Mrâo anei, Êpul gơ̆ng bi klă, mbha gưl mnơ̆ng dhơ̆ng OCOP čar Daklak bi klă leh hră anăn 25 mta mnơ̆ng dhơ̆ng mâo ênŭm hnơ̆ng čuăn OCOP 3 mtŭ, 4 mtŭ gưl čar hlăm thŭn 2022 hlăm hdră grăp să sa mnơ̆ng dhơ̆ng wưng thŭn 2021 – 2025, mđĭ ênoh mnơ̆ng dhơ̆ng OCOP ti alŭ wăl anei đĭ 143 mnơ̆ng dhơ̆ng.

Hlăm ênoh 25 mnơ̆ng dhơ̆ng OCOP mrâo tŭ yap gưl anei mâo 7 mnơ̆ng dhơ̆ng OCOP 4 mtŭ leh anăn 18 mnơ̆ng dhơ̆ng 3 mtŭ. Dŭm mta mnơ̆ng dhơ̆ng ênŭm hnơ̆ng čuăn OCOP srăng mâo bruă sang čư êa čar Dak Lak mkăp brei hră tŭ yap, dưi yua anăn knăl bi klă mnơ̆ng dhơ̆ng OCOP Việt Nam leh anăn mtŭ kđăm hlăm hruh mnơ̆ng dhơ̆ng hluê si klei čuăn. Boh tŭ klei tŭ yap mbha gưl mâo ênoh hlăm 3 thŭn.

Čiăng mđĭ ênoh mnơ̆ng dhơ̆ng boh mnga bruă lŏ hma alŭ wăl, hlăm wưng kơ anăp, čar Dak Lak lŏ dơ̆ng đru kơ phung pô mnơ̆ng dhơ̆ng OCOP mđĭ hnơ̆ng tŭ jăk, đru kơ dŭm knơ̆ng bruă, êpul hgŭm bruă mkŏ klei mkăp brei, klei ba čhĭ, tui duah ƀĭng hgŭm mnia mblei, pŏk phai anôk mnia mblei. Huỳnh Ngọc Dương, k’iăng khua knơ̆ng bruă tuh tia čar Dak Lak brei thâo: “Dŭm mta mnơ̆ng dhơ̆ng nao hgŭm dưi mâo klei đru mơ̆ng alŭ wăl. Tal 2 jing dŭm mnơ̆ng dhơ̆ng mâo OCOP 3 – 4 mtŭ hmei mâo dŭm hră mơar bi trông kơ dŭm knơ̆ng bruă tuh tia dŭm alŭ wăl hlăm kluôm lăn čar leh anăn dŭm anôk bruă mtrŭt mđĭ klei mnia mblei mơ̆ng knơ̆ng bruă tuh tia anăn mkŏ mjing klei găl čiăng mkŏ hŏng klei ba čhi ti dŭm anôk čhĭ mnia alŭ wăl čiăng mtrŭt mđĭ klei blei ba yua”.

Hruê 14/8 mrâo êgao, adŭ bruă gĭt gai hdră mkŏ mkra krĭng ƀuôn sang mrâo čar Dak Lak mkŏ mjing klei kƀĭn trông hâo hưn, hluê ngă hdră grăp să sa mnơ̆ng dhơ̆ng thŭn 2023.

Klei kƀĭn trông bi klă dŭm mnơ̆ng dhơ̆ng OCOP dưi hmar bi klă kơhưm, mâo anôk mnia mblei tŭ drông, đru kơ ƀĭng ngă lŏ hma pŏk mlar hnơ̆ng mkra mjing, mđĭ ênoh mnơ̆ng dhơ̆ng, mơ̆ng anăn đru mkŏ wĭt bruă duh mkra, mđĭ hnư hrui wĭt, klei hdĭp mnuih ƀuôn sang leh anăn hluê ngă tŭ dưn êpul klei čuăn “Bruă duh mkra leh anăn mkŏ mjing klei mă bruă” hlăm êpul hnơ̆ng čuăn lăn čar kơ să krĭng ƀuôn sang mrâo.

Êngao kơ dŭm boh tŭ dưn dưi mâo, hdră OCOP ti čar Dak lak ăt dôk mâo dŭm klei êdu kƀah msĕ si: hdră êlan đru kơ phung pô mnơ̆ng dhơ̆ng OCOP dôk ƀiă, hnơ̆ng mkra mjing mnơ̆ng dhơ̆ng OCOP dôk điêt, bruă mtrŭt mđĭ klei mnia mblei dôk hliê hluôt, amâo mâo hrăm mbĭt, ka mâo ôh klei kruăk kdlưn hĭn čiăng mkŏ mjing rup, ênoh mnia mblei.

Hlăm klei kƀĭn trông, phung bi ala dưi mâo klei hưn kơ klei čih “Grăp să sa mnơ̆ng dhơ̆ng, klei hrăm hlăm lăn čar leh anăn tar rŏng lăn kơ klei mđĭ kyar bruă duh mkra krĭng ƀuôn sang”, “Dŭm klei hriăm leh 5 thŭn hluê ngă hdră OCOP ti čar dak Lak”, “Boh sĭt hdră OCOP”. Bruă klam mơ̆ng bruă kđi čar hlăm bruă hluê ngă hdră OCOP. Klei hriăm, hdră êlan kñăm hlăm wưng thŭn 2023 – 2025.”

Blŭ hrăm hlăm klei kƀĭn, Nguyễn Thiên Văn, k’iăng khua bruă sang čư êa čar Dak Lak mñă klă, hŏng hdră tă “Hnơ̆ng tŭ jăk mkŏ mjing anăn knăl”, mbĭt hŏng klei gĭr mơ̆ng grăp pô mnơ̆ng dhơ̆ng, mñă kơ dŭm knơ̆ng, dhar bruă, alŭ wăl uêñ mĭn hĭn kơ dŭm hdră êlan đru kơ phung pô mnơ̆ng dhơ̆ng OCOP, boh nik jing mđĭ ai dưi kriê dlăng, mkra mjing leh anăn čhĭ mnia mnơ̆ng dhơ̆ng.Klei nao hgŭm mơ̆ng gưl bruă Đảng nah gŭ, bruă sang čư êa hlăm bruă đru kơ phung pô mnơ̆ng dhơ̆ng, ăt msĕ hŏng mđĭ kyar dŭm mnơ̆ng dhơ̆ng mâo klei găl hlăm alŭ wăl leh anăn mđĭ kyar anôk mnia mblei čiăng kơ mnơ̆ng dhơ̆ng mâo anôk dôk leh anăn mkŏ mjing lu klei găl mđĭ kyar bruă duh mkra ala ƀuôn kơ mnuih ƀuôn sang hlăm bruă mgaih msir bruă mă, hnư hrui wĭt”.

K’iăng khua bruă sang čư êa čar Dak Lak ăt mñă kơ dŭm anôk bruă djŏ tuôm kñăm mtô lač, đru kơ dŭm mnơ̆ng dhơ̆ng bi klă hlăm hdră OCOP mơ̆ng dŭm kdriêk, wăl krah, ƀuôn prŏng hlăm thŭn 2023 hluê si hnơ̆ng čuăn mrâo mơ̆ng Klei čoh čuăn OCOP lăn čar, mjêč mkŏ mjing dŭm adŭ mtô bi hriăm kơ knuă druh kriê dlăng hdră OCOP dŭm gưl leh anăn phung pô mnơ̆ng dhơ̆ng nao hgŭm kơ hdră mkra mjing, mkŏ mjing hdră mnia mblei, mkŏ mjing anăn knăl, marketing leh anăn hưn mdah, mđĭ kyar mnơ̆ng dhơ̆ng kơ dŭm anôk mkra mjing nao hgŭm hdră OCOP thŭn 2023, mđĭ hĭn bruă hâo hưn kơ Hdră OCOP.