Hdră tal êlâo jing bruă sang čư êa kdriêk Ia H’Drai mkŏ mjing knăm ba mdah klei bi klă mơ̆ng mnuih ƀuôn sang čar Kon Tum tŭ yap să Ia Đal ênŭm hnơ̆ng čuăn krĭng ƀuôn sang mrâo. Anei jing să knông lăn tal 7 hlăm 13 să knông lăn mơ̆ng čar Kon Tum ênŭm hnơ̆ng čuăn krĭng ƀuôn sang mrâo.

Hlăm dŭm thŭn êgao, bruă Đảng, bruă sang čư êa leh anăn giăm 5000 čô mnuih ƀuôn sang să knông lăn Ia Đal hrăm mbĭt, sa ai hluê ngă hdră ala čar kñăm mkŏ mkra krĭng ƀuôn sang mrâo leh anăn mâo lu boh tŭ dưn jăk. Să iêo mkrum leh êbeh 49 êklai prăk duh bi liê rơ̆ng kơ dŭm hnơ̆ng čuăn bruă mkŏ mkra, hnư hrui wĭt kah knar grăp čô mâo êbeh 43 êklai prăk, hnơ̆ng gŏ sang ƀun, giăm ƀun hrŏ ti gŭ 12%. Lò Văn Nịa, alŭ Ia Đal, să Ia Đal brei thâo:

“Mnuih ƀuôn sang hơ̆k mơak êdi kyua mkŏ mkra krĭng ƀuôn sang mrâo jing ngă kơ mnuih ƀuôn sang, kơ asei pô čiăng dưi gĭr ktưn, kpưn đĭ. Mkŏ mkra krĭng ƀuôn sang mrâo mnuih ƀuôn sang bi mguôp hruê ai, ai mă bruă leh anăn myơr lăn ngă êlan. Mkŏ mkra krĭng ƀuôn sang mrâo mnuih ƀuôn sang dưi mâo lu boh tŭ dưn, mkŏ mjing klei găl mđĭ kyar klei hdĭp mda gŏ sang, gĭr ktưn tlaih ƀun hŏng klei kjăp. Dhar kreh, bruă duh mkra đĭ hĭn klă nik mkă hŏng êlâo kơ ka mkŏ mkra krĭng ƀuôn sang mrâo”.

Hŏng bruă dưi tŭ yap ênŭm hnơ̆ng čuăn krĭng ƀuôn sang mrâo, să Ia Đal jing să knông lăn tal 7 hlăm 13 să knông lăn mơ̆ng čar Kon Tum ênŭm hnơ̆ng čuăn krĭng ƀuôn sang mrâo. Truh kơ ară anei, čar Kon Tum mâo leh 48 hlăm 85 să ênŭm hnơ̆ng čuăn krĭng ƀuôn sang mrâo, hlăm anăn mâo 4 să ênŭm hnơ̆ng čuăn krĭng ƀuôn sang mrâo mđĭ hnơ̆ng leh anăn 1 să ênŭm hnơ̆ng čuăn krĭng ƀuôn sang mrâo bi hmô.

Hŏng klei gĭr ktưn bi mâo djăp dŭm hnơ̆ng čuăn mđĭ kyar bruă duh mkra ala ƀuôn hlăm thŭn 2024, Knăm truh kơ bruă mkŏ mkra krĭng ƀuôn sang mrâo leh anăn wăl krah mrâo mrang, 10 kdriêk, ƀuôn prŏng mơ̆ng čar Kon Tum hluê ngă leh dŭm mta phŭn klă klơ̆ng čiăng gĭt ktưn hluê ngă. Hlăm anăn, kñăm kơ bruă mkŏ mjing dŭm klei bi hmô mkra mjing, rŭ ênhă ngă lŏ, mđĭ kyar mnơ̆ng dhơ̆ng OCOP, rŭ mjing mrâo, mkra bi jăk dŭm bi êlan dơ̆ng, knơ̆ng kdơ̆ng êa, đru kơ dŭm gŏ sang knŭk kna dlăng ba mâo klei hdĭp dleh dlan mkra bi jăk pưk sang, mkŏ wĭt đang pla mjing mđĭ kyar klei hdĭp mda, mđĭ hĭn bruă kriê dlăng, răng mgang leh anăn mđĭ kyar dliê…

Jing kdriêk mâo êbeh 79 km êlan knông lăn hŏng ala čar mah djiăng jing Campuchia, ti knăm trŭn kơ bruă mkŏ mkra krĭng ƀuôn sang mrâo dưi mkŏ mjing ti să Ia Đal, Võ Anh Tuấn, khua bruă sang čư êa kdriêk Ia H’Drai brei thâo:

“Bruă Đảng čar, bruă sang čư êa leh anăn mnuih ƀuôn sang mơ̆ng kdriêk mdưm mta kñăm mkŏ mjing kdriêk truh ti knhal jih thŭn 2025 dưi mâo ênŭm dŭm hnơ̆ng čuăn krĭng ƀuôn sang mrâo. Hluê si dŭm hdră mtrŭn mơ̆ng bruă Đảng čar, kdriêk ăt mâo leh hdră êlan klă klơ̆ng, čiăng kơ grăp să truh hnơ̆ng krĭng ƀuôn sang mrâo. Hŏng mta kñăm ăt msĕ hŏng hdră êlan mâo leh, hmei dôk gĭr ngă dŭm hdră êlan klă klơ̆ng čiăng ba să Ia Tơi truh ti knhal jih thŭn 2024 wĭt truh hnơ̆ng krĭng ƀuôn sang mrâo.”

Ƀuh mnuih Sêdang mâo klei thâo săng bruă klam hŏng yang ƀuôn, jing klei găl hlăm bruă mđĭ kyar bruă duh mkra êpul, mơ̆ng dŭm mta kñăm, ti să Đăk Na, kdriêk Tu Mơ Rông, čar Kon Tum dưi mkŏ mjing leh 3 êpul hgŭm bruă leh anăn 3 êpul bi mguôp. Hŏng bruă nao hgŭm hlăm dŭm êpul hgŭm bruă dưi đru kơ mnuih ƀuôn sang bi mlih klei mĭn hlăm klei mă bruă knuă. Võ Nguyên Sinh, khua êpul gơ̆ng kriê dlăng hlŏng ngă khua kiă kriê Êpul hgŭm bruă Hiu čhưn ênguê leh anăn ana êa drao mtah Siu Puông hŏng 43 čô hgŭm jing mnuih Sêdang brei thâo:

“Phung hgŭm hlăm êpul hgŭm bruă diñu dưi bi mlih klei mĭn mă bruă, klei mĭn ngă bruă duh mkra. Nao hgŭm hlăm Êpul hgŭm bruă čiăng pla Sâm Ngọc Linh srăng dưi răng kriê leh anăn răng mgang dliê. Kyua diñu dưi mlih knhuah mĭn, mơ̆ng anăn mkŏ mjing dŭm klei bi hmô bruă duh mkra mkăn. Wưng bhiâo pla sâm hruê̆, rông ŭn mnŭ čiăng đru kơ bruă hiu čhưn ênguê. Bi kơ wưng sui pla Sâm Ngọc Linh. Leh anăn diñu mâo hnư hrui wĭt wưng bhiâo leh anăn wưng sui”.

Hŏng bruă klam jing phŭn hlăm bruă mkŏ mkra krĭng ƀuôn sang mrâo, lu êpul êya dŭm djuê ana mnuih djuê ƀiă mơ̆ng čar đru mguôp hlăm klei mă bruă mđĭ hnư hrui wĭt leh anăn bi bi mlih bô̆ mta krĭng ƀuôn sang. Yap truh ti knhal jih thŭn 2023 mâo leh 32 alŭ, ƀuôn mnuih ƀuôn sang krĭng mnuih djuê ƀiă mơ̆ng čar Kon Tum ênŭm hnơ̆ng čuăn krĭng ƀuôn sang mrâo. Jih jang dŭm să hlăm čar mâo mơ̆ng 15 hnơ̆ng čuăn krĭng ƀuôn sang mrâo kơ dlông. Kluôm čar Kon Tum ară anei mâo 42 să ênŭm hnơ̆ng čuăn krĭng ƀuôn sang mrâo, hlăm anăn mâo lu să krĭng mnuih djuê ƀiă truh ti hnơ̆ng krĭng ƀuôn sang mrâo./.