Lu mnơ̆ng OCOP mơ̆ng mơ̆ng Dak Lak mâo mđĭ leh hnơ̆ng kjăp dưi bi êdah leh klei jăk, mâo k’hưm leh amâo mâo djŏ knŏng hŏng mnuih blei yua hlăm ala čar đuič ôh, ƀiădah kpưn đuĕ nao leh truh hŏng arăng tač êngao. Msĕ si mnơ̆ng OCOP djăp ênoh čuăn 5 mtŭ jing asăr măkka Daklak jăk êdi mơ̆ng knơ̆ng bruă Damaca Nguyên Phương, kdriêk Krông Hnang. Dưi găn leh dŭm klei dleh dlan tal êlâo, hŏng klei pô gĭr, thŭn 2021, mnơ̆ng mkra mjing mơ̆ng asăr mắc ca Dak Lak jăk mơ̆ng mơ̆ng knơ̆ng bruă djăp leh ênoh čuăn OCOP 4 mtŭ. 3 thŭn êdei kơ anăn, lŏ găn lu gưl ksiêm bi mklă hŏng klei čoh čuăn prŏng, ară anei, mnơ̆ng mkra mjing anei dưi mâo leh puăng prŏng hĭn 100/100 mtam, lehanăn jing leh mnơ̆ng yuôm bhăn mâo 5 mtŭ mơ̆ng čar. Tui si aduôn Nguyễn Thị Thu Phương, khua knơ̆ng bruă Damaca Nguyên Phương, mơ̆ng leh mnơ̆ng djăp ênoh čuăn OCOP 4 mtŭ, snăn anôk čhĭ mnia dơ̆ng pŏk mlar.

 “Mnơ̆ng mơ̆ng Damaca Nguyên Phương mâo čhĭ leh sơăi truh hlăm 47 čar, ƀuôn ptŏng ti ala čar Japon. Bi ti Dhŭng Korea mâo ba leh mnơ̆ng lông ba čhĭ ti ala čar anăn tal êlâo. Ară anei ăt hlăk dôk mă bruă hŏng dŭm ala čar mâo klei bi mnia mblei prŏng msĕ si China, lehanăn hlăm dŭm ala čar ti Arâp snăn čang hmăng hlăm wưng tinăp srăng mâo lu klei bi knăl jăk mơ̆ng dŭm ala čar čhĭ mrâo”.

 Ăt jing 1 hlăm dŭm mta mnơ̆ng djăp ênoh čuăn 5 mtŭ ti Daklak, mâo bi mklă hŏng ênoh čuăn OCOP gưl dlông anăp anei, msĕ si kphê eh mja Kiên Cường mơ̆ng knơ̆ng bruă Kiên Cường, ɃP. Ƀuôn Ama Thuôt, čar Daklak mâo nanao leh klei bi mjăp mnơ̆ng pô. Kphê anei mâo tŭ yap leh ênoh čuăn OCOP 4 mtŭ mơ̆ng hlăk thŭn 2021. Hŏng klei dôk čiăng jing jăk hĭn, tui si mnuih blei yua akâo, snăn anôk duh mkra lŏ mlih mrâo hdră mkra mjing čiăng bi jăk hĭn djăp ênoh čuăn pioh čhĭ kơ ala tač êngao. Hoàng Mạnh Cường, khua anôk bruă duh mkra lač, kphê eh mja Kiên Cường mâo čhĭ leh kơ dŭm ala čar Japon, Dhŭng Korea, Philipin lehanăn Australia.

 “Ƀrư̆ hrue ƀrư̆ pô ngă jăk hĭn čiăng dưi mâo anôk čhĭ mnia jăk, lehanăn mâo mnuih blei yua tui duah lu hĭn. Tal dua, hlăm klei bi mnia mblei ară anei mnuih blei tui duah mnơ̆ng jăk jing lu hĭn. Mâo tŭ yap djăp ênoh čuăn OCOP, bi knăl hŏng anôk mnia mblei klă mngač hĭn, lehanăn mâo nanao klei ƀuăn ba djăp mnơ̆ng lehanăn jing mnơ̆ng jăk hĭn nanao hŏng mnuih blei yua khăp. Mơ̆ng anăn anăp srăng dưi mâo dŭm ala čar prŏng blei lu hĭn mơh”.

Dak Lak ară anei mâo 237 mta mnơ̆ng djăp ênoh čuăn OCOP mơ̆ng 3 - 4 mtŭ, 2 mta mnơ̆ng mâo klei găl djăp ênoh čuăn 5 mtŭ. Tui si Nguyễn Hoài Dương, Khua knơ̆ng bruă lŏ hma čar, anei jing ênoh ƀiă êdi, hŏng sa boh čar mâo klei găl kơ bruă pla mjing, bruă mơ̆ng krĭng ƀuôn sang msĕ si ti Daklak. Čiăng dưi dưn yua jih klei găl pô, wưng tinăp, knơ̆ng bruă lŏ hma srăng hgŭm hŏng dŭm dhar bruă djŏ tuôm mkra mjing mnơ̆ng djăp ênoh čuăn OCOP bi mđĭ hĭn hnơ̆ng jăk pô mkra mjing, lehanăn mâo nanao mta mnơ̆ng mrâo mơ̆ng boh mnga mnơ̆ng pla mjing, mâo klei mkra mjing jăk, lehanăn anăp duah anôk mnia mblei hơĭt, pŏk nanao êlan kơ mnơ̆ng OCOP truh ti gưl ala čar.

 “Knơ̆ng bruă lŏ hma mâo nanao hdră êlan mbĭt hŏng dŭm alŭ wăl bi đru, čiăng dưi jing alŭ wăl duh mkra truăn sa anôk, lŏ mkŏ wĭt bruă pla mjing tui tiŏ ênoh čuăn, mâo klei bi klă kơ phŭn agha anôk pla mjing, djăp hnơ̆ng čuăn doh, răng mgang wăl hdĭp mda, djŏ hŏng klei čoh čuăn mơ̆ng dŭm ala čar mâo klei bhiăn doh prŏng msĕ si Japon, lehanăn ti Ơrôp”.

            Drei dưi ƀuh tơdah jih jang mnơ̆ng djăp ênoh čuăn OCOP sĭt nik Daklak êjai knŏng duh mkra pla mjing mil hlăm hjăn hlăm čar, ară anei hlăk hlê dưi hđuh đuĕ nao truh kơ dŭm ala čar dlông rŏng lăn, hŏng lu klei hmăng hmưi, hŏng dŭm mta boh mnga jăk êdi msĕ si kphê, tiu, cacao, braih mdiê, makka... Tơdah leh djăp ênoh čuăn 5 mtŭ sĭt nik srăng dưi dưn yua jih yơh klei găl mơ̆ng klei kuôl kă duih mkra mnia mblei gưl ênuk mrâo êjai Việt Nam dôk hgŭm lehanăn tui tiŏ hlăm klei bi mnia mblei hŏng ala tač êngao./.