Hăng lu tơlơi pơplih phrâo amăng hơdră pok pơhai, bruă lăng tui mơng Khua pơ ala mơnuih ƀôn sang thun pơjing tơlơi pơplih klă lom lăng tui mơtăm, kah hăng jơlan gah Khua git gai wai lăng pơ ala mơnuih ƀôn sang Vương Đình Huệ lăi rơđah “Lăng tui khom hluai tui pran jua pơdŏng; kơplah wah “pơdŏng” hăng “pơgăn” lĕ pơdŏng ăt jing phun ñu mơn...”

Thun 2022, hăng tơlơi rơkâo mơng bôh nik hmâo, Khua pơ ala mơnuih ƀôn sang ruah mă tơlơi tơña ƀing Khua Ding jum, Khua gơnong bruă Đang hmua hăng pơđĭ kyar ƀôn lan; prăk kak; sang prăk, jơlan nao rai dŭ pơgiăng, man pơdŏng, bruă gong gai, tơlơi pơhing – pôr pơhing hăng pel ĕp. Hơdôm tơlơi tơnap, tơlơi gun, hơdôm tơlơi dô̆ tơdu hăng ngă akă giong amăng wai lăng kơnuk kơna dưi lăng ƀuh tơpă, pơblang lu bơnah, lu črăn amăng mông tơña ƀơi hơdôm tal jơnum Khua pơ ala mơnuih ƀôn sang. Tơlơi lăi pơthâo nao rai kơplah wah tơlơi tơña mơng ƀing khua pơ ala mơnuih ƀôn sang hăng črăn lăi glăi mơng ƀing Khua Ding jum, Khua Gơnong bruă, bơrơjah truh đut jơlan tơlơi ngă rơđah bruă pơsir. Khua pơ ala Trần Văn Lâm, Grŭp khua pơ ala mơnuih ƀôn sang tơring čar Bắc Giang lăi lĕ:

 “ Tơlơi tơña jai hrơi djơ̆ tơlơi hloh. Črăn lăi glăi mơng ƀing Khua Ding jum hăng mơng Gong gai ƀu bĕ, ƀu dar nao dar rai”.

Truh kih mơng rim mông tơña ƀu djơ̆ kơnong kơ hơdôm tơlơi tơña ƀơi anăp, hyu tơña bruă gơgrong, hơdôm tơlơi lăi glăi thâo lok nao rai, thâo hluh gơnong bruă, bruă mă, tơpă ară, đa lĕ ƀu bĕ gơgrong ba tơlơi soh mơng ƀing Khua Ding jum, Khua gơnong bruă. Truh kih hloh wot mơnuih tơña hăng lăi glăi tơlơi tơña leng kơ hrom sa pran jua pơdŏng kiăng ĕp jơlan pơsir kơ hơdôm tơlơi wai lăng kơnuk kơna hmâo, glăk hăng amra ba tơbiă.

Tơdah kah hăng ƀơi hơdôm mông tơña hăng lăi glăi tơlơi tơña, ƀing Khua pơ ala mơnuih ƀôn sang hăng ƀing khua ding jum, khua gơnong bruă, ding kơna kơnuk kơna hmâo pơdah rơđah pran jua lăng tơpă, lăi djơ̆ hơdôm tơlơi akă gal mơng bôh nik hmâo kiăng ba tơbiă hơdôm jơlan pơsir hmao tlôn lĕ, bruă ruah mă hơdôm akô̆ bruă lăng tui djru hơduah ĕp dơlăm hloh anô̆ akă dưi ngă, akă ngă giong, tơlơi gun amăng rim bruă wai lăng kơnuk kơna. Bruă lăng tui mơng Khua pơ ala mơnuih ƀôn sang kơ tơlơi ngă khưi khai ƀơi 2 bôh sang ia jrao Bạch Mai hăng Việt Đức mrô 2 lĕ sa bơhmutu ñu. Tơdơi kơ bruă lăng tui mơng Khua pơ ala mơnuih ƀôn sang, Khua dêh čar ta ƀơi anăp pel ĕp 2 rơwang bruă anai hăng rơkâo pơdŏng Grŭp hyu mă bruă pơsit glăi abih bang lom ngă tui rơwang bruă hăng ba tơbiă jơlan pơsir rơđah. Khua pơ ala Nguyễn Anh Trí, Grŭp Khua pơ ala mơnuih ƀôn sang ƀôn prong Hà Nội pơsit anai lĕ hơdră ngă phrâo amăng lăng tui mơng Khua pơ ala mơnuih ƀôn sang, “pơdŏng rah pơgăn rah” hăng bruă pơsit rơđah anăn păn hăng bruă gơgrong mơng bruă akă ngă giong:

 “Grŭp lăng tui mơng Khua pơ ala mơnuih ƀôn sang jơnum hăng gum pơhiăp. Tơdơi kơ anun mơtăm Khua dêh čar ba jơlan hlâo grŭp nao pioh pơsir. Tơlơi anun brơi ƀuh anô̆ tŭ yua mơng bruă lăng tui mơng Khua pơ ala mơnuih ƀôn sang”.

Amăng thun 2022, 4 akô̆ bruă hmâo lăng tui, anun lĕ: Bruă pơkă kual lŏn, bruă ngă tui pơkrem, pơgăn ngă khưi khai; tŭ jum mơnuih ƀôn sang, pơsir tơlơi ƀom kiơng hăng bruă dưm dăp anom bruă čar gưl tơring glông, să. Pran jua 5 mơta sit nik anun lĕ: djơ̆ hăng bôh nik, sit nik, abih pran pơsit, tơpă ară hăng bruă gơgrong prong dưi pơdah rơđah amăng hơdôm akô̆ bruă kiăng lăng tui.

Tal blung a, hơdôm Grŭp lăng tui hmâo jak iâu dong tơlơi gum hrom mơng ƀing juăt bruă hăng khua git gai sa dua bôh ƀirô hmâo bơdjơ̆ nao, Grŭp pơ ala Khua pơ ala mơnuih ƀôn sang kơnong kơ pơphun lăng tui ƀơi hơdôm anih anom mơ̆ Grŭp lăng tui mơng Khua pơ ala mơnuih ƀôn sang hăng Jơnum min apăn bruă Khua pơ ala mơnuih ƀôn sang ƀu hmâo pơphun lăng tui ƀơi anăp lĕ ră anai, ƀing Khua pơ ala Khua pơ ala mơnuih ƀôn sang khom pơphun lăng tui hăng abih bang akô̆ bruă.

Hơdôm bruă ngă akă giong hmâo lăi tơpă kiăng hơkrŭ glăi, hơdôm tơlơi pơkă hơdră bruă dưi ngă tui ha amăng plĕ, pơlir hơbit, hăng wot hơdôm hơdră ngă soh glăi dưi črâo rơđah kiăng jao tơlơi gơgrong, pơsir... Kah hăng lăng tui bruă ngă tui hơdră bruă, tơlơi phiăn kơ tŭ jum mơnuih ƀôn sang hăng pơsir tơlơi ƀom kiơng, tui hăng Kơ-iăng Khua Grŭp wai lăng tơlơi čang rơmang mơng mơnuih ƀôn sang Lưu Bình Nhưỡng, akô̆ bruă lăng tui anai lăng ƀuh tơlơi dŏng yua prong prin mơng mơnuih ƀôn sang. Yua kơ, lăng tui ƀu djơ̆ bruă nao “paih blâo ĕp nam” mơ̆ kiăng pơtrut bruă ngă tui klă hloh, hăng tơdah hmâo thâo tơlơi ngă soh thơ rơkâo hơdôm ƀirô hmâo tơlơi dưi pơsir tui tơlơi pơkă.

 “Pơsit anô̆ klă lĕ hluai tui tơlơi gum pơhiăp mơng mơnuih ƀôn sang. Tui anun hluai tui kơ bôh tơhnal lăng tui kiăng ƀing ta pơsit glăi, dưi pơsit anô̆ klă, bruă gơgrong mơng mơnuih apăn bruă, biă ñu ƀing mơnuih apăn akô̆ amăng bruă tŭ jum mơnuih ƀôn sang”.

Hơnong pơkă bôh tơhnal bruă mă mơng Khua pơ ala mơnuih ƀôn sang anun lĕ djơ̆ pran hăng tơlơi đăo gơnang mơng mơnuih pơ ala. Hăng mơnuih pơ ala – ƀing mơnuih lăng tui kơjăp hơdôm bruă mă mơng Khua pơ ala mơnuih ƀôn sang, pơsit bruă lăng tui mơng Khua pơ ala mơnuih ƀôn sang hmâo pơplih phrâo tañ wot tơlơi pơmin hăng hơdră ngă. Anai lĕ tơlơi gum pơhiăp mơng mơnuih ƀôn sang pơsit:

 “Khua pơ ala mơnuih ƀôn sang hmâo dong lu tơlơi pơlih tui jơlan gah lăng tui mơnuih ƀôn sang, djơ̆ hăng bôh nik tơlơi hơdip. Yua anun lăng tui mơng Khua pơ ala mơnuih ƀôn sang ƀudah tơña mơng Khua pơ ala mơnuih ƀôn sang tô̆ tui mơng Khua pơ ala mơnuih ƀôn sang tal hlâo samơ̆ mă bruă ră anai khut khăt hloh, sit nik hloh”.

Hơdôm tơlơi pơplih phrâo mơng lăng tui djơ̆ kah hăng Khua git gai wai lăng pơ ala mơnuih ƀôn sang Vương Đình Huệ pơtŏng sit, lăng tui khom hluai tui pran jua pơdong; khom dưi ngă tui hơdôm hơdră klă, hơdôm hơdră ngă thâo; lăng tui khom djơ̆ yua kơ tơhnal pơčeh phrâo pơđĭ kyar:

 “Lăng tui khom hluai tui pran jua pơdŏng, kơplah wah pơdŏng hăng pơgăn lĕ pơdŏng ăt jing phun ñu, sui thun; pơgăn lĕ khut khăt, ngă pơđut hăng ječ. Pơdŏng tơlơi phiăn lĕ kiăng pơčeh phrâo pơđĭ kyar. Bruă lăng tui ăt khom yua kơ tơlơi pơčeh phrâo pơđĭ kyar mơn. Khua pơ ala mơnuih ƀôn sang pơplih mă pô na nao drơi pô. Yua anun, rim ƀirô mơng Khua pơ ala mơnuih ƀôn sang khom ngă klă bruă lăng tui, rim Khua pơ ala mơnuih ƀôn sang khom wai lăng mă bruă mơng pô lom ngă tui bruă jao, tơlơi dưi hăng bruă gơgrong ƀơi anăp mơnuih pơ ala kiăng pok tơbiă sa črăn phrâo bă kơ tơlơi klă hiam amăng bruă Khua pơ ala mơnuih ƀôn sang kah hăng črâo ba hăng čang rơmang mơng Khua git gai Ping gah dêh čar ơi Nguyễn Phú Trọng lăi rơđah amăng mông jơnum pok phun Tal jơnum lok sa, Khua pơ ala mơnuih ƀôn sang tal 15”.

Pơtŏng sit mơng Khua git gai wai lăng pơ ala mơnuih ƀôn sang Vương Đình Huệ amăng bruă lăng tui mơng Khua pơ ala mơnuih ƀôn sang ƀu djơ̆ kơnong kơ pơtă pơtăn rim Khua pơ ala mơnuih ƀôn sang ôh mơ̆, rim ƀirô mơng Khua pơ ala mơnuih ƀôn sang khom thâo rơđah bruă gơgrong mơng pô. Lăng tui kiăng “pơdŏng” hơdôm tơlơi klă hiam, yua kơ tơhnal pơkă pơčeh phrâo, pơđĭ kyar khom hmâo tơlơi abih pran jua, bruă gơgrong hăng pran pơsit kiăo tui hrưn đĭ yua kơ bôh tŭ yua hrom mơng mơnuih pơ ala hăng mơnuih ƀôn sang, bôh tŭ yua hrom mơng lŏn ia./.