm dhar kreh, mjuăt asei mlei leh anăn hiu čhưn ênguê dŭm djuê ana krĭng Lăn Dăp Kngư gưl tal 1, thŭn 2023 srăng klă klơ̆ng jing anôk bi mklin, lar bra, leh anăn wưng kơ kơ mnuih ƀuôn sang dŭm djuê ana ti krĭng Lăn Dăp Kngư mjĕ mjuk, bi tuôm, kah mbha klei hriăm, đru rang mdah rup, anak mnuih, knhuah siam dhar kreh dŭm djuê ana krĭng Lăn Dăp Kngư truh kơ phung mah jiăng hlăm leh anăn êngao lăn čar, pŏk mlar klei găl tŭ mă klei duh bi liê, iêo jak mđĭ kyar bruă hiu čhưn ênguê krĭng Lăn Dăp Kngư, hlăm anăn mâo čar Kon Tum”.

Leh knăm mphŭm pŏk dưi mkŏ mjing krưh kơăm, kdrêč mơak hlăm Hdră kdŏ mmun mâo akŏ “Lă lia krĭng Lăn Dăp Kngư - klei jăk bi kƀĭn” dưi bi mâo lu gru kđăm hlăm ai tiê mnuih ƀuôn sang leh anăn phung tuê. Mbĭt hŏng hlăm brô 600 čô mbruă, phung kdŏ mmuñ, phung bi lông dŭm djuê ana 5 čar hưn mdah kơ knhuah dhar kreh jiă kma krĭng Lăn Dăp Kngư, hlăm knăm mphŭn pŏk, gưl tal êlâo mnuih ƀuôn sang dưi ktuê dlăng klei tông hgơr “Ênai kwang čư̆ čhiăng krĭng Lăn Dăp Kngư” mơ̆ng 500 čô lĭng kahan ti Anôk bruă mtô mjuăt kahan ksiêm yang ƀuôn rang mdah leh anăn klei rang mdah ayŭ đĭng mơ̆ng giăm 100 čô lĭng kahan mơ̆ng Êpul klei bhiăn kahan ksiêm yang ƀuôn, Knơ̆ng gĭt gai lĭng kahan knhăk. Mơ̆ng să Tà Nung, ƀuôn prŏng Đà Lạt, čar Lâm Đồng nao truh ti čar Kon Tum hgŭm hlăm hruê mơak, pô thâo mbruă Ka The, mnuih djuê ana K’Ho brei thâo:

 “Lač jăk kơ êpul mkŏ mjing dưi ngă leh hdră anei. Anei jing anôk bi kƀĭn jih jang dŭm klei jăk dhar kreh mơ̆ng dŭm djuê ana krĭng Lăn Dăp Kngư anei. Anei jing anôk bi tuôm, čiăng mjĕ mjuk, čiăng thâo klă hĭn kơ dŭm hdră bhiăn, dŭm knhuah jăk mơ̆ng grăp djuê ana. Hmei ba tinei kdrăp čŭt hơô, dŭm klei kdŏ mmuñ ênhiang mnuih K’Ho, leh anăn dŭm mta mnơ̆ng ƀơ̆ng čiăng kơ pô mjĕ mjuk hŏng phung găp...”

Hruê knăm dhar kreh, mjuăt asei mlei leh anăn hiu čhưn ênguê dŭm djuê ana krĭng Lăn Dăp Kngư gưl tal 1, thŭn 2023 dưi mkŏ mjing ti čar Kon Tum hŏng lu mta bruă. Hlăm anăn, bruă dhar kreh knhuah gru mâo 6 mta phŭn: Rang mdah dŭm knăm mơak, klei bhiăn knhuah gru dhar kreh dŭm djuê ana, rang mdah, hưn mdah dŭm mnơ̆ng dhơ̆ng knhuah gru dhar kreh mơ̆ng dŭm alŭ wăl, rang mdah mnơ̆ng ƀơ̆ng huă djuê ana, klei kdŏ mmuñ leh anăn kdrăp čŭt hơô djuê ana krĭng Lăn Dăp Kngư, klei rang mdah knhuah dhar kreh jăk siam dŭm djuê ana krĭng Lăn Dăp Kngư hlăm êpul êya dhar kreh dŭm djuê ana Việt Nam, rang mdah rup êa mil dhar kreh dŭm djuê ana krĭng Lăn Dăp Kngư mbĭt hŏng klei đĭ kyar mơ̆ng lăn čar. Klei mjuăt ktang asei mlei mâo 5 mta klei bi lông: trŭt giê, ktŭng klei, mnah hna, đĭ gơ̆ng miă êa prăi leh anăn kdăt klŭng. Bruă hiu čhưn ênguê hưn mdah truh hŏng mnuih ƀuôn sang leh anăn phung tuê lu anôk hiu čhưn ênguê siam hlăm čar Kon Tum.

Êngao kơ mta kñăm mkŏ mjing wăl mkŏ dhar kreh, hưn mdah, rang mdah hŏng mnuih ƀuôn sang kơ knhuah dhar kreh mơ̆ng dŭm djuê ana krĭng Lăn Dăp Kngư, Hruê knăm dhar kreh, mjuăt asei mlei leh anăn hiu čhưn ênguê dŭm djuê ana krĭng Lăn Dăp Kngư gưl tal 1 lŏ jing klei găl yuôm bhăn kơ bruă hiu čhưn ênguê krĭng Lăn Dăp Kngư, hlăm anăn mâo čar Kon Tum dưi kpưn đĭ. Hlăm boh sĭt, ară anei dŭm čar krĭng Lăn Dăp Kngư dưi mkŏ mjing leh dŭm anôk, mnơ̆ng dhơ̆ng bruă hiu čhưn ênguê, mâo klei mkŏ plah wah dŭm anôk hiu čhưn ênguê. Hŏng knăm mơak anei, thiăm sa blư̆ dŭm êa mil krĭng Lăn Dăp Kngư mâo lu phung mah jiăng giăm kbưi thâo lu hĭn, mkŏ mjing dŭm klei găl mrâo kơ bruă hiu čhưn ênguê ti krĭng Lăn Dăp Kngư đĭ kyar.