Ti krĭng lăn sah kba Êa Ñuôl, kdriêk Ƀuôn Đon, čar Dak Lak, đang boh êrang êbeh 1,5 ha mâo Lý Mạnh Hùng dlăng kriê wiê ênăk mprăp mŭt hlăm wưng mboh mrâo. Hùng brei thâo, mŭt hlăm yan boh êrang, truh kơ đang war, phung tuê dưi pĕ ƀơ̆ng lehanăn tui ksiêm kơ hdră pla, dlăng kriê, hrui pĕ boh êrang, pô war ăt hơ̆k kdơ̆k kyua dưi čhĭ boh ti đang war mtam lehanăn amâo luič hruê mmông, prăk mưn mnuih hrui pĕ, kăn liê prăk dŭ mdiăng. Lý Mạnh Hùng brei thâo:

 “Mơ̆ng wưng pla mjing ana boh êrang anei mkăp kơ tuê hiu čhưn ênguê lehanăn bruă duh mkra gŏ sang, kâo ƀuh ti krĭng lăn sah kba Ƀuôn Đon anei djŏ guôp hŏng ana boh êrang. Ana boh êrang truh ti Lăn dap kngư ênưih dlăng kriê. Boh kâo pla dưi ba čhĭ kơ phung tuê hiu čhưn mtam, ba wĭt hnư hrui wĭt h’ĭt kjăp mơh kơ gŏ sang”.

Amâo djŏ knŏng pla mjing dŭm mta ana mâo mơ̆ng êlâo, dŭm ƀĭng ngă lŏ hma ti kdriêk Ƀuôn Đon jhŏng bi mlih, lông ba pla dŭm mta mnơ̆ng mrâo. Dŭm gru hmô ba wĭt leh boh tŭ dưn prŏng lehanăn mtrŭt mđĭ klei tui ksiêm mơ̆ng phung tuê hiu čhưn tơdah truh ti đang war. Êdah êdi jing đang boh nho, êbeh 1.800 ƀĕ ana mơ̆ng Đỗ Trọng Huế, ti să Êa Huar, kdriêk Ƀuôn Đon. Đỗ Trọng Huế brei thâo, khădah knŏng mâo 100 ana mboh, ƀiădah hnư hrui wĭt mơ̆ng gŏ sang ñu truh leh 200 êklăk prăk/thŭn. Amâo djŏ dŭm anăn, mâo leh lu mnuih iêu êmuh hŏng klei čang hmăng dưi nao dlăng, tui ksiêm…

 “Leh gŏ sanh kâo pla lehanăn ksiêm dlăng ƀuh ana boh nho ba wĭt boh tŭ, čhĭ mâo ênoh mơh hlăm dŭm thŭn giăm anei. Sang kâo hưn mthâo leh hlăm hla pŏk web yang ƀuôn, mâo lu mnuih hriê čhưn dlăng… Kyua anăn, kâo mâo hdră ngă hiu čhưn dlăng bruă lŏ hma, ară anei dôk akâo hră ngă bruă”.

.

Mơ̆ng klei găl mâo ti alŭ wăl lehanăn ƀuh klei čiăng hiu čhưn dlăng mơ̆ng phung tuê đĭ lu. Trần Văn Toàn, Khua Êpul hgŭm bruă hiu čhưn hdră lŏ hma Phú Nông – Buôn Đôn brei thâo, Êpul bi hgŭm hŏng dŭm gŏ sang mđing mđĭ kyar dŭm gru hmô rông mnơ̆ng, pla mjing mâo klei găl ti alŭ wăl msĕ si rông pai, rông mnŭ, rông kan, pla boh kruê̆, boh kruê̆ adŭng, cacao, boh êrang… čiăng mkăp kơ tuê hiu čhưn ênguê.

 “Brei drei pral mâo hdră ngă bruă djŏ guôp tơdah drei knŏng mđing kơ hdră hiu čhưn ênguê lui hĕ bruă lŏ hma snăn hdră tui ksiêm amâo mâo ôh. Ară anei, tuê hiu čhưn ênguê ăt dơ̆ng bi mlih hluê hdră hiu čhưn tui ksiêm lehanăn nao dlăng dŭm gru hmô.

Y Si Thắt Ksơr, K’iăng khua Anôk bruă sang čư̆ êa kdriêk Ƀuôn Đon brei thâo: Kdriêk mđing êdi kơ hdră mđĭ kyar bruă hiu čhưn ênguê mguôp hŏng bruă lŏ hma, krĭng ngă lŏ hma. Hlăm hdră mtrŭn bruă Đảng kdriêk wưng thŭn 2020-2025 mñă leh kơ klei anei. Hlăm wưng êgao, Anôk bruă sang čư̆ êa kdriêk jao kơ Adŭ bruă Lŏ hma mđĭ kyar krĭng ƀuôn sang bi hgŭm hŏng Adŭ bruă Dhar kreh – hâo hưn nah gŭ tă hdră êlan mđĭ kyar klei găl mâo mơ̆ng kdriêk, ruah dŭm gru hmô djŏ guôp čiăng hluê ngă. Mbĭt anăn, kdriêk Ƀuôn Đon ăt mđing mđĭ kyar êpul hgŭm bruă. Truh ară anei, kluôm kdriêk mâo 19 êpul hgŭm dôk ngă bruă, hlăm anăn mâo lu êpul bruă ngă gru hmô bruă hiu čhưn ênguê – bruă lŏ hma. Y Si Thắt Ksơr brei thâo:

"Kơ anăp hmei ăt hluê ngă hluê si Hdră mtrŭn mrô 88 mơ̆ng Anôk bruă kƀĭn ala čiăng đru kơ dŭm gŏ sang mâo klei dưi mđĭ kyar. Mbĭt anăn, bi hgŭm hŏng dŭm êpul bruă, boh nik ti dŭm krĭng mnuih ƀuôn sang djuê ƀiă čiăng ƀrư̆ hruê ƀrư̆ bi mlih klei mĭn, hdră ngă čiăng mđĭ kyar bruă duh mkra mguôp hŏng bruă lŏ hma, krĭng ngă lŏ hma… Đru msir mghaih bruă mă kơ mnuih ƀuôn sang djuê ƀiă mbĭt anăn đru mđĭ kyar djŏ guôp hŏng klei mâo ti alŭ wăl”.

Hŏng dŭm hdră êlan klă klơ̆ng, kdriêk Ƀuôn Đon, čar Dak Lak tă hdră êlan bi lu jơr hdră hiu čhưn ênguê, ba yua jih klei găl mâo hlăm bruă lŏ hma, hluê ngă tŭ dưn gru hmô hiu čhưn ênguê mguôp hŏng bruă ngă lŏ hma čiăng jak iêu phung tuê hiu čhưn hlăm ala čar lehanăn ala tač êngao, đru mguôp mđĭ kyar bruă duh mkra ti krĭng knông lăn./.