Gŏ sang Hà Văn Tân, ti alŭ mrô 11, să Ya Tờ Mốt jing sa hlăm dŭm gŏ sang pla mjing ba wĭt klei tŭ jing leh mjeh mdiê Briêt djăp ênoh čuăn doh tal êlâo ti kdriêk Ea Sup. Tân lač: hdră pla mjing doh jing dleh hĭn hŏng mă bruă msĕ si yăng đar, jing bi pruê hbâo, krih êa drao răng mgang hŏng mta brŭ lehanăn hŏng hla kyâo. Mlih hŏng anăn drei mă bruă amâo mâo djŏ hŏng êa drao jhat ôh. Ênoh bi liê tal êlâo hrŏ truh 40%, ƀiădah leh mâo hrui wĭt boh mnga mâo anôk čhĭ hơĭt lehanăn yuôm hĭn mơh êbeh 1,5 blư̆ mkă hŏng ênoh mdiê braih aguah tlam:

 “Hlăm klei bi hgŭm ngă bruă hŏng êpul hgŭm bi hrŏ ƀun Ea Sup mjing leh klei găl kơ gŏ sang hmei pla mjing mdiê Briêt, tal êlâo jing răng mgang wăl hdĭp mda, tal dua jing răng kriê klei suaih pral pô, lehanăn tal 3 ba wĭt klei tŭ dưn mơh kơ gŏ sang. Truh kơ ară anei, hmei buh pla leh mjeh mdiê anei mơ̆ng sui. Ƀiădah ară anei lŏ mâo klei mdĭ ai bei buh pla lu hĭn”.

Mjeh mdiê Briêt jing mta braih mdiê jăk snăk ti čư̆ čhiăng drei anei, mâo anôk pia mjeh mdiê briêt jŭ. Mta braih anei, mâo klei tŭ dưn jăk, mâo lu mta msei, mta êdjap, vitamin lehanăn mta mkhư̆ klei đĭ khua, snăn mâo lu snăk mnuih khăp huă. Nguyễn Việt Đức, Khua êpul hgŭm bruă bi hrŏ ƀun Ea Sup, kdriêk Ea Sup, čar Daklak brei thâo: Mă klei hriăm mơ̆ng dŭm yan buh pla êlâo, êpul hgŭm lŏ dơ̆ng bi mguôp hŏng mnuih ƀuôn sang, lŏ ruah anôk buh pla bi găl hŏng mjeh mdiê Briêt. Hlăm anăn, klei kơ êa jua, lăn ala, êwa doh jing mta brei bi mâo êlâo.

Thŭn dih, êpul hgŭm bruă lông buh pla tŭ jing leh mdiê Briêt mă bruă hlue hŏng hdră êlan doh, djăp ênoh čuăn JAS mơ̆ng (Japon) mâo 3 ha lehanăn braih mdiê Briêt dưi tŭ yap djăp ênoh čuăn OCOP 3 mtŭ ti gưl čar. Tui si Nguyễn Việt Đức, Khua kiă kriê bruă hgŭm bi hrŏ ƀun Ea Sup, hlăm wưng tinăp, Êpul hgŭm srăng mâo klei bi mguôp hŏng mnuih ƀuôn sang buh pla mjeh mdiê anei hŏng hdră êlan doh, ƀrư̆ ƀrư̆ bi mlih klei mĭn, hdră duh ƀơ̆ng hlăm mnuih ƀuôn sang, kñăm ba wĭt klei tŭ dưn mơ̆ng braih mdiê, jing braih jăk alŭ wăl:

 “Tal êlâo jing hmei mđing bi mâo braih jăk djăp ênoh čuăn doh. Tal 2, hmei lŏ pŏk phai ênha buh pla tui si ênoh čuăn doh Global GAP kñăm pŏk anôk pla mjing čiăng kơ lu mnuih ƀuôn sang dưi dưn boh tŭ dưn anei”.

Tui si Nguyễn Bá Bân, Khua adŭ bruă lŏ hma kdriêk Ea Sup, khădah ênhă pŏk phai anôk buh pla mdiê Briêt ka prŏng ôh, ƀiădah mâo tŭ yap leh hră mơar pla mjing doh, kñăm bi mlih klei mĭn mnuih ƀuôn sang ngă bruă hlue hdră êlan doh, hŏng mnuih ƀuôn sang pla mjing ti kdriêk Ea Súp, jing amâo mâo yua ôh êa drao hluăt, thâodah hbâo ăngre, ƀiădah knŏng pla mjing hlue knhuah doh. Mơ̆ng anăn brei ƀuh, bruă bi mlih hdră êlan buh pla tui tiŏ klei buh pla doh mơ̆ng čar Daklak hlăk dôk nao djŏ hdră, ba wĭt klei tŭ dưn prŏng êdi, lehanăn bi mlih knhuah mĭn klei ngă bruă hlăm mnuih ƀuôn sang ti knông lăn:

 “Bruă êpul hgŭm bi hrŏ ƀun Ea Sup mâo tŭ yap jing mnơ̆ng pla mjing doh, anei jing knhuang tal êlâo kơ klei bi pla mjing doh. Hlăm wưng tinăp, srăng mkŏ mjing lu êpul, lehanăn mnuih bi đru kơ êpul hgŭm, phung duh mkra čiăng bi djăp ênoh čuăn doh, čiăng ƀrư̆ hruê ƀrư̆ mâo ba wĭt lu mnơ̆ng djăp ênoh čuăn doh pioh čhĭ mnia”./.