VOV.Jarai-Anih tuai hyu čuă ngui amăng kual plơi pla hlăk jing anăp ngă bruă hơđong tong ten hloh ră anai ƀơi tơring čar Dak Lak amăng jơlan mut phung hăng jar kmar. Ƀơi djop plơi pla, ƀôn lan, dŏ hrŏm, mă bruă hrŏm, găn rơgao dŏ glăi amăng sang anŏ mơnuih ƀôn sang ƀôn sang djuai ania Êđê tuai hor biă mă. Dŏ amăng sang gru đưm sang hăng ngŏ pơdong hăng kyâo pơtâo, hmư̆ ik jua čing, ing jua hơgor, truh pơ bruă nao pơ hmua, hrŏm hăng pô sang amăng plơi tuai amra găn rơgao ĕp lăng bruă mă rim hrơi…lu gru grua hiam dŏ djă pioh tuai tơña bla, ĕp lăng, dŏ hrŏm jĕ giăm biă mă. Găn rơgao djơh hăng amăng plơi pla, ƀing tuai jar kmar thâo hluh lu hăng pơpŭ kơ gru ama grua amĭ djuai ania Êđê, pơgop hrŏm bruă dưi pơtruh nao rai plơi pla mơ̆ng Dak Lak hăng rŏng lŏn tơnah.

VOV.Jarai -  Mut amăng thun phrâo 2026, ƀơi plơi pla djuai ania Chăm, să Bắc Bình, tơring čar Lâm Đồng dŏ pơplih dong mơn, hăng lu ia iŏm hiam ƀhêm, bang bơngač. Plơi pla trơi pơđao, yâo mơak ƀu kơnong jing tơlơi plih phrâo plơi pla đôč ôh, ăt hơmâo bruă bơwih ƀong mơ̆ng rim sang anŏ hăng tơlơi hơdip mơnuih ƀôn sang Chăm pơ anai dong.

VOV.Jarai-Ƀơi tơring čar Lâm Đồng, gah yŭ tơkai čư̆ Lang Biang hing ang, anih hơmâo hnoh ia Tiă rô na nao rim blan hăng glai đang kyâo hơngô djơ djơr mơñi sit angin pưh, hơmâo sa čô ană bă djuai ania K’Ho pioh ƀiă abih tơlơi hơdip pô djă lui bơngăt jua gru grua hiam plơi pla, laih dơ̆ng râo pơdưh jua suă pran pơđĭ kyar kơ plơi pla. Anun lĕ tha plơi ơi Čil Kwuyên-sa čô ană bă djuai ania K’Ho, ƀô̆ mơta ba gru hlâo amăng bruă hrăm laih anun hla tui tơlơi pơmin, pran jua, tơlơi dŏ dong ƀong huă hiam mơ̆ng Hồ Chí Minh.

VOV.Jarai-Gah yŭ tơring čar Gia Lai, anih hơmâo lu plơi pla Jarai hơbai dŏ tơnap tap, jai hrơi ƀuh lu hlăk ai mơnuih djuai ƀiă khin pơmin, khin ngă, prăp lui hơduah ĕp jơlan gah nao phrâo pioh hrưn đĭ amăng kual lŏn plơi pla pô. Ƀu hmư̆ dơnai kơtang, jơlan ngă bruă dik dăk mơ̆ng pơphun bruă mă ah hăng anih pơkŏn ôh, hơdôm tơlơi greh gruñ pơphun bruă mă hơmâo mơ̆ng gru grua đưm, gơnam yua, kông ngăn phara mơ̆ng plơi pla, pơsit khut khăt tơgŭ ngă bruă hrăm brơi hruaih. Hoàng Qui hơmâo tơlơi čih lăi nao kơ tơlơi anun tui anai.

VOV.Jarai-Mut hrŏm hăng bruă bơwih brơi tuai čuă ngui dik dak mơ-ak klă ƀơi kual Dap kơdư, Gia Lai glăk ƀơƀrư̆ pơsit tơlơi dưi mơng kual čư̆ siăng mơtah hăng lu kual glai rưng hiam. Mơng tơlơi gal anai, tơring čar pơsit ruah jơlan gah pơđĭ kyar tuai čuă ngui amăng glai rưng pơlir hăng bruă djă pioh, ƀơƀrư̆ pok rai rơnoh pơđĭ kyar, anăp nao ba bruă tuai čuă ngui jing atur bơwih ƀong huă yôm phăn amăng rơwang phrâo.

VOV.Jarai-Amăng tơlơi hơdip kual mơnuih djuai ania ƀiă tơring čar Dak Lak, hrŏm hăng anih anom kơđi čar ƀon lan, ƀing mơnuih arăng đăo gơnang lĕ ƀing mơnuih gơgrong yôm phăn amăng bruă pơtrut pran gum pơgôp djop djuai ania, wai pơgang rơnuk rơnua hăng pơtrut pơđĭ kyar bơwih ƀong huă-mơnuih mơnam. Ƀing gơñu arăng lăng kar hăng “ƀing mơnuih gơnang nao” samơ̆ kjăp amăng pran jua mơnuih ƀôn sang, jing ƀing pơtruh nao rai pran đăo gơnang kơplah wah gưl Ping gah, gong gai hăng mơnuih ƀôn sang ƀơi ƀon lan.

VOV.Jarai-Tơdơi kơ tal hơjan hlim, ia ling dăo kơtang ngă aka ƀu hơmâo djơ̆ ôh mơ̆ng hlâo, lŏn mơnai ƀơi hang ia rơsĭ Nha Trang hơmâo rơmet agaih, pơhlom hơdjă, rơnuk rơnua laih anun pơphun brơi kơ tuai pơwơ̆t glăi hyu ngui kah hăng tơđar. Mơnai čuah hang ia rơsĭ lăng hiam tơbung tơbang, ia rơsĭ jơngeh mơtah mơda hlơ hleč, bruă bơwih brơi kơ tuai hyu ngui pơphun dik dăk, tuai tơbiă hyu ngui jai hrơi lu tui yơh, tơlơi hơdip mơda mơak glăi pơ anih tuai hyu ngui hmư̆ hing ƀơi Khánh Hòa.

VOV.Jarai-Plơi Canh Tiến, amăng să Canh Vinh, tơring čar Gia Lai hăng lu hloh lĕ mơnuih djuai ania ƀiă dŏ hơdip hrŏm. Dong mơng blan 4 thun anai, lơm apui kơđen rơđah bơngač mơng glông hrĕ apui lơtrik dêh čar amăng hơdôm boh plơi pla čư̆ siăng tơnap tap, tơlơi hơdip phrâo pok rai. Kơnong ha mơkrah thun, apui lơtrik ba glăi tơlơi pơplih phrâo tong ten brơi mơnuih ƀôn sang ƀơi anai.

VOV.Jarai-Tuh pơ alin man pơdong amăng sang čơ kual čư̆ siăng lĕ tơlơi yak nao akŏ phun amăng hơdră pơđĭ kyar sĭ mơdrô kual čư̆ siăng amăng tơring čar Quảng Ngãi. Hrŏm hăng bruă pơgiong bruă dưm dăp, jak iâu gum pơgôp mơng mơnuih mơnam hăng pok pơhai hơdôm jơlan hơdră tui hơnong pơkă dêh čar, tơring čar glăk ƀơƀrư̆ man pơdong lu sang čơ̆ pơplih phrâo, pơlir bruă pla pơjing hăng blơi gơnam, djru brơi mơnuih ƀôn sang kual čư̆ siăng hơmâo lu dong prăk pơhrui, pơplih tơlơi hơdip mơda.

VOV.Jarai-Tơdơi kơ 4 blan ngă tui hơbô̆ bruă gong gai kơnuk kơna dua gưl, djop să amăng tơring čar Quảng Ngãi hơmâo pơpha jao bruă mă hruaih.Samơ̆, amăng čăl blung a phrâo pơphun bruă mă, lu anih dŏ sư̆ rơbư̆, ƀu ƀiă ôh tơlơi tơnap tap kơƀah hăng rơbêh mơnuih mă bruă, tơlơi thâo hăng gơnam yua hrĕ dăng kông mơ-it tơlơi pơhing aka ƀu klă. Tơring čar Quảng Ngãi hlăk pơtrut pok pơhai lu hơdră pơsir hĭ, djru ba djop bruă mă kiăng tŭ yua hloh.