Mut nao amăng plơi Bhôk, să Yang Tao, tơring glông Lăk agaih hiam, dua bơnah jơlan hơmâo pla bơnga. Yang hrơi mơmot, jơlan hơmâo tŭi apui rơđah bơngač ngă kơ ƀuôn Bhôk hiam hloh dong. Tơlơi hơdip mơng neh met wa amăng plơi ăt amăng ƀrư̆ pơplih tui, pơdrong tui laih, mrô sang anŏ rin thun 2022 hrŏ trun 9 boh sang anŏ pơhmu hăng 2021. Tui hăng ayong Y Al Trei, Kơ-iăng khua ping gah plơi, khua plơi ƀuôn Bhôk, abih bang tơlơi pơplih anai lêng kơ tơlơi hơmâo sit nik mơng Tơlơi pơtrun mrô 02 hăng Tơlơi pơtrun mrô 05 mơng Ping gah tơring glông Lăk, lăp djơ̆ hăng tơlơi kiăng khăp mơng mơnuih ƀon sang:

“Ta iâu ană plơi jơnum či pơtô lăi ngă bruă, hơdră ngă bruă mơng Tơlơi pơtrun mrô 2 jing tơlơi hơget, giong anun Tơlơi pơtrun mrô 05 jing ngă hiư̆m pă, yua dah Tơlơi pơtrun mrô 2 ñu tui anai, jơlan nao rai hơmâo apui, dua bơnah jơlan hơmâo pla bơnga, laih anun Tơlơi pơtrun mrô 5 pơtô brơi neh met wa pla boh troh, rông kơbao, rơmô. Tơdơi kơ mông jơnum pơtô lăi dua, klâo wơ̆t tui anun, jing ta nao pơtô lăi, iâu pơthưr rim boh sang hăng ta pơtô pơblang tui glông facebook, Zalo kiăng ană plơi thâo rơđah hloh”.

Tơlơi pơtrun mrô 02 hăng mrô 05 mơng Khul khua apăn bruă git gai ping gah tơring čar Lak thun 2022-2025 glăk hơmâo pok pơhai abih bang ƀơi să amăng tơring glông. Amăng anun Tơlơi pơtrun mrô 02 kơ iâu pơthưr abih bang tơlơi hơmâo, kiăng akŏ pơdong hăng pơđĭ kyar tơring glông Lăk jing kual tuai hyu čuă ngui phun mơng tơring čar amăng thun 2030. Tơlơi pơtrun mrô 5 kơ bruă pơplih phun pla, hlô rông rơwang thun 2021-2025. Ngă tui 2 tơlơi pơtrun anai, ƀuôn Bhôk hơmâo pok pơhai pơkra rơbêh 2.500 m jơlan hơmâo apui tŭi rơđah, pla 325 phun bơnga hoa giấy ƀơi hơdôm anih mut nao amăng plơi. nua 2 ring bruă anai giăm 40 klăk prăk yua mơnuih ƀon sang pơčruh mă. Ƀuôn Bhôk ăt hơmâo djru brơi giăm 1000 phun boh troh djŏp djuai djru ba sang anŏ rin. Amai H’Nguyệt Hatrơi, ƀơi ƀuôn Bhôk brơi thâo, ƀu kơnong brơi anah phun pla đôč ôh, ƀing khua pơtrut ngă hmua ăt nao tơl đang pơtô brơi hơdră pla klă kiăng hơmâo prăk hloh:

“Kâo bơni kơ Ping gah, Kơnuk kơna hơmâo djru ba sang anŏ kâo anah phun pla. Khua plơi lăng ba biă kơ sang anŏ gơmơi. Kâo amra gir wai lăng, rông phun boh troh kiăng hiam, mơboh kiăng tơdơi anai hơmâo prăk blơi gơnam hnun hnai amăng sang anŏ”.

Tui hăng ơi Nguyễn Văn Huyên, Khua git gai Ping gah să Yang Tao, tơring glông Lăk, kiăng jơlan hơdră ngă bruă mơng Ping gah dưi mă yua amăng tơlơi hơdip, yôm biă ñu lĕ ƀing khua plơi mơn. Biă ñu lăng kual mơnuih ƀon sang djuai ƀiă, tơdah ƀing khua thâo rơđah kual lŏn, dŏ jê̆ giăm hăng ană plơi, ngă bruă hơdeč, pơčeh phrâo amra ba tơlơi pơtrun mơng Ping gah truh tañ hloh hăng mơnuih ƀon sang.

“Ră anai mơnuih ping gah thun hlăk ai kah hăng ayong Y Al Trei lêng ngă khua plơi soh. Amăng mông krăp lăng, pô anai lêng kơ pơtrut tui tơlơi gơgrong bruă laih anun ăt ngă klă mơn bruă mă amăng plơi. Phrâo anai, ngă tui tơlơi pơtrun mrô 5 hăng mrô 2, pơƀut 2 tơlơi pơtrun anai brơi ƀing khua plơi, khua ping gah plơi git gai hăng iâu pơthưr abih bang tơlơi hơmâo jao kơ plơi pla, iâu pơthưr neh met wa pơčruh prăk pla bơnga hăng pơkĕ hrĕ apui lơtrik tŭi rơđah jơlan, phrâo anai buôn Bhôk hơmâo pơkra apui tŭi ƀơi jơlan, mơnuih ƀon sang lêng kơ tŭ ư soh”.

Ƀing mơnuih ping gah djuai ƀiă mă bruă rơgơi tui hăng ayong Y Al Trei glăk djru prong biă mă amăng bruă pơtô pơblang, ba jơlan hơdră ngă bruă mơng Ping gah, tơlơi djru mơng Kơnuk kơna truh pơ neh met wa, amăng ƀrư̆ djru neh met wa pơplih tơlơi pơmin, bruă mă kiăng hơmâo tơlơi hơdip jai hrơi klă hloh./.

https://cms-vov4.vov.vn/jarai/cran-hodra-konuk-kona-hang-hodip-moda-chinh-sach-va-cuoc-song/y-al-trei-monuih-ping-gah-djuai-ania-mnong-ba-jolan-hlao-414887.vov4