Thŭn 2012, gŏ sang Ksor Dría, ti alŭ Plei Tal, să Ia Sol, kdriêk Phú Thiện jing gŏ sang ƀun, mâo dưn hdră mtrŭn đru mơ̆ng Knŭk kna. Jing sa čô đảng viên, ñu amâo mơak ôh hlăk mâo mă klei đru, mơ̆ng anăn, ñu gĭr bi mlih klei mĭn, hdră ngă. Leh kơnăn klei găl truh hlăk kdriêk pŏk ngă Hdră mtrŭn mơ̆ng Anôk dlăng bruă Đảng kdriêk kơ hdră ba yua kdrăp mrâo hlăm bruă pla mjing mđing truh kơ hdră mkŏ mkra anăn knăl “Braih Phú Thiện”. Lu klei bi kƀĭn dưi pŏk ngă, djăp klei mđing uêñ, klei êmuh kơ hdră ngă, boh tŭ ba wĭt dưi mblang klă klơ̆ng. Đảng viên, Khua ƀuôn, khua mduôn, mnuih mâo k’hưm ngă êlâo, mnuih ƀuôn sang hluê êdei. Ksor Dría pral nao čan prăk ti knơ̆ng prăk, ba yua hdră pla mdiê 2 yan ti ênhă lăn 1ha mơ̆ng gŏ sang. Leh lu thŭn ngă bruă pưk hma pla mdiê kuê, klei hdĭp gŏ sang tlaih leh kơ ƀun.

 “Čiăng tlaih klei ƀun, mkra mđĭ bruă duh mkra gŏ sang, kpưn đĭ hlăm klei hdĭp snăn grăp gŏ sang brei mâo klei sa ai thâo bi đru, amâo jưh knang lu đei ƀiădah brei čŏng pô gĭr ktưn kpưn đĭ hlăm hdră duh mkra pla mjing snăn kơh pô mâo mnơ̆ng ƀơ̆ng mnơ̆ng pioh, mkra pưk sang. Ăt lač jăk kơ Knŭk kna mâo klei mđing dlăng đru kơ mnuih ƀuôn sang bi mlih klei mĭn, hdră ngă, čiăng mă bruă ba wĭt boh tŭ dưn, mơ̆ng anăn đru kơ mnuih ƀuôn sang kpưn đĭ kyar bruă duh mkra.

Giăm 70 thŭn siă suôr hŏng ƀuôn sang, ana mdiê, hbei ƀlang đru leh kơ gŏ sang A Nghiêm să Ia Yeng, kdriêk Phú Thiện, Gia Lai mâo mnơ̆ng ƀơ̆ng, mnơ̆ng pioh. Ƀiădah êbeh pluh thŭn hŏng anei, pưk hma hđăp jing leh kdrăn mdiê 2 yan mboh lu, bruă duh mkra đĭ kyar klă sĭt. A Nghiêm juăt mưng leh hŏng klei tĭng ênoh bi liê lehanăn prăk mnga mâo:

 “Êlâo adih pla mdiê lŏ hnơ̆ng mâo boh mnga ƀiă snăk kyua mnuih ƀuôn sang pla mjing rah rưng, ka thâo ba yua kdrăp mrâo, ka thâo ruah mjeh, lehanăn ênôk hrui blei amâo h’ĭt kjăp. Ƀiădah ară anei jăk găk leh, dưi pla ti sa krĭng lăn prŏng, ba yua kdrăp mrâo, mâo lu mjeh mrâo kyua anăn hnơ̆ng tŭ jăk dưi mkra mđĭ klă sĭt mơh”.

Leh boh boh tŭ klă sĭt, mdiê mboh ksă kñĭ hưr ti lŏ, mnuih ƀuôn sang đăo knang lehanăn bi pla mdiê, mơ̆ng anăn lŏ mâo lu kdrăn mdiê prŏng. Dŭm gŏ sang mơ̆ng alŭ să thâo bi mguôp mbĭt, ba yua kdrăp mrâo hlăm hdră pla mjing mdiê lŏ. Amâo lŏ dôk boh klei hlei thâo hlei ngă. Mơ̆ng anăn, hnơ̆ng mâo mdiê dưi mđĭ, lu gŏ sang mâo 7,5 – 8 ton/ha. Rmah Dmeo ƀuôn RBai, să Ia Piar, kdriêk Phú Thiện, brei thâo:

 “Ară anei ngă bruă mdê mkă hŏng êlâo, hlăm lŏ hma ba yua maĭ mŏk jih leh, mnuôr êa dưi rơ̆ng mâo djăp êa kơ lŏ, êlâo adih mă bruă hŏng jơ̆ng kngan suaĭ snăk, ară anei bi êran maĭ mŏk snăn ngă bruă kơ dul ƀiă mơh klei suaĭ, knŏng drei gĭr đuič yơh, lehanăn ară anei mâo lu mta mjeh ba wĭt hnơ̆ng mâo boh mnga lu, kyua anăn pô dưi pla mjing hluê yan ba yua dŭm mta mjeh mdê mdê, êlâo adih ngă sa yan, ară anei jing 2 yan ngă bruă leh.

Hluê ngă Hdră mtrŭn mrô 05/2012 mơ̆ng Anôk bruă Đảng kdriêk Phú Thiện kơ bruă mtrŭt mđĭ klei ba yua kdrăp mrâo hlăm bruă pla mjing, mđing truh kơ hdră mkŏ mkra anăn knăl “Braih Phú Thiện”, grăp thŭn alŭ wăl mđing prăk đru kơ ƀĭng ngă lŏ hma, boh nik jing mnuih ƀuôn sang djuê ƀiă pŏk mlar ênhă kdrăn lŏ pla mdiê sa mjeh, hŏng mjeh mdiê mâo hnơ̆ng tŭ jăk. Leh 10 thŭn pŏk ngă Hdră mtrŭn mrô 05/2012 mơ̆ng Anôk bruă Đảng kdriêk, Phú Thiện dưi rŭ mdơ̆ng leh 18 kdrăn lŏ prŏng pla mdiê sa mjeh, hŏng ênhă giăm 700ha. Thŭn 2019, anăn knăl braih Phú Thiện mâo leh Knơ̆ng bruă Dưn yua klei mĭn mrâo (Phŭn bruă Kreh knhâo – kdrăp mrâo) mkăp hră bi mklă. Mơ̆ng anei, anăn knăl braih Phú Thiện klă klơ̆ng dưi răng mgang kluôm ala. Hluê Vũ Hồng Duy, K’iăng khua bruă Đảng kdriêk Phú Thiện, anăn knăl anei amâo djŏ knŏng bi mklă hnơ̆ng mâo boh mnga, hnơ̆ng tŭ jăk, boh tŭ bruă duh mkra, ƀiădah lŏ jing klei bi mjĕ mâo boh tŭ dưn hlăm boh yuôm mta mnơ̆ng anei.

 “Bi hgŭm hŏng dŭm anôk bruă duh mkra, bi hgŭm hŏng Êpul group Lộc Trời hlăm bruă mkŏ mkra anăn knăl Braih Phú Thiện, ăt msĕ hŏng bruă mđĭ kyar mjeh mdiê mâo hnơ̆ng tŭ jăk hlăm alŭ wăl kdriêk. Mơ̆ng anăn ăt hrui blei mdiê braih mâo hnơ̆ng tŭ jăk kơ mnuih ƀuôn sang, đru krơ̆ng kjăp hdră mđĭ kyar bruă duh mkra – ala ƀuôn hlăm kdriêk.

Mđĭ kyar anăn knăl mdiê braih ti kdriêk Phú Thiện, čar Gia Lai ăt jing sa ktuê êlan sui. Mâo nanao kdrăn mdiê lŏ mâo hnơ̆ng boh mnga lu, tŭ jăk dưi pla mjing. Dŭm kdrăn lŏ prŏng, pla mjing ba yua kdrăp mrâo, dôk dưi pŏk mlar, boh tŭ bruă čhĭ braih dưi mkra mđĭ… mơ̆ng anăn, mđĭ hnư hrui wĭt kơ mnuih ƀuôn sang ti dŭm krĭng ƀuôn êlan./.