Êbeh kơ pluh thŭn hŏng anei, ênoh jih jang klei duh bi liê kơ jih jang bruă duh mkra mơ̆ng Đảng, lehanăn knŭk kna pioh kơ să Lộc Nam, kdriêk Bảo Lâm, čar Lâm Đồng đĭ truh kơ dŭm êtuh êklai prăk. Kyua mâo klei mđing duh bi liê mơ̆ng bruă anei, jih jang êlan klei pui kmlă, êlan klông, sang hră mơar, sang êa drao, lehanăn jih jang krĭng ƀuôn sang mâo leh klei bi mlih. Dŭm boh sang hlang mtih kđuh hlăk anăn ară anei bi mlih hŏng dŭm boh sang simăng kjăp siam, klei hdĭp mda mnơ̆ng dhơ̆ng, ai tiê mâo klei bi mlih nanao.

   Jing mnuih djuê ana K’ho, tuôm djă leh phao ktuang nao bi blah răng mgang lăn čar, K’Dĩnh, 80 thŭn, dôk ti alŭ mrô 4, să Lộc Nam hŏng klei mơak brei thâo klei ư̆ êpa ƀun ƀin tiŏ kdue nanao amâo mâo thâo lŏ ruĕ, truh ară dưi msưh kdŭn leh mơ̆ng gŏ sang. Klei hdĭp mda mnuih ƀuôn sang hlăm ƀuôn dơ̆ng mâo klei đĭ kyar. Grăp boh sang dơ̆ng mâo djăp êsei huă djam ƀơ̆ng, mnơ̆ng yua:

 “Êlâo dih êlan klông kdlŭt kdăl amâo mâo thâo êrô, ară anei êlan leh mkra siam, êrô êbat jăk leh. Grăp boh sang tloh blei leh êdeh đĭ, mâo đa đa sang tloh blei leh wăt êdeh ôtô. Mphŭn dô klei hdĭp dôk hlăm klei dleh dlan, ară anei thâo bi tĭng mkă duh ƀơ̆ng đĭ kyar amâo lŏ dôk hlăm klei knap mñai ôh. Pưk sang jih jang bi mdơ̆ng leh kjăp siam sơăi. Amâo mâo leh lŏ uêñ mĭn ôh klei anăn, ară anei knŏng duah ƀơ̆ng huă mđĭ kyar klei hdĭp mda đuič yơh. Ktưn bi mâo grăp thŭn dŭm êtuh êklăk prăk jing ƀiă êdi”.

  Mơ̆ng anôk dŭm êtuh gŏ êsei mnuih djuê ana K’ho hdĭp mda truh kơ ară anei Lộc Nam lŏ đĭ leh ênoh gŏ êsei truh êbeh 3.400 boh gŏ, 13.000 čô mnuih hlăm anăn mnuih djuê ƀiă jing êbeh 30%. Kyuadah lăn ala yan adiê jing djŏ guôp hŏng ana čê, kphê, boh durian boh măng cụt, mắc ca lehanăn dŭm mta boh kroh mkăn, Lộc Nam jing leh krĭng duh mkra hơĭt hŏng ênhă jih jang êbeh 5.000ha. Hlăm anăn mâo lu klei bi hmô jăk hlăm bruă duh mkra pla mjing mâo ba wĭt leh đa đa mơ̆ng 500 êklăk prăk truh 1 êklai prăk/thŭn, boh nik bruă pla mjing boh durian mâo truh 2 êklai prăk/thŭn. Mbĭt hŏng bruă pla mjing, rông mnơ̆ng ăt jing bruă mâo klei găl prŏng mơh hlăm să Lộc Nam msĕ si bruă rông bê, êmô, ŭn hŏng ênoh truh giăm 3.400 drei lehanăn mnŭ ada truh 34.000 drei, mbĭt hŏng bruă rông kan hdang djăp mta mơh.

 Năng mđing êdi jing, Lộc Nam mâo mkŏ mjing leh lu hdră bi hgŭm kjăp klei duh mkra dơ̆ng mơ̆ng phŭn rŭ mkra pla mjing hlŏng truh kơ klei kăp hrui blei boh mnga mnơ̆ng dhơ̆ng, lehanăn mjing leh ênoh mâo ba wĭt kơ mnuih ƀuôn sang hŏng klei hơĭt kah knar ară anei jing êbeh 45 êklăk prăk/čô/thŭn. Kyuanăn, bruă bi hrŏ ƀun hŏng klei kjăp mâo leh boh tŭ dưn klă mngač, mơ̆ng 30% ênoh gŏ êsei ƀun hlăk thŭn 2015 truh kơ knhal jih thŭn 2022 knŏng adôk 6%.

 K’Châu, mnuih djuê ana K’ho ti alŭ mrô 3, să Lộc Nam lač, mâo hĕ klei tŭ dưn msĕ si ară anei kyua mâo Đảng lehanăn knŭk kna mđing uêñ hŏng dŭm hdră lăn čar kñăm mđĭ kyar klei hdĭp mda ala ƀuôn, bi hrŏ ƀun hŏng klei kjăp, lehanăn mkŏ mkra krĭng ƀuôn sang mrâo mjing leh boh kdrŭt đru mnuih ƀuôn sang bi mlih klei mĭn, mâo klei thâo săng jhŏng ba yua klei kreh knhâo hlăm bruă duah ƀơ̆ng, mđĭ kyar klei hdĭp mda pô, K’Châu, lač:

 “Klei hdĭp mda mnuih ƀuôn sang ară anei mâo leh klei bi mlih prŏng êdi. Êlâo dih đĭ êdeh wai, ară anei grăp boh sang tloh blei leh êdeh p’phŭt, mâo sang đa đa tloh blei leh mơh êdeh ôtô truh mơ̆ng 500 – 700 êklăk prăk. Lehanăn sang mdhă, sang hlang mtih kđuh, ară anei mâo bi mlih leh hŏng sang simăng kjăp, đa sang dlông tal. klei bi mlih anei mâo klei đĭ hĭn êdi hlăm dŭm thŭn giăm anei. Kyua mnuih ƀuôn sang dơ̆ng thâo leh hlăm klei duh ƀơ̆ng, pla mjing lehanăn rông mnơ̆ng, boh nik mlih ana mnơ̆ng pla mâo ênoh hĭn. klei hdĭp mnuih ƀuôn sang mâo leh klei đĭ kyar, hơĭt kjăp hĭn leh”.

Amâo mâo djŏ knŏng mđĭ kyar klei hdĭp mda, ƀiădah bruă kđi čar lehanăn bruă răng mgang klei êđăp ênang ti să Lộc Nam mâo păn kjăp. Boh nik mnuih ƀuôn sang thâo bi mguôp lehanăn thâo dưn yua mơ̆ng krĭng phŭn krŭ kdơ̆ng êlâo dih, mâo leh klei bi mguôp kjăp plah wah mnuih djuê lar hŏng mnuih djuê ƀiă, klei bi khăp hlăm ƀuôn sang đĭ hĭn.

 Tui si Võ Thiên Bình, Khua să Lộc Nam, dơ̆ng mơ̆ng leh tŭ yap jing să djăp ênoh čuăn mkŏ mkra krĭng ƀuôn sang mrâo hlăm thŭn 2020, Lộc Nam čoh čuăn leh bruă phŭn jing mđĭ hĭn ênoh čuăn kčah. Čiăng dưi ngă klei anei snăn phung   đảng viên, knuă druh bruă mặt trận lehanăn jih jang djăp êpul êya bruă čŏng bi mguôp ngă bruă hŏng ai tiê kjăp, mâo klei thâo săng mlih knhuah mĭn, hdră êlan ngă bruă hlăm mnuih ƀuôn sang, boh nik hŏng mnuih djuê ƀiă. Võ Thiên Bình, lač:

 “Hlăm jih jang bruă bi mguôp, mkŏ mjing dŭm êpul bi hgŭm kăp hrui blei boh mnga, đru kơ mnuih ƀuôn sang hơĭt klei hdĭp mda.lehanăn đru kơ klei duh mkra ti alŭ wăl, hlăm anăn mâo mnuih djuê ƀiă mâo klei bi mlih sĭt. Mphŭn dôk adôk klei bhiăn hđăp hdĭp knŏng tui hlue hŏng yan adiê čŏng jing, ƀiădah ară anei mnuih pla mjing mâo hdră êlan kreh knhâo hĭn leh ba wĭt leh boh mnga đĭ. Klei anei brei ƀuh mnuih ƀuôn sang mâo leh klei bi mlih hlăm klei mĭn jing yuôm bhăn êdi”.

Mbĭt hŏng klei lŏ bi mlih jih jang bruă nah gŭ hlăm krĭng ƀuôn sang, Lộc Nam hlăk dôk mđĭ kyar bruă duh mkra tui tiŏ hdră êlan duah mnơ̆ng čhĭ mnia, mâo ba yua klei kreh knhâo hlăm klei duh mkra pla mjing hŏng kdrăp mrâo mrang, mbĭt anăn mâo klei bi hgŭm hlăm jih jang bruă ngă mơ̆ng klei duh mkra hlŏng kơ čhĭ mnia boh mnga. Anei jing klei bi mlih prŏng leh êdi hlăm mnuih ƀuôn sang, mbĭt hŏng klei đua klam prŏng mơ̆ng jih jang bruă kđi čar, sĭt nik Lộc Nam srăng pral jing krĭng ƀuôn sang mrâo ti hnơ̆ng prŏng hĭn hlăm thŭn 2024 mâo bi leh yơh hdră čuăn kčah./.