Mlan 7 leh êgao, ti čar Bình Định, Êpul ngă bruă mơ̆ng k’iăng khua knŭk kna Trần Lưu Quang ngă leh bruă klă anăp lehanăn hlăm online hŏng 19 čar, ƀuôn prŏng krĭng Dưr kwar krah, dŭm čar ktuê hang ksĭ lehanăn krĭng lăn dap kngư kơ bruă lăn čar kñăm.

Wưng thŭn 2021-2025, Gưl dlông jao jih jang ênoh prăk bi leh truh êbeh 39 êbâo êklai prăk kơ dŭm alŭ wăl hlăm krĭng kwar krah lehanăn lăn dap kngư hlue ngă 3 hdră lăn čar kñăm. Ară anei, 17/19 alŭ wăl bi liê ngăn prăk pioh ngă dŭm bruă lăn čar kñăm. Hlăm anăn, ƀuôn prŏng Đà Nẵng mâo bi liê leh êbeh 93% prăk mơ̆ng ƀuôn prŏng. Dŭm čar Nghệ An, Quảng Nam, Bình Định, Khánh Hòa, Lâm Đồng dôk hlăm ênoh ba akŏ klei bi liê ngăn prăk jing êbeh 30%.

Blŭ hrăm ti anôk anôk bi kƀĭn, k’iăng khua knŭk kna Trần Lưu Quang lač klă, hdră lăn čar kñăm duh mĭn kơklei hdĭp mnuih ƀuôn sang krĭng taih kbưi, krĭng mnuih djuê ƀiă, lehanăn gŏ êsei dôk hlăm klei dleh dlan jing leh bruă ngă bŏ hŏng klei khăp. Mkă hŏng thŭn 2022, dŭm phŭn dhar bruă lehanăn alŭ wăl mâo ruh mgaih leh lu hdră êlan kpăk dleh mâo ngă. Siămdah, mâo ti dŭm alŭ wăl, klei bi liê ngăn prăk kơ 3 hdră lăn čar kñăm knŏng djăp mă 8%. Êjai găn klei dleh dlan kơ hrue mmông, lehanăn kơ klei bhiăn ka dưi ngă, k’iăng khua knŭk kna Trần Lưu Quang mtă kơ dŭm alŭ wăl brei mđĭ hĭn bruă đua klam, jih jai tiê hĭn hlue ngă hdră lăn čar kñăm:

“Kơ gưl dlông hmei đua klam êlâo lehanăn srăng lŏ bi mlih, ktrâo atăt pral ruh mgaih jih jang klei dôk gun kpăk. Bi kơ diih lĕ, kâo mtă brei mâo klei uêñ klam, jih ai tiê ngă bruă jăk hĭn, ya mta klei adôk ka dưi ngă snăn êmuh gưl dlông, lehanăn dŭm phŭn dhar bruă. Kâo mtă kơ dŭm phŭn dhar bruă, 3 anôk bruă bi kiă kriê jăk hĭn bi mđing hmư̆ kơ dŭm klei alŭ wăl lehanăn akâo ruh mgaih klei dleh dlan”.

 Tui si phŭn bruă čuăl mkă lehanăn duh bi liê, ară anei dŭm bruă lăn čar kñăm dôk hlăm klei dleh dlan, gun kpăk êjai dôk kiă kriê, mkŏ mjing ngă bruă. Msĕ si bruă mâo bi mklă leh, čoh čuăn leh ênoh prăk ngă bruă, leh jih jang klei bi liê ngă prăk mơ̆ng knŭk kna wưng thŭn 2021-2025 mơ̆ng dŭm alŭ wăl, kyua anăn klei bi liê ngăn prăk êlâo tui si mta mtrŭn jing dôk dleh mâo ngă mơh. Klei kơ prăk kăk hlăm grăp thŭn, mâo tĭng tui si bruă knuă leh ƀiădah alŭ wăl ăt dleh dlan mơh kñăm mâo ba yua tui si hdră leh dăp boh sĭt čiăng mă bruă. Khua phŭn bruă, khua adŭ bruă knŭk kna Trần Văn Sơn lač:

          “3 hdră lăn čar kñăm, ară anei knŭk kna mkŏ mjing leh truh 26 êpul mơ̆ng knŭk kna djă akŏ truh hŏng grăp boh čar. Lehanăn knŭk kna mâo hdră mtrŭn 1 mlan trŭn nao čiăng ruh mgaih jih klei dleh dlan. Kyuadah ară anei truh hŏng alŭ wăl ƀuh jing dleh dlan gun kpăk snăn ruh mgaih mtam, lehanăn klei ruh mgaih anăn bi djŏ hŏng klei jing sĭt ti alŭ wăl anăn”.

Čiăng lŏ dơ̆ng mâo hdră êlan bi liê pral ngăn prăk duh kơ bruă lăn čar kñăm, lehanăn hlue ngă tŭ jing hdră mtrŭn mrô 100 mơ̆ng klei bi kƀĭn tal 5 bruă kƀĭn ala gưl 15, Khua knŭk kna mtă kơ dŭm phŭn dhar bruă hlue si bruă ngă mâo jao bi mguôp hŏng phŭn bruă ngăn prăk, lehanăn dŭm phŭn dhar bruă djŏ tuôm mkăn bi tĭng mkă klei bi liê ngăn prăk kơ wưng thŭn 2024 và 2025 kơ dŭm phŭn dhar bruă gưl dlông, lehanăn alŭ wăl bi djŏ hŏng mta mtrŭn mrô 38 thŭn 2023 mơ̆ng knŭk kna. 

Dhar bruă djuê ana pral kiă kriê, bi hgŭm hŏng dŭm phŭn dhar bruă ksiêm kluôm jih hdră lăn čar kñăm mđĭ kyar klei duh mkra ala ƀuôn krĭng mnuih djuê ƀiă, lehanăn krĭng čư̆ čhiăng wưng tal 1; mkŏ mjing hdră êlan bi mlih bruă ngă kñăm bi djŏ hŏng dŭm mta mtrŭn, djŏ hŏng klei bhiăn duh bi liê, hâo mdah hŏng khua knŭk kna lehanăn mơĭt kơ phŭn bruă čuăl mkă duh bi liê hlăm mlan 8 thŭn 2023. 

Phŭn bruă ngăn prăk pral mâo klei kiă kriê, hgŭm hŏng djăp phŭn dhar bruă djŏ tuôm bi leh bruă bi mlih mkra thiăm mbŏ jih jang hră mtrŭn tui si hdră êlan čoh čuăn kơ bruă hlue ngă hdră lăn čar kñăm./.