Hrom hăng anun, neh wa Jarai ƀơi anai blung a pơplih phrâo, pơplih phiăn juăt ngă đang hmua, djru ba glăi bôh tơhnal bơwih ƀong dưi pơđĭ tui prong. Anai lĕ hơdôm phun than yôm phăn pioh mơnuih ƀôn sang ƀơi guai dêh čar pơđĭ kyar bơwih ƀong – mơnuih mơnam, pơdŏng tơlơi hơdip mơda jai hrơi drơi pơđao, yâu mơ-ak hloh.

Thun anai lĕ thun blung a, hnoh ia pơđoh ia mơng Ring bruă hnoh ia Ia Mơr hmâo pơkra giong, pơđoh ia nao pơ̆ hmua mơnuih ƀôn sang plơi Klah, să Ia Mơr. Anai ăt lĕ thun blung a, neh wa djuai ania Jarai ƀơi Ia Mơr ngă hmua pơdai hlâo adih kơnong kơ dưi ngă hmua pơdai kơdư. Ơi Siu Thọ - Khua plơi brơi thâo, amăng akô̆ bơyan ngă, neh wa dô̆ hmâo lu tơlơi akă juăt, samơ̆ pơdai pơhrui glăi ăt hmâo mơn 4 tơn/1ektar, lu hloh 4 wot hmua kơdư. Bôh tơhnal anai djru hơdôm bôh sang anô̆ mơnuih ƀôn sang amăng plơi phing kơ pran pok phun ngă hmua pơdai phang:         

“Hlâo adih ngă sa bơyan pơdai pơhrui rim thun kơnong kơ hmâo mơng 1-2 tạ pơdai đôč, ră anai dưi ngă dua bơyan rim thun pơhrui hmâo mơng 7-8 tơn lom sa ektar. Neh wa ră anai yua pơjeh pơdai phrâo hmâo lu bôh, neh wa mơ-ak biă. Bơni kơ Ping gah, Kơnuk kơna hmâo djru laih neh wa”.    

 Hrom hăng ring bruă hnoh ia prong ngă tui ba glăi bôh tơhnal, anih anom sĭ kơ su ăt hơkrŭ glăi rơđah hloh mơn, djru hơdôm bôh anom bơwih ƀong, bơwih ƀong huă pơđĭ kyar, pơjing dong bruă mă hăng hơđong prăk pơhrui glăi kơ mơnuih mă bruă ƀơi plơi pla. Ayong Rơlan Bên, tơkeng thun 1995, ƀơi plơi Khôi, să Ia Mơr mơ-ak brơi thâo, thun anai rơnoh prăk blan mơng 2 rơkơi bơnai hơđong ƀơi rơnoh mơng 13 truh kơ 15 klăk prăk sa blan. Rơngiao kơ anun, sang anô̆ dô̆ hmâo 2 ar đang kơ phê, 6 ar hmua pơdai hăng hơdôm drơi rơmô, anun ăt hmâo mơn anô̆ ƀong, anô̆ huă, anô̆ pioh lui:

 “Dong mơn hrơi mă bruă kơ Sang bruă kơ su gơñu jao kuăh mă kơtăk kơ su amăng 3 thun, tơdơi kơ 3 thun kâo mă prăk anun pơkra sang dô̆ abih 200 klăk prăk. Thun dơi dong lĕ kâo amra pơplih rơdêh phrâo 57 klăk djuai rơdêh Sonic, laih anun prăk brơi kơ ană bă hrăm hră. Amăng sang blơi prăp djop mơta gơnam mă yua, ră anai sang anô̆ hơđong laih. Hlâo adih sang anô̆ kâo tơnap tap biă, ră anai lĕ huăi bơngot kơ asơi huă añăm ƀong, tơnap tap dong tah”. 

      Ia Mơr lĕ să guai dêh čar hmâo phiăn juăt ngă hơkrŭ, glăi dưi pơkra jơlan klă hiam hăng čơkă lu tơhnal pơđĭ kyar phrâo. Ơi Nguyễn Tuấn Anh – Kơ-iăng Khua Jơnum min mơnuih ƀôn sang să brơi thâo, apui lơtrik hmâo dăng hyu laih ƀơi djop plơi pla; hơdôm ring bruă kah hăng sang jơnum plơi pla, sang hră, sang ia jrao ăt dưi pơkra glăi mơn, pơkra phrâo ha amăng plĕ. Biă ñu, jơlan nao rai amăng krah plơi pla, amăng đang hmua truh kơ jơlan tơring čar leng kơ pơkra giong hăng glăk pơkra giong, djru Ia Mơr tô nao rai jơlan sĭ mơdrô gêh gal. Ơi Nguyễn Tuấn Anh pơtŏng sit:  

 “Jơlan nao rai ră anai ăt hơđong laih mơn, pơkra ƀiă giong laih jơlan tơring čar 665 hăng hnoh ia amăng hmua. Anai lĕ hơdôm tơlơi yôm phăn pioh neh wa mơnuih ƀôn sang rô nao rai pơgiăng gơnam tam, pơtrut bơwih ƀong ƀơi să Ia Mơr pơđĭ kyar”. 

Khă tơlơi hơdip tơnap mơng mơnuih ƀôn sang să Ia Mơr, tơring glông Čư̆ Prong dô̆ lu tơlơi tơnap, samơ̆ hrom hăng tơlơi lăng ba tuh pơplai mơng hơdôm gưl gong gai, neh wa djop djuai ania ƀơi anai glăk jai hrơi hmâo lu tơlơi gal hloh, pơjing phun than pioh djru neh wa gir run hrưn đĭ pơdŏng tơlơi hơdip trơi pơđao, pơđĭ kyar; djru djă pioh hơđong ƀơi kual guai dêh čar gah Yŭ mơng Lŏn ia./.