1 – Agaih đang bôh ñông:

-Blan 11 – 12: Agaih đang, čong jah amur rok, hrui pơƀut rok djah, than hmâo arong hlăt pơčrăm, hla hlung čuh hul asăp. Tui tơlơi găn rơgao đưm bruă hul asăp kiăng prung arong keč.

-Lăng tui huĭ hmâo hlăt pơčrăm ƀơi tơdŭ, hla mơda kiăng hmao pơgang pơgăn.

-Amăng hơdôm hrơi prăp lui pĕ pơhrui rơmet agaih đang rơgoh rok, djah hăng ngă tơpă lŏn kiăng pĕ pơhrui bôh ñu tơsă hlung trun.

2 – Dje than, pơjing pum kyâu:

-Phun ñông bluh bơnga amăng blan 12 anun hơdor dje than pơjing pum kyâu tañ, dje hĭ ƀơƀiă hơdôm than tơdŭ anet khen amăng pum kyâu tơnap bluh bơnga ƀudah ƀiă bluh bơnga, kơnong kơ pioh glăi mơng 2 – 3 ƀĕ tơdŭ ƀơi sa ƀĕ than. Trơ̆i hĭ than krô, than hmâo arong hlăt pơčrăm.

-Ƀơi hơdôm đang bôh ñông sui thun, kơplah wah hơdôm phun hmâo pum pơhrua nao rai amra koh lui abih than ƀudah sa črăn than prong pioh pum kyâu rơhaih ƀiă.

-Lom trơ̆i than prong khom trơ̆i djơ̆ anih kuai than. Yua jrao Booc-đô 1:4:5 ƀudah ia luir rơdêh yua giong pik đĭ ƀơi anih than trơ̆i kiăng huăi hmâo môt ƀong hăng hlăt pơčrăm.

3 – Bơwih brơi lom bluh bơnga, hơdai bôh:

-Pơsir bơnga kơtưn hơdai bôh; Lom phun bluh bơnga, hơdai bôh amra pruih sa dua jrao kiăng đĭ tui mrô hơdai bôh, hơdư̆ ƀiă hloh hlung bôh mơda.

4 – Đang bôh ñông tha, hmâo arong hlăt pơčrăm kơtang ƀu dưi bluh glăi: Khom uă lui hĭ hăng pla glăi. Hơdor: Mă yua hơdôm djuai bôh ñông gep than hiam dưi hmâo Ding jum đang hmua hăng pơđĭ kyar ƀôn lan dêh čar ta tŭ yap kah hăng: PN1, AB29, AB05-08, ĐDH67-15, ĐDH102-293. Rơwang pla năng ai ñu 200 phun sa ektar (ataih nao rai 8m hăng 6m) hăng amra rah hui tơdơi kơ 8-10 thun. Bơyan pla tui hluai rim kual (mơng blan 6 truh kơ blan 10, amra pla amăng bơyan phang tơdah hmâo ia pruih).

5 – Pơgang pơgăn arong keč:

Hmâo 2 djuai arong keč pơčrăm: djuai arong keč mơtah (Helopeltis theivora) hmâo lu hloh; djuai arong keč mraih (Helopeltis antonii) ƀiă hloh.

Ană arong keč hăng arong keč prong leng kơ pơčrăm ƀơi anih mơda mơng phun bôh nông kah hăng hla mơda, tơdŭ mơda, bơnga, bôh hăng asar mơda.

-Bruă wai rơnăk đang:

Anăm pruai lu kơmok đạm, đĭ kali amăng hơdôm hrơi phun tơdŭ, bluh bơnga hăng hơdai bôh.

Mă rok rơgoh, rah than pơjing pum kyâu kiăng đang bôh ñông rơhai, plai ƀiă hmâo anih găm mơng arong keč. Pơhrui pơƀut than, hla, bơnga, bôh hmâo kơman ƀong ba nao čuh prai hĭ kiăng plai ƀiă lar hyu kơman.

-Bruă yua mơnong pơkon pơgăn:

Tlaih djuai pơkon pơgăn arong keč kah hăng hơdom jŭ, hơdom saou, jăng jâo hăng wăng wil prong mă ƀong arong. Hơdom saou lĕ djuai dưi pơgang sit hloh, ñu ƀong bôh arong hlăt, arong keč prong.

Mă yua djuai jrao găm djăp ƀơi arong Metarhizum anisopliae, Beauveria bassiana ƀudah Paecilomyces sp. Pruih pơgăn arong keč lom dô̆ anet, mrô pruih tui tơlơi pơtă amăng hluh kơdung jrao.

-Bruă yua put jrao:

Mă yua djop djuai jrao: Permecide 50EC, Peran 50EC, Tungcydan 60EC, Dragoannong 585EC, Wamtox 100EC, Tungrin 25EC, Sherbush 5EC, 10EC. Mrô yua hăng rơnoh ñu tui tơlơi pơtô ƀơi kơđuh kơdung jrao čih.

-Bơyan pruih tŭ yua hloh:

+Lom phun ñu či bluh hla mơda, bluh bơnga.

+Pruih jrao amăng mơguah ƀudah čơtlăm rơ-ơ̆. Hơdôm hrơi adai ĭt ing arong keč lar hyu kơtang biă amra pruih tañ hloh. Tơdah phun bôh ñông glăk bluh bơnga ƀu pruih hlâo kơ 9 mông mơguah pioh bơnga phun ñông prui bơnga đôm găm.

+Pruih lom arong keč mơng 1 – 3 hrơi tŭ yua hloh.

6 – Pơgang pơgăn kơman ngă khiă hla:

Kơman yua kơ bơmao Colletotrichum gloeosporioides ba truh, juăt hmâo amăng ayuh hyiăng pơsah lu, hơjan sui hrơi hăng kơƀah bơngač. Kơman lar hyu hluai tui ia hăng angin.

Kơman juăt hmâo lu phun ñu bluh hla, hmâo brô̆ bơnga ƀudah pơphun hơdai bôh. Hơdôm nam kơman ngă mriah lŏn drŏt ƀơi tơdŭ mơda, hla, than bơnga hăng bôh ñu.

-Lom hmâo kơman ngă rơnang mă yua pơgang phun pla: DuPontTM Kocide 46.1 WG, Norshield 86.2WG, New Kasuran 16.6WP, Tungvil 5SC, 10SC… mrô ñu hăng rơnoh tui tơlơi pơtô ba hmâo čih ƀơi kơđuh kơdung jrao.

-Bơyan pruih: Amăng rơwang phun bôh ñông lôm bơnga mơda, bluh đĭ bơnga, bôh mơda tơdah bưp pơsah lu, ia ngôm lu thơ khom pruih jrao pơgang phun pla pioh pơgang pơgăn kơman. Ƀu pruih hlâo kơ 9 mông mơguah ôh pioh bơnga ñu đôm prui bơnga.

-Jơlan gah pruih: Pruih pơsah dưm kơnar pum phun kyâu; tơdah pơsah lu hăng sui amra pruih tal 2 (tơdơi kơ tal 1 mơng 5 – 7 hrơi).

Yua jrao Booc-đô 1:4:5 pik đĭ ƀơi phun kyâu.