Thŭn 1993, leh ruĕ ngă bruă čuăn lĭng kahan wĭt kơ ƀuôn sang, Y-Tuyên Ƀuôn Krông kreh iêo Ama Hà ti ƀuôn Drai H’Ling, să Hòa Xuân, ƀuôn prŏng Buôn Ma Thuột, čar Dak Lak jih ai tiê hgŭm hlăm bruă yang ƀuôn nao hlăm bruă êdam êra, êpul hgŭm kahan hđăp ti alŭ wăl. Truh thŭn 2015, ñu djŏ ruah jing k’iăng khua bruă Đảng, khua ƀuôn Drai H’Ling.

Hlăm 30 năm ngă bruă hlăm ƀuôn sang, ñu jing leh kdrông mkŏ kăp ba hdră êlan mơ̆ng Đảng, knŭk kna truh hŏng mnuih ƀuôn sang pô ti să Hòa Xuân hlăm anăn mâo ƀuôn Drai H’Ling. Khădah hŏng ya mta bruă ngă, ñu amâo dêč kơ klei dleh dlan suăi êmăn ôh, nao truh hlăm grăp boh sang čiăng hâo hưn mtă mtăn, mtrŭt mnuih ƀuôn sang hlue gưt hdră êlan mơ̆ng Đảng lehanăn knŭk kna. Ñu lač:

“Ti buôn Drai H’Ling lu jing anak ÊĐê êbeh 93%, hnơ̆ng thâo săng amâo mâo klei bi knar ôh. Hŏng klei hur har yơh, kâo mđĭ ai mnuih ƀuôn sang hlue gưt hdră êlan mơ̆ng Đảng lehanăn knŭk kna. Hlăm wưng leh êgao, mnuih ƀuôn sang hlue gưt jăk mkă hŏng dŭm thŭn êlâo, snăn kâo ƀuh mơak snăk”.

Ama Hà lŏ brei thâo, mnuih ƀuôn sang hlăm ƀuôn adôk djă pioh nanao klei bhiăn amâo mâo djŏ, klei bi kuôl ung mô̆, klei dơr djiê čoh ngăn pnŭ prŏng, ngă luič liê, dah djiê ƀru lui sui hrue... Kyuanăn ñu kreh nao truh hlăm grăp boh sang mtrŭt mjhar mnuih ƀuôn sang mđĭ ai, thâo săng ai tiê klei mĭn mnuih ƀuôn sang, hâo hưn mtô mblang čiăng kơ mnuih ƀuôn sang mâo klei thâo săng, lui hĕ jih ya mta klei bhiăn jing amâo lŏ djŏ ôh. Ama Hà jih ja tiê mtrŭt mjhar đru mnuih ƀuôn sang bi mlih klei mĭn hlăm hdră êlan duh ƀơ̆ng, jhŏng duh bi liê mđĭ kyar klei hdĭp mda. H’I Ƀuôn Yă (kreh iêo jing Amĭ Bảo) – mnuih hlăm ƀuôn lač, ñu mpŭ snăk lehanăn kreh êmuh nanao Ama Hà kyuadah ƀuh klei hur har, klei sĭt suôr ñu hŏng mnuih ƀuôn sang:

“Ama Hà ngă khua ƀuôn hmei mơ̆ng sui leh. Tơdah mâo dŭm hdră êlan mơ̆ng Đảng lehanăn knŭk kna snăn ñu mblang, kčĕ kơ mnuih ƀuôn sang tui gưt, mkăp mnơ̆ng pla, lehanăn đru mtô kơ mnuih ƀuôn sang hriăm ngă, mă mjeh pla. Mnuih ƀuôn sang mâo lu klei khăp êdi hŏng khua ƀuôn anei”.

Y-Niwa Ƀuôn Yă, K’iăng khua knơ̆ng bruă sang čư̆ êa să Hòa Xuân, ƀuôn prŏng Ƀuôn Ma Thuôt, čar Dak lak lač, Ama Hà jing sa čô đảng viên mâo klei thâo bi hmô jăk êdi. Hŏng bruă klam jing khua bruă Đảng, hlŏng ngă khua ƀuôn ƀuôn Drai H’Ling, ñu ba êlan êlâo nanao hlăm djăp mta bruă. Mơ̆ng thŭn 2016 truh ară anei, ñu mbĭt hŏng êpul bruă Đảng mtrŭt mjhar mnuih ƀuôn sang bi mkrum mâo êbeh 200 êklăk prăk lehanăn dŭm êbâo hrue ai mă bruă pioh tuh betong êbeh 2 km êlan hlăm ƀuôn. Truh kơ ară anei, êbeh 85% ênoh gŏ êsei hlăm ƀuôn djăp leh ênoh čuăn gŏ sang dhar kreh, gŏ sang kkiêng anak tal 3 hrŏ leh, klei hdĭp mda mâo leh klei đĭ kyar. Y-Niwa Ƀuôn Yă, k’iăng khua să Hòa Xuân lač kơ Ama Hà jing sa čô mnuih mâo lu klei mĭn jăk, mâo nanao hdră mă bruă jăk hlue ngă djăp mta hdră mtrŭn mơ̆ng Đảng yua kơ klei hdĭp. 

“Ñu hŏng bruă ngă êbeh 15 thŭn ngă khua ƀuôn, hlô̆ng klam ngă khua bruă Đảng ti ƀuôn Drai H’Ling lehanăn jing nanao pô mâo mnuih ƀuôn sang đăo knang êbeh kơ 10 thŭn hŏng anei leh. Jing khua ƀuôn lehanăn hlŏng klam jing k'iăng khua bruă Đảng ƀuôn, ñu amâo mâo mdei ngă klei bi hmô jăk hlăm bruă mkŏ mkra krĭng ƀuôn sang mrâo, mbĭt anăn mtă mtăn kơ mnuih ƀuôn sang bi duh myơr lăn, pioh mkra êlan klông, ƀuh ñu jing kdông mkŏ jăk êdi plah wah bruă sang čư̆ êa lehanăn mnuih ƀuôn sang”.

Ama Hà jing sa čô đảng viên mâo k’hưm êdi, lehanăn mâo klei thâo mơh lehanăn jih ai tiê hur har hŏng bruă knuă. Mâo klei thâo gĭr, mâo klei kreh kriăng, ñu jing leh mnuih đru mjut mjing klei bi mguôp djuê ana, ngă jăk bruă bi ktưn thâo khăp kơ lăn čar, mđĭ kyar djăp mta bruă ti ƀuôn Drai H’Ling. Hŏng klei gĭr hlăm bruă knuă Ama Hà jing sa čô đảng viên bi leh jăk bruă čuăn, jing leh mnuih mâo k’hưm êdi hlăm mnuih ƀuôn sang pô./.