-Alum kkuh kơ ayŏng Y- Phen Niê, dưi mơ̆ ih brei thâo klei hriăm mơ̆ng pô hlăm bruă êpul leh anăn klei mă bruă knuă?

Đảng viên Y Phen: Hŏng bruă klam jing khua kiă kriê êpul hgŭm ƀĭng ngă lŏ hma să Drai Săp, leh anăn jing sa čô đảng viên, kâo pô bi leh djăp mta bruă dưi jao kơ kâo, mâo nanao klei bi hmô leh anăn nao êlâo hlăm djăp bruă čiăng kơ mnuih ƀuôn sang hluê ngă. Čiăng kơ mnuih ƀuôn sang ƀuh bruă kâo ngă, mnuih ƀuôn sang đăo knang leh anăn hluê ngă. Kâo ăt mtô kơ mnuih ƀuôn sang ngă bruă duh mkra čiăng đĭ kyar hĭn, čiăng kơ klei hdĭp hơĭt hĭn. Hlăm gŏ sang kâo ăt bi hmô mtrŭt mjhar tal êlâo hĭn jing mô̆ anak, leh anăn jing găp djuê ƀuôn sang hdĭp djŏ hŏng hdră bhiăn phŭn leh anăn klei bhiăn lăn čar, kreh kriăng mă bruă knuă, pô nao êlâo čiăng kơ mnuih ƀuôn sang hluê. Jing sa čô đảng viên Đảng cộng sản Việt Nam, kâo mâo nanao klei bi hmô hlăm dŭm mta bruă, hâo hưn dŭm hdră kčah mtrŭn mơ̆ng Đảng, klei bhiăn lăn čar čiăng kơ mnuih ƀuôn sang thâo klă, čiăng kơ mnuih ƀuôn sang hluê ngă. Mơ̆ng anăn mnuih ƀuôn sang bi mguôp hĭn hlăm dŭm mta bruă ti alŭ wăl.

          -Sơnăn, ară anei ih jing ênoh ƀiă hlăm phung ƀĭng hgŭm ngă lŏ hma să Drai Săp mâo hnư hrui wĭt êbeh 500 êklăk prăk grăp thŭn mơ̆ng bruă rông mnơ̆ng leh anăn pla mjing, dưi mơ̆ ih brei thâo kơ klei hriăm čiăng dưi mâo boh tŭ dưn anei?

Đảng viên Y Phen Niê: Gŏ sang kâo mâo êbeh 5 ha lăn pla mjing. Hmei ngă lŏ, pla tiu, ksu, kphê… grăp thŭn gŏ sang ăt ba wĭt giăm 500 êklăk prăk, mă hĕ prăk bi liê adôk hlăm brô 300 êklăk prăk… Êngao kơ năn, gŏ sang lŏ rŭ mjing thiăm war hŏng ŭn hŏng ênhă jih jang 200m2, rông mơ̆ng 5-6 drei ŭn ana mđai, êđai pô rông pioh čhĭ ŭn mă kđeh. Ară anei mâo hlăm brô 50-60 drei, grăp blư̆ čhĭ mâo hlăm brô 4 tôn kđeh čĭm.

-Êngao kơ thâo bruă mnia mblei, ih lŏ nao êlan hlăm bruă đru mguôp ênŭm dŭm ênoh mkŏ mkra krĭng ƀuôn sang mrâo ti alŭ wăl. Akâo kơ ih brei thâo kơ mta phŭn anei?

Đảng viên Y Phen Niê: Hlăm bruă mkŏ mkra krĭng ƀuôn sang mrâo, kâo ăt nao êlâo mtrŭt mjhar mnuih ƀuôn sang mđĭ kyar bruă duh mkra, răng mgang klei êđăp ênang yang ƀuôn, mkŏ mjing klei hdĭp trei mđao. Hŏng bruă klam jing sa čô đảng viên kâo jing pô ba anăp mtrŭt mjhar djăp mta bruă, knŭk kna leh anăn mnuih ƀuôn sang ngă hrăm mbĭt, mkŏ mkra krĭng ƀuôn sang mrâo tŭ dưn. Kâo mtă nanao kơ mnuih ƀuôn sang srăng bi mguôp, sa ai mkŏ mjing yang ƀuôn ƀrư̆ hruê ƀrư̆ đĭ kyar leh anăn trei mđao hĭn.

-Jing khua kiă kriê êpul hgŭm ƀĭng ngă lŏ hma să Drai Săp, dŭm thŭn êgao bruă đru kơ mnuih ƀuôn sang kơ hdră mnêč, ngăn prăk, ana mjeh… čiăng kơ mnuih ƀuôn sang mđĭ kyar klei hdĭp mda bi hrŏ klei ƀun si dưi mkŏ mjing?

Đảng viên Y Phen: Hŏng bruă klam jing khua kiă kriê êpul hgŭm ƀĭng ngă lŏ hma, kâo jêñ jêñ mkŏ hŏng dŭm knơ̆ng bruă, anôk bruă duh mkra, phung thơ̆ng kơ bruă lŏ hma čiăng đru mtô hdră mnêč kơ mnuih ƀuôn sang hlăm bruă mkra mjing, pla mjing tiu, kphê, ksu, dŭm mta ana ƀơ̆ng boh, rông êmô, ŭn, mnŭ, bê… čiăng kơ mnuih ƀuôn sang thâo dŭm hdră mnêč mrâo ară anei, dưn yua hlăm klei ngă bruă mđĭ hnơ̆ng boh mnga, hnơ̆ng tŭ jăk leh anăn hnư hrui wĭt kơ mnuih ƀuôn sang. Mbĭt anăn, kâo bi mguôp hŏng dŭm êpul bruă ngăn prăk, tui duah ênoh prăk lĭng čan mnga hdjul mkŏ mjing klei găl đru kơ mnuih ƀuôn sang dleh dlan mâo ênoh prăk duh bi liê, hrăm mbĭt đĭ kyar, mkŏ mjing hnư hrui wĭt lu kơ dŭm gŏ sang.

-Lač jăk kơ ih lu!