Ară anei, krĭng mnuih djuê ƀiă lehanăn krĭng čư̆ čhiăng jing leh anôk dleh dlan hĭn hlăm kluôm ala. Dah tĭng hnơ̆ng kah knar hrui wĭt mơ̆ng grăp gŏ sang mnuih djuê ƀiă ti lu anôk knŏng knar 40 – 50%, ênoh mâo hrui wĭt hlăm kluôm alŭ wăl, ênoh mnuih djuê ƀiă jing truh 14,7% ƀiădah ênoh gŏ sang ƀun truh leh giăm 60% hlăm ênoh jih jang gŏ sang ƀun hlăm kluôm ala. Hŏng mta kñăm “Čiăng bi hrŏ êwang bi kpleh kơ hnơ̆ng klei hdĭp, ênoh mâo ba wĭt hlăm krĭng mnuih djuê ƀiă, lehanăn čư̆ čhiăng mkă hŏng ênoh kah knar kluôm ala, truh thŭn 2025 hrŏ truh mkrah ênoh să, ƀuôn dleh dlan hĭn, truh thŭn 2030 amâo lŏ mâo ôh să, ƀuôn dôk hlăm klei dleh dlan”, bruă kƀĭn ala mâo bi mklă leh ênoh bi liê jih jang êbeh 137 êbâo êklai prăk, pioh hlue ngă hdră ala čar kñăm mđĭ kyar klei duh mkra ala ƀuôn krĭng mnuih djuê ƀiă lehanăn krĭng čư̆ čhiăng wưng thŭn 20-21 – 2030, hŏng 10 mta bruă prŏng, lehanăn mâo 14 mta bruă điêt, lehanăn 36 mta bruă pioh kơ klei duh bi liê, đru ênŭm hlăm wưng tal êlâo mơ̆ng ară anei truh thŭn 2025.

Anôk mrâo kơ jih jang klei mkŏ mjing mơ̆ng hdră phŭn, jing amâo lŏ tla tĭng tlă anăp ôh, ƀiădah đru kơ hdră êlan mă bruă hŏng mnuih djuê ƀiă, klei anei bi ksiêm duah, lehanăn pŏk bi lar hdră êlan mđĭ kyar kơ jih jang klei tŭ dưn bruă knuă, mkŏ mjing krĭng truăn kơ bruă duh mkra pla mjing, dưn yua jih klei găl mnơ̆ng pla, mnơ̆ng rông bi tŭ jing, mjing brei bruă knuă mă, mđĭ ênoh mâo ba wĭt kơ dŭm gŏ sang, bi hrŏ ƀun hŏng klei kjăp. Lehanăn mtrŭt mjhar klei bi ktưn rŭ mjing bruă knuă hlăm mnuih djuê ƀiă, tui si klei găl lehanăn ai dưi mơ̆ng ƀuôn sang pô. Nai prĭn Hà Việt Quân pô mkŏ mjing hdră êlan mă bruă kluôm, kơhdră ala čar kñăm mđĭ kyar klei hdĭp mda ala ƀuôn krĭng mnuih djuê ƀiă lehanăn krĭng čư̆ čhiăng wưng thŭn 2021 – 2030: Dưi lač jing, gưl tal êlâo hlăm hƀuê ênuk bruă djuê ana mâo leh klei Đảng, lehanăn knŭk kna ktuh êyuh duh bi liê kơ alŭ wăl anei, čiăng mjing sa klei bi mlih kluôm. Kyuanăn anei jing klei yuôm bhăn hĭn hlăm klei ba yua klei anei, djŏ tuôm hlăm klei bi mlih knhuah ngă bruă, čiăng thâo dưn yua jih hdră êlan duh ƀơ̆ng mrâo hlăm krĭng mnuih djuê ƀiă, anăn yơh jing klei tal êlâo drei yap krĭng anei jing anôk kñăm pioh kơ bruă duh bi liê, amâo mâo lŏ kăm gang jih jang hdră êlan kơ klei đru msĕ si êlâo dih.

Hŏng klei kñăm mđĭ hnơ̆ng kjăp bruă bi mlih hdră êlan mă bruă, dưi mâo leh lu hdră êlan mjuăt bi hriăm, lehanăn mâo mghaih msir leh bruă knuă mă kơ mnuih ngă bruă hlăm krĭng mnuih djuê ƀiă, kñăm mâo klei đĭ kyar dưi hdĭp mơ̆ng êngao kơ bruă lŏ hma. Hlăm hdră anei lŏ čoh čuăn hdră mjuăt bi hriăm truăn kơ krĭng mnuih djuê ƀiă, lehanăn krĭng čư̆ čhiăng, hlăm anăn mđĭ klei thâo săng, lehanăn bruă klam lăm klei amâo mâo thâo hră mơar, lŏ dơ̆ng hyuă kjăp hĭn bruă anei, đru kơ jih jang mnơ̆ng dhơ̆ng, kdrăp yua kơ bruă dhar kreh mnuih djuê ƀiă lehanăn krĭng čư̆ čhiăng, lehanăn dưn yua klei tŭ dưn mơ̆ng bruă dhar kreh djuê ana, mguôp hŏng bruă hiu čhưn ênguê hlăm yang ƀuôn... Vũ Dương Châu, Khua anôk bruă djuê ana, hlăm anôk bruă mặt trận čar kwar gưl dlông Việt Nam lač; Drei mđing mghaih msir jih jang klei dleh kpăk, klei phung ƀuôn sang ăl čôñ ară anei, mâo nanao leh mơ̆ng sui, hlăm đa đa djuê ana đuič, msĕ si klei ră rañ, klei bi dôk ung mô̆ mơ̆ng mda, bruă bi hrŏ ƀun, bruă mkra êlan klông, rŭ mdơ̆ng alŭ wăl să, ngă djăp mta bruă kñăm ba akŏ kơ dŭm alŭ wăl mkăn tui hlue, boh nik klei čuăl mkă alŭ wăl anôk dôk mâo mơ̆ng 40 gŏ sang kơ dlông, ñĕ duĕ mơ̆ng klei êa lip lêč. Tal 3 jing, duh bi liê đru kơ mnuih djuê ƀiă mđĭ kyar bruă duh mkra pla mjing čiăng bi mâo mnơ̆ng pioh čhĭ mnia, mtô bi hriăm bruă knuă, ngă dŭm mta bruă êngao kơ bruă lŏ hma, mđĭ ai phung duh mkra mnia mblei bi hgŭm mlih mrâo hdră êlan bruă răng mgang dliê. Bi hŏng bruă sang hră mơar lŏ dơ̆ng mâo klei hyuă kjăp hĭn mđĭ klei thâo săng hlăm phung ƀuôn sang, mjuăt bi hriăm mnuih ngă bruă, rơ̆ng bi thâo săng hdră êlan ngă bruă ênuk 4.0, čiăng kơ jih jang mnuih dưi tui tiŏ sơăi hŏng ênuk 4.0 anei.

Truh ti wưng anei, bruă knuă mâo mbha ngă leh, dŭm gưl djăp alŭ wăl knŏng bi jih ai tiê, dưn yua klei kreh knhâo ngă bi djŏ hdră êlan mă bruă, hlăm anăn mâo bruă lông bi hmô, lehanăn ba bi lar dŭm bruă lông ngă mâo leh klei tŭ dưn dưi mtruh hŏng jih jang mnuih, dưn yua, mlih klei thâo săng, mđĭ klei tŭ dưn hlăm klei hdĭp, mđĭ ênoh mâo ba wĭt, dơ̆ng mơ̆ng thŭn tal êlâo hlue ngă hdră êlan mtam. Tui si Trần Đức Anh, khua bruă Đảng să Hương Liên, kdriêk Hương khê, čar hsà Tĩnh, lač: Wưng leh êgao, hlue ngă hdră êlan đru răng kriê djuê ana Čư̆t, klei hdĭp digơ̆ ară anei mâo leh lu klei bi mlih, khădah snăn hlăm wưng kơ anăp, bruă Đảng, bruă sanhg čư̆ êa čiăng mbĭt hŏng čar, gưl dlông pral mâo klei bi mklă jao lăn, phăn dliê kơ phung ƀuôn sang jing mnuih djuê ƀiă mâo anôk duah ƀơ̆ng.

Mbĭt hŏng klei bi kjăp jih jang bruă nah gŭ, duh mĭn kơ bruă mđĭ kyar klei hdĭp mda ala ƀuôn dŭm krĭng mnuih djuê ƀiă, kñăm đru kơ digơ̆ thâo duh ƀơ̆ng duah mnơ̆ng pioh čhĭ mnia, đru hlăm bruă mkŏ mkra klei hdĭp mda, mđrĭng hŏng klei phŭn čô̆ kơ bruă, mkŏ mjing bruă duh mkra mnia mblei čiăng kơ phung ƀuôn sang ênưih đĭ nao kơ mdrŏng. Jing thŭn tal êlâo hlue ngă hdră ala čar kñăm, hdră bi kơ rŭ wĭt bruă duh mkra ala ƀuôn êdei kơ klei ruă tưp Covid 19... Čang hmăng anei srăng jing hdră đru mđĭ kyar bruă duh mkra êjai, lehanăn rơ̆ng kjăp kơ klei hdĭp mda ala ƀuôn êjai./.