Dua mjeh mnơ̆ng rông čiăng mđĭ prăk hrui wĭt, êbeh 4 thŭn êlâo, đảng viên mda asei Ly Seo Lử ti alŭ knông lăn Lũng Pô, să A Mú Sung, kdriêk Bát Xát blei leh 100 phŭn boh xoai ba pla ti lăn čư̆ gŏ sang. Ñu ăt mtrŭt mjhar mnuih ƀuôn sang hlăm alŭ pla čiăng mjing krĭng mnơ̆ng dhơ̆ng. Ayŏng Lý Seo Lử, alŭ Lũng Pô, să A Mú Sung, kdriêk Bát Xát brei thâo:Pla mtei snăn khăng mâo mnơ̆ng ngă, ana hbei ƀlang leh pla lu thŭn snăn lăn sah kba anăn kâo ba pla ana boh kroh, tinei jing ana boh xoai. Tal êlâo ana adôk điêt, pô kriê dlăng, ƀiădah mơ̆ng thŭn tal 3 ana mâo klei tŭ dưn.

Ma Seo Lằng, Khua dlăng bruă Đảng alŭ Lũng Pô, să A Mú Sung brei thâo, ênhă boh xoai ti alŭ ti 4 ha. Hlăm anăn mâo ênhă mphŭn hrui pĕ boh thŭn tal sa, tal dua leh anăn boh xoai srăng jing ana phŭn čiăng mđĭ kyar bruă duh mkra mơ̆ng alŭ.Mâo klei mđing dlăng mơ̆ng să srăng ba ana boh xoai Lũng Pô hlăm OCOP mơ̆ng să A Mú Sung. Kâo lač anei ăt jing sa ana msir klei ư̆ êpa, bi hrŏ klei ƀun knap hơĭt kjăp ti alŭ Lũng Pô.

Hŏng klei čang hmăng mjing klei êdah kdlưn hlăm klei mđĭ kyar bruă duh mkra ti alŭ wăl, 2 thŭn êlâo, Chảo Láo Tả, K’iăng Khua Êpul hgŭm ƀĭng ngă lŏ hma să Dền Sáng ti 1 hlăm 10 gŏ êsei mnuih ƀuôn sang ba anăp hlăm hdră pla boh čêñ hruê̆. Anăp anei, pra boh čêñ hruê đru kơ gŏ sang ayŏng Tả mâo thiăm prăk hrui wĭt.Ba anăo leh anăn lông pla 40 phŭn. Tal êlâo brei prăk hrui wĭt giăm 10 êklăk prăk. Ăt čang hmăng mnuih ƀuôn sang hlăm să leh anăn dŭm să mkăn tơdah klei găl yan adiê djŏ guôp snăn ana anei srăng jing ana phŭn čiăng msir klei ư̆ êpa, bi hrŏ klei ƀun knap, mđĭ kyar hơĭt kjăp.

Ayŏng Tẩn Láo Tả, alŭ Nậm Giàng, să Dền Sáng, kdriêk Bát Xát ăt čiăng tui hriăm gru hmô anei čiăng yan pla mrâo mđĭ ênoh phŭn čêñ hruê, mđĭ prăk hrui wĭt gŏ sang.

Gŏ sang kâo snăn gưl anăn čih anăn pla ƀiădah pla ƀiă. Gưl anei ăt čiăng hiu dlăng dŭm gŏ êsei pla lu snăn klei đĭ kyar ana si ngă leh anăn kâo čiăng gŏ sang kâo pla thiăm 3-400 ana dơ̆ng čiăng mđĭ kyar prăk hrui wĭt kơ gŏ sang.

Ti Bát Xát, êngao kơ mđĭ ai hdră mkŏ mkra bruă duh mkra, msir klei ư̆ êpa, bi hrŏ klei ƀun knap, dŭm đảng viên ăt bi hmô ba anăp hlăm bruă hâo hưn, mtrŭt mjhar, đru mguôp čiăng mkŏ mkra krĭng ƀuôn sang mrâo. Msĕ si đru gŏ êsei ƀun ngă sang, sang tlô amâodah đru mkra êlan… Khua dlăng bruă Đảng să Trịnh Tường: Lầu A Páo ngă leh anăn dôk đru ba Hdră mkŏ mkra krĭng ƀuôn sang mrâo tinei mâo klei êdah kdlưn. Amai Tẩn Lở Mẩy ti alŭ Nà Đoong brei thâo:Sang hđăp kâo ti adih ñu tĭ rưč jih leh. Mâo ayŏng Páo hriê dlăng ƀuh sang kâo tĭ anăn ba kơ kâo sang điêt anei. Kâo mơak snăk.

 Giàng A Sáo leh anăn amao Tẩn Lở Mẩy ti alŭ Nà Đoong knŏng jing dua hlăm ênoh dŭm gŏ êsei ƀun hlăm să Trịnh Tường dưi đru ngă sang mrâo. Leh anăn dưi ngă klei anăn, khua dlăng bruă Đảng să Lẩu A Páo mâo lu klei đru mguôp.Kâo hŏng phung knuă druh să nao ktuê dlăng dŭm gŏ sang ƀun čiăng mâo rup klă sĭt kơ klei hdĭp mnuih ƀuôn sang, mơ̆ng anăn kyua klei đru mơ̆ng dŭm êpul, anôk bruă duh mkra đru mkŏ mjing pưk sang kơ mnuih ƀuôn sang.

Thâo săng klei găl bruă duh mkra lu mnuih ƀuôn sang hlăm să adôk dleh dlan, bruă mkŏ mjing sa boh sang siam kjăp pioh dôk, amâodah dưi ngă sa ktuê êlan găl ênưih găn êrô amâo ênưih ôh. Khua dlăng bruă Đảng să Lầu A Páo bi hmô, ba anăp đru mguôp, iêô jak dŭm anôk bruă duh mkra nao ai mkŏ mkra krĭng ƀuôn sang mrâo. Ayŏng Lý Xá Xe, K’iăng Khua bruă mtrŭt mjhar să Trịnh Tường, kdriêk Bát Xát bi mklă:Hŏng dŭm gŏ êsei dleh dlan kơ bruă duh mkra, snăn Páo mtrŭt mjhar phung mâo ai tiê kmah, anôk bruă duh mkra ti alŭ wăl leh anăn êngao alŭ wăl đru kơ dŭm gŏ sang mkŏ mjra pưk sang prŏng siam, djăp hnơ̆ng čuăn krĭng ƀuôn sang mrâo

Mđĭ lar bruă klam ba anăp, phung đảng viên mơ̆ng bruă Đảng Bát Xát klă sĭt jing phung mđĭ ai hlue ngă hdră bi mlih bruă duh mkra ti alŭ wăl. 4.440 čô Đảng viên hlăm jih bruă Đảng bộ srăng jing êpul phŭn čiăng hlue ngă hdră kñăm prŏng mơ̆ng kdriêk hlăm thŭn 2022 leh anăn kơ jih wưng./.