Ƀơi plơi prong Quảng Ngãi, Thượng tướng Trần Quang Phương, Kơ-iăng khua pơ ala mơnuih ƀôn sang dêh čar hrŏm hăng grup khua mua pơ ala ƀơi tơring čar Quảng Ngãi hơmâo bưp mơnuih ruah khua jing ƀing khua mua wai lăng hăng nai pơtô hrăm amăng anom bruă pơtô pơhrăm tơring čar Quảng Ngãi. Ƀơi mông bưp, Grup khua mua pơ ala ƀơi tơring čar Quảng Ngãi lăi pơthâo boh tơhnal jơnum lok 6, khua mua pơ ala mơnuih ƀôn sang dêh čar tal 15 laih anun hơdôm bruă mă mơ̆ng grup pơ ala ƀơi tơring čar.

Pơ anai, Kơ-iăng khua pơ ala mơnuih ƀôn sang dêh čar Trần Quang Phương mơ-it hiăp bơni kơ abih bang khua mua hăng nai pơtô amăng gơnong bruă pơtô hrăm ƀơi tơring čar Quảng Ngãi yua hơmâo tơlơi pơgôp prong amăng bruă pơtô hăng pơjuăt. Kơ-iăng khua pơ ala mơnuih ƀôn sang dêh čar Trần Quang Phương ăt pơtă pơtăn tơlơi soh ma túy, tơlơi răm ƀăm čơđai sang hră bơpơtaih tơdruă amăng sang hră....hlăk mut tơma amăng gơnong bruă pơtô hrăm laih anun kiăng gong gai kơnuk kơna tơring čar khom đing nao pơtô pơblang, pơhrăm tong ten, pơgăn sit nik kiăng pơhlôm brơi sang hră, anih pơtô hrăm rơnuk rơnua mơak klă:

“Ră anai, tơlơi ană amôn čơđai sang hră anăp nao hrăm bruă lu hloh. Ƀu djơ̆ lăi abih bang hrăm prong lêng kơ ngă nai soh ôh, ăt anăm lui mơnuih mơnam kơnong ngă nai mơ̆ ƀu hơmâo mơnuih thâo ngă bruă kơhnâo kơhnăk pơkra ming. Pơkă kơ nai pơtô khom djơ̆ ngă nai, nai pơtô khom rơgơi hloh. Kơnong mơnuih rơgơi đôč dưi pơtô ba jing čơđai sang hră rơgơi, anun lĕ phiăn hơmâo, tơlơi djơ̆ găl, ƀu hơmâo ôh ƀing nai pơtŏ mơ̆ pơtô hrăm brơi čơđai rơgơi”.

Ƀơi mông bưp mơnuih ƀôn sang ruah khua, mơnuih ruah khua jing ƀing khua mua hăng nai pơtô hrăm amăng gơnong bruă pơtô hrăm tơring čar Quảng Ngãi, hơmâo rơkâo đĭ lu tơlơi pơdjơ̆ nao kơ bruă pơtô hrăm. Rơđah biă ñu, mơnuih ruah khua gah anom bruă pơtô hrăm rơkâo pơhrua nao dơ̆ng khul mơnuih hơmâo anăn dưi tŭ mă tơlơi djru tui Hră pơtrun mrô 105 mơ̆ng Kơnuk kơna kơ bruă pơkra ming, brơi pơđĭ kyar pơtô hrăm gưl muai; prăk huă hrơi dơ̆ng kơ sang tơnă asơi čem rông čơđai mơ̆ng 1-2 thun; prăk djru kơ ƀing nai pơtô gưl muai pơtlep lu anih, pơtô tơlơi Việt kơ čơđai mơnuih djuai ƀiă ƀơi hơdôm sang hră phun....Ƀing nai pơtô rơkâo đĭ, kiăng tañ ngă tui hơdră djru prăk blan kơ ƀing nai pơtô, pơhlôm rơnoh prăk pơhrui glăi kơ ƀing nai pơtô hrăm dưi hơđong tơlơi hơdip mơda, lăp hăng anŏ pơkă kơ bruă pơtô hrăm yôm phara kơ ƀing nai pơtô.

Lu tơlơi pơgôp hiăp, rơkâo kơ gơnong dlông ăt đing nao kơ prăk tuh pơ alin man pơdong ƀơi sang hră gưl muai, sang hră pơtô hrăm phun, biă mă ñu ƀơi sang hră kual čư̆ siăng, mă prăk mơ̆ng Hơdră dêh čar djru laih anun lu rơnoh prăk mơ̆ng gơnong dlông kiăng blơi djop gơnam yua hrăm hră, pơtô hrăm amăng gơnong bruă pơtô hăng pơjuăt. Kơ-iăng khua pơ ala mơnuih ƀôn sang dêh čar čih pioh hơdôm tơlơi rơkâo mơ̆ng mơnuih ruah khua, jơlan hơdră pioh kơ bruă pơtô hrăm; laih anun brơi thâo tơlơi gun, kơđông ră anai ăt dưi hơmâo ƀing pơ ala mơnuih ƀôn sang dêh čar hăng djop anom bruă ƀơi gơnong dlông đing nao pơsir.

Ƀơi mông bưp mơnuih ruah khua kuận 3, mơ̆ng grup khua mua pơ ala ƀơi ƀôn prong HCM tơdơi kơ jơnum lok 6 tal 15, mơnuih ruah khua ăt đing nao lăi pơthâo lu bruă kiăng ngă tui gong gai kơnuk kơna plơi prong phrâo, pơgăn ƀong kông ngăn, brơi jŭ yap kông ngăn mơ̆ng ƀing khua mua apăn bruă khom tơpă....Mơnuih ƀôn sang ơi Nguyễn Văn Công, phường 9, kuận 3 bơngơ̆t biă mă tơlơi ƀong kông ngăn ră anai hlăk kơtang ngă gun hĭ bruă pơđĭ kyar lŏn ia. Kơđi tơlơi kah hăng ƀơi Vạn Thịnh Phát rơnoh prăk tơl ƀu anăm yap. Rơngiao kơ anun, ră anai tơlơi soh sat ƀong kông ngăn hơmâo ƀơi djop anih, djop bruă khom apah, la kah dưi, mơ̆ng ngă brơi.

“Ră anai, tơlơi răm ƀăm lŏn ia soh sat ƀong kông ngăn prong biă mă. Tơlơi ƀong kông ngăn lu, ngă tơnap tap amăng bruă mă, mut tơma amăng tơlơi pơmin pran jua lu mơnuih. Mơnuih ƀôn sang ur krao bruaw hơgĕt khom pơyơr prăk kah mă bruă, khom la, khom duh dưm prăk amăng hruh pơyơr kơ khua jing hĭ sa tơlơi phiăn răm ƀăm biă mă kơ mơnuih mơnam dêh čar”.

Rơngiao kơ anun, mơnuih ruah khua rơkâo hăng anom bruă kơnuk kơna khom pơsir sim mrô telephôn arăng sĭ ča, ngă mă mrô tơhan kơnuk kơna, hyu plư pleč, ngă rung răng ană plơi, pôr tă tăn sĭ mơdrô ia jrao, gơnam tam tơket tơkeng ƀu hơmâo pô wai lăng...

Ƀơi mông bưp, Kơ-iăng khua jơnum min pơ ala mơnuih ƀôn sang ƀôn prong HCM, Phạm Thành Kiên brơi thâo: jơnum lok pơ anăp, anom bruă pơ ala mơnuih ƀôn sang ƀôn prong amra pơčrong sai, pơsit lu bruă mă pơdjơ̆ nao bơwih ƀong huă mơnuih mơnam, pok pơhai bruă mă ngă tui Hră pơtrun mrô 98 kơ bruă lông ngă lăng tơlơi phiăn pơkă phara hơjăn pơđĭ kyar ƀôn prong HCM. Pơdjơ̆ nao bruă pok pơhai ngă tui Hră pơtrun mrô 98, pô pơ ala Trần Kim Yến, Khua Jơnum min djop djuai ania mơnuih mơnam Việt Nam ƀôn prong Hồ Chí Minh brơi thâo:

“Kiăng pok pơhai ngă tui Hră pơtrun 98 lĕ sa tơlơi gir run prong biă mă mơ̆ng khul khua mua mơnuih apăn bruă djop gơnong bruă amăng ƀôn prong, mơ̆ng djop kuận, plơi prong, phường, să, wơ̆t hăng hơmâo tơlơi djru hrŏm mơ̆ng djop ding jum, anom bruă pơ gơnong dlông djru kơ ƀôn prong HCM. Ñu ƀu amuñ amĕ ôh, ƀing ta khom pơkra hơdră hăng ngă tui dŏ khom ngă tui djơ̆ tơlơi git gai, amăng anun Khua dêh čar ngă khua grup git gai pơčrâo bruă”.

Rơngiao kơ bruă pơblang glăi tơlơi tơña ƀơi mông jơnum či kuận 3, grup khua mua pơ ala mơnuih ƀôn sang dêh čar ƀơi ƀôn prong HCM hăng khua mua pơ ala mơnuih ƀôn sang ƀôn prong ăt čih pioh hơdôm tơlơi rơkâo lăp djơ̆, mơ-it nao pơ djop sang bruă kơnuk kơna brơi pơsir hĭ tui hăng tơlơi dưi mơ̆ng gơñu.