VOV.Jarai - Tơring čar Dak Lăk glăk ječ ameč dăp glăi ngă hơbôt sang hră kơnuk kơna akŏ pơdong, him lăng pơhrŏ giăm 50%. Hrom hăng lăng glăi, dăp glăi sang hră, anih hrăm, hơdôm boh tơring hăng sang hră pơtrut hyu pôr pơhing, thâo anŏ či kiăng, hơmâo abih bang tŭ ư, pơhlom dăp glăi huăi bơbeč kơ bruă hrăm hră mơ̆ng ƀing čơđai amăng thun hrăm phrâo.

VOV.Jarai - Prăp rơmet kơ thun hrăm phrâo 2026-2027, hrŏm hăng bruă man pơgiong hĭ tañ, tơring čar Quảng Ngãi glăk pơƀut ruah čơđai hrăm, nai pơtô hăng gơnam yua či ba 4 boh sang hră kơnuk kơna čem rông pơƀut gưl sa hăng gưl dua ƀơi hơdôm boh să pơ guai dưi mă bruă djơ̆ bruă jao.

VOV.Jarai-Pơblih pơjeh djuai phun pla, ba yua boh thâo ia rơgơi phrâo hăng prăp lui hơdră pơđĭ kyar tơlơi bơwih ƀong huă djru mơnuih ƀôn sang djuai ƀiă Lâm Đồng pơđĭ tui rơnoh prăk pơhrui glăi, kiăng pơklaih mơ̆ng ƀun rin. Hrŏm hăng anŏ gêh găl hơmâo mơ̆ng jơlan hơdră dêh car djru, pơtrut bruă pơblih tơlơi pơmin, hơdră ngă bruă mơ̆ng mơnuih ƀôn sang jing anŏ phun pioh pơhrŏ ƀun rin hơđong kơjăp.

VOV.Jarai-Jing sa boh să blung a tơring čar Gia Lai dưi ruah mă pioh man pơdong plơi pla phrâo jing “Să phun ba yua mrô”, anun lĕ să Tây Sơn hlăk ngă pơblih phrâo kơtang ba yua ia rơgơi mrô amăng bruă pơblih hơdră ngă hră pơar kơ ană plơi pla, pơđĭ kyar amăng bruă kơnuk kơna ba yua mrô hăng pơtrut pơđĭ kyar bơwih ƀong huă mrô. Mơ̆ng hơdôm boh tơhnal dưi ngă blung a, tơring čar Gia Lai hơmâo pơtong rơđah, hơbô̆ bruă hiam klă anai pơlar tui truh 30 boh să, kiăng akŏ pơjing atur ba yua mrô sa hnơ̆ng mơ̆ng gưl plơi pla.

VOV.Jarai - Pơ guai dêh čar ƀơi hơdôm boh să Tuy Đức, Dak Wil tơring čar Lâm Đồng, apui lơtrik dêh čar glăk hơmâo ba nao truh plơi pla ataih yaih, djru đĭ kyar bơwih ƀong huă hăng pơgang ba lŏn ia ta. Apui ba glăi tơlơi hơdip phrâo pơ guai dêh čar.

VOV.Jarai-Rim bơyan hơjan hlim truh, lu sang anŏ mơnuih ƀôn sang ter hang ia Ayun, gah să Ia Hiao, tơring čar Gia Lai bơngơ̆t biă mă, hŭi truh sat kơ tơlơi hơdip mơda, răm ƀăm kông ngăn lŏn adai ngă. Kiăng djru mơnuih ƀôn sang hơdip hơđong hloh ƀơi anăp tơlơi truh sat ia ling dăo na nao rim thun, tơring čar Gia Lai hơmâo pok pơhai kơčăo bruă pơdong glăi plơi phrâo dŏ hơđong, dong kơjăp brơi kơ mơnuih ƀôn sang kual ia juăt lip ƀơi să Ia Hiao. Thun blan laih rơgao, hơmâo tơlơi tŭ ư hrŏm mơ̆ng mơnuih ƀôn sang, pơdong plơi phrâo dưi akŏ pơjing kiăng djru mơnuih ƀôn sang hơđong anih anŏ dŏ anŏ ƀong huă ngă bruă hmua pla mơnong.

VOV.Jarai - Mơ̆ng hơdôm boh plơi pla găn rơgao lu rơnuk ơi yă hơdip mơda, lu plơi pla ƀơi Dak Lăk phrâo hơyak nao sa bruă dăp glăi plơi pla phrâo. Anai ƀu kơnong pơphun dăp glăi plơi pla kiăng ngă hơbôt anom bruă kơnuk kơna đôč ôh, ăt jing tơlơi jŭ yap ngă bơkơnar djŏp mơta, plah wah pơđĭ tui boh tŭ yua wai lăng hăng djă pioh gru grua, tơlơi phiăn juăt hăng tơlơi gum pơgôp, khăp ƀu-eng mơ̆ng plơi pla. Ƀơi phường Ea Kao, bruă dăp glăi plơi pla hơmâo mơnuih ƀôn sang tŭ ư abih bang laih.

VOV.Jarai-Mơguah kơnôl 9/7, Khua dêh čar ơi Lê Minh Hưng git gai jơnum blung a mơ̆ng Khul git gai ngă tui djop Jơlan hơdră mơ̆ng dêh čar djru, tơdơi kơ ngă kơjăp glăi amăng bruă mă.

VOV.Jarai-Tơring čar Dak Lak glăk pơplih ƀơƀrư̆ mơng tơlơi pơmĭn pok prong lŏn ngă đang hmua hơdai nao hrưn đĭ rơnoh pơhrui mơng rĭm blah đang hmua. Hrŏm hăng bruă pơjing kual ngă hmua yua boh thâo phrâo, pơđĭ kyar ngă hmua rô nao rai hăng prap lui lŏn mơnai kiăng pơhưč anom bơwih ƀong ngă hmua pơprong, tơring čar glăk ƀơƀrư̆ pơjing bruă ngă hmua pơplih phrâo, hơđong kjăp.

VOV.Jarai-Ƀơi hơdôm blah đang hmua či kơdư kơnua čư̆ să Tu Mrông, tơring čar Quảng Ngãi, (tơring glông Tu Mrông, Kon Tum hơđăp), rơbêh 1 klăk phun kơphê phrâo ba pla, pok brơi bruă ngă akŏ pơjing kual pla kơphê sa anih, pơsir tơlơi bơwih ƀong huă kơ mơnuih ƀôn sang Sedang.