Anei jing gưl tal êlâo hĭn amai Nguyễn Thị Ngọc Lan mbĭt hŏng phung tuê hiu čhưn ênguê mơ̆ng ƀuôn prŏng Hồ Chí Minh lông ngă hdră “Đĭ čư̆ mă buit” ti kdriêk Lăk, čar Dak Lak. Êlan êbơr, đĭ čư̆, wăl dliê mtah, ênai čim čap, ênai hnoh êa leh anăn klei hơ̆k mơak dưi đru leh kơ amai leh anăn kluôm êpul dưi đĭ truh kơ čŏng čư̆ Yang Lăk, jing sa hlăm dŭm čŏng čư̆ dlông hĭn hlăm duôr Čư̆ Yang Sin. Amai Nguyễn Thị Ngọc Lan brei thâo, anei jing klei hiu čhưn ênguê jăk êdi. Kyuadah yăng đar pô mĭn amâo srăng dưi đĭ čŏng čư̆ dlông msĕ sơnei ôh, ƀiădah mâo klei gĭr. Nao ti krah êlan ăt êmăn mơh, ƀiădah čŏng mđĭ ai pô dôk sa mmông đuč srăng truh yơh. Đĭ truh ti nei pô ƀuh êwa êđăp, dôk ti gŭ dih amâodưi ƀuh klei siam msĕ sơnei ôh. Hmei dôk ti ƀuôn prŏng dih ka tuôm ƀuh ôh ana kyâo lu msĕ sơnei.

Đĭ čư̆ mă buit jing 1 hlăm 2 mnơ̆ng jăk yâo mơ̆ng Y-Xim Ndu, sa čô êkei êdam mnuih djuê ana Mnông ti ƀuôn Yuk La 1, să Dăk Liêng, kdriêk Lăk, čar Dak Lak, mơ̆ng hruê ayŏng čô̆ kơ bruă hŏng bruă hiu čhưn ênguê. Mnơ̆ng jăk yâo mơ̆ng Y-Xim jing hdră ktuê dlăng klei hdĭp, dhar kreh dŭm ƀuôn êlan jŭm dar ênao Lăk. Y-Xim Ndu brei thâo, ayŏng mklin jih ai tiê kơ 2 tour ktuê dlăng wăl hdĭp mda leh anăn ƀuôn sang. Khădah mâo wưng tŭ klei hmăi kjham mơ̆ng klei ruă tưp, ƀiădah truh kơ ară anei, Knơ̆ng bruă duh mkra mnia mblei bruă hiu čhưn ênguê mơ̆ng ayŏng mkŏ mjing dưi mâo leh eneoh tuê hiu čhưn ênguê hơĭt. Kâo mđĭ kyar hluê êlan bruă hiu čhưn ênguê nao mbĭt hŏng răng mgang wăl hdĭp mda leh anăn kriê pioh dhar kreh yang ƀuôn alŭ wăl. Êdei anăp tơdah đĭ kyar jăk srăng mđĭng truh kơ phung tuê hiu čhưn ênguê mơ̆ng ala tač êngao ti Việt Nam. Klei kâo hmăng hmưi jing hdră anăn srăng mkŏ mjing klei đăo knang, boh kdrŭt kơ phung mda asei kơ klei čô̆ kơ bruă, boh nik jing phung mda asei mnuih djuê ƀiă msĕ hŏng kâo, dưi thâo săng klă klei yuôm bhăn, boh tŭ dưn mơ̆ng bruă duh mkra nao mbĭt hŏng bruă kriê pioh leh anăn bi lar knhuah dhar kreh djuê ana pô.

Ăt čô̆ kơ bruă ti krĭng čư̆ čhiăng Dak Lak, ƀiădah amai Chu Thị Lan, ti să Ea Kly, kdriêk Krông Pač, dưi tŭ jing hŏng bruă amâo mâo mĭn ôh jing klei găl, anăn jing kriê dlăng klei suaih pral. Mta mnơ̆ng dhơ̆ng čê êa drao leh anăn kpung bi msiam Lanchans mơ̆ng amai mđĭ kyar dưi lông čhĭ leh anăn êjai nao hlăm klei bi lông dưi mâo mă klei pah mni kdlưn hĭn hlăm klei bi lông čô̆ kơ bruă hŏng klei mlih mrâo leh anăn mbruă ti čar Dak Lak. Hluê si amai Chu Thị Lan, klei bi lông čô̆ kơ bruă mơ̆ng čar mkŏ mjing jing wưng yuôm bhăn čiăng amai dưi leh mnơ̆ng dhơ̆ng hŏng klei mĭn mnia mblei, hluê anăn dưi bi hrŏ hdră ba mnơ̆ng dhơ̆ng truh kơ phung blei ba yua:Hdră mkŏ mjing dŭm mmông mtô mjuăt bi hriăm jing jăk êdi, čiăng kơ bi hơĭt, dưn yua hlăm klei mnia mblei pô. Hlăm klei bi lông anăn pô mâo klei găl bi tuôm hŏng lu phung duh bi liê. Klă sĭt boh klei djŏ tuôm hŏng klei suaih pral ăt mâo lu phung uêñ mĭn leh anăn mâo klei myun hlăm klei bi lông anăn mâo lu phung duh bi liê uêñ mĭn leh anăn bi êdah čiăng bi mguôp hlăm mgi dih.

Mbĭt hŏng bruă tui duah tŭ jing dŭm hdră ngă bruă mdê hjăn msĕ si ayŏng Y-Xim Ndu leh anăn amai Chu Thị Lan, êpul êya čô̆ kơ bruă ti čar Dak Lak ăt mkŏ hŏng dŭm êpul bruă čiăng mđĭ ai ktang, dưi ngă dŭm mta kñăm prŏng. Hluê si ayŏng Phạm Hoài Nguyên Anh, Khua kiă kriê Êpul hgŭm bruă duh bi liê leh anăn čô̆ kơ bruă (Êpul hgŭm phung mnia mblei mda asei čar Dak Lak), êjai bi mguôp hdơ̆ng pô, phung starup dưi ƀuh lu klei găl kơ dŭm hdră čô̆ kơ bruă mơ̆ng pô:Čiăng bi klă leh anăn bi tŭ dưn hĭn, Êpul hgŭm bruă duh bi liê leh anăn čô̆ kơ bruă phung mda asei srăng ngă hdră sa čô nao mbĭt hŏng sa čô. Ară anei, ăt dưi mkŏ hŏng dŭm mta mnơ̆ng dhơ̆ng mơ̆ng diñu msĕ si kan hlăng, boh durian, êa prăi. Phung anăn jing phung hgŭm hlăm êpul hgŭm bruă duh bi liê leh anăn čô̆ kơ bruă phung mnia mblei mda asei, dôk hlăm hdră ngă bruă mơ̆ng Êpul hgŭm bruă duh bi liê leh anăn čô̆ kơ bruă gưl dlông Phung mnia mblei mda asei Việt Nam. Êpul hgŭm bruă mâo bruă ngă msĕ sĭ mkŏ, kah mbha, hluê hriăm leh anăn mnia mblei. Êngao kơnăn, mâo adŭ bruă, mâo anôk mă bruă amâo mâo mă prăk, mâo mnơ̆ng yua čiăng kơ diñu dưi hluê ngă dŭm mta bruă duh mkra grăp hruê.

Găn hgao klei lông dlăng mơ̆ng klei ruă tưp, hdră čô̆ kơ bruă ti čar Dak Lak ăt mâo lu klei bi knăl jăk mơ̆ng Êpul êya čô̆ kơ bruă ti alŭ wăl. Amâo mâo hluê êlan arăng nao êlâo amâodah ênoh lu, phung mda asei dưi čuăn ruah dŭm hdră êlan mdê hjan leh anăn dưi klă dŭm klei hmăng hmưi. Dŭm gưl bruă sang čư êa, êpul phung mnia mblei hlăm čar ăt lŏ dơ̆ng mâo dŭm bruă ngă mkŏ mjing boh kdrŭt kơ phung čô̆ kơ bruă, đru kơ wăl čô̆ kơ bruă ƀrư̆ hruê ƀrư̆ lu jơr leh anăn êlam hĭn.