Mut nao ƀu hơmâo sĭ wĕ ôh, kơnong hơmâo pơtâo hăng pơtâo kli, hlơi hlơi sit hơmâo nao pơ anih hiam anai, lăng pơtâo kli Đá Điã, amra găn nao pơ plơi boh pơtâo anăn plơi Phú Hạnh. Phrâo anai, plơi anai hmư̆ hing amăng plang internet hăng pơhưč lu tuai ataih hăng jĕ giăm nao ngui, ĕp lăng plơi pla pơtâo kli. Anih anai ƀu kơnong lăng hiam rô̆ đôč ôh, dŏ djă pioh lu gru nam đưm đă pioh glăi. Sa tơlơi kiăng lăi, plơi anai ăt dŏ djă pioh lu ia bơmun hăng pơtâo, ia jơngeh hlơ hleč hăng rơ-ơ̆ biă mă. Mơnuih kơsem min, rơgơi kơhnâo gru phun dêh čar, Nguyễn Danh Hạnh lơ̆m nao sem lăng kông ngăn gru grua pơtâo kli plơi Phú Hạnh, ñu ĕp lăng ia bơmun amăng boh pơtâo kli, ñu lăi:

“Giong ĕp lăng ƀing gơmơi ƀuh lĕ hơdôm boh ia bơmun anai hơmâo thun năng ai truh 200 thun laih. Kâo pơmin tơlơi anun kiăng hơmâo bruă wai pơgang pioh tơdơi anai, kiăng ĕp glăi gru phun kơ sa rơnuk ơi yă amĭ ama đưm đă pơjing rai kiăng bơwih brơi tuai rơnguai hyu ngui ĕp lăng”.

Hrŏm hăng boh pơtâo kli, plơi Phú Hạnh dŏ pơhưč arăng hor nao ĕp lĕ, jơlan rô nao rai hăng pơtâo soh, rôk tui pơnăng hăng war pơga bư̆ hăng pơtâo hiam phara biă mă, dŏ djă pioh gru nam thun blan mơ̆ng đưm đă. Hrŏm hăng anun, ƀơi kơčep pơtâo lĕ phun bơnga rơma mơta ia iom, bơnga sống đời, bơnga drơi xương rồng čăt đĭ, dưi dŏ hơdip ƀơi pơtâo kli pơ-iă hlor, hơjan ia tơhroh hai ăt kơjăp tlep hăng pơtâo kli. Nao pơ plơi Phú Hạnh, lu mơnuih ƀuh hling blang biă mă, yua dah lu sang pơdong hăng boh pơtâo, drông rông bui, rơmô kơbao hai ăt ngă hăng boh pơtâo soh, tơl pơsat ăt ngă hăng pơtâo soh. Abih bang pơjing rai anih anom amăng plơi pla bă hăng boh pơtâo soh, anun jing kông ngăn plơi pla yua mơ̆ng đưm hơmâo laih.

Ƀơi plơi Phú Hạnh hơmâo jơlan dăp boh pơtâo mơ̆n, ter glông phun kyâo pơprong, đĭ nao pơ kơdư čư̆ Cố Thạch. Mơ̆ng kơdư anai lăng hyu pơ ia rơsĭ ƀuh bul pơtâo Hòn Yến, tong wing Xuân Đài hăng mơnai ia rơsĭ čuah či kơdư Cổ Thạch ƀơi anăp. Tuai rơnguai nao pơ anun, sit mơ̆n amra ƀu her đuăi ôh, yua hiam mơak đơi. Ăt kah hăng lu tuai tal blung a nao pơ plơi Phú Hạnh hăng đĭ nao pơ kơdư čư̆ Cổ Thạch, ayong Nguyễn Chí Tường, tuai mơ̆ng tơring čar Đồng Nai hơk mơak lăi:

“Kơdư hiam đơi, lăng hrup pơ kual Mi kô̆, kâo hor biă mă pơnăng hăng jơlan pơtâo kli tơthă hiam, dŏ ber ƀơi pơtâo kli, arăng dăp lui rim tal mơak biă, kâo pơmin rai pơ anai lăp ư ang yơh”.

Găn rơgao lu rơnuk thun bơyan blan đuăi nao, adai hơjan hăng pơđiă hai, hơdôm ring bruă hăng boh pơtâo plơi Phú Hạnh ăt dŏ na nao hăng thun blan đôč, pơjing rai gru grua hiam phara hơjăn. Ơi Nguyễn Lâu, plơi Phú Hạnh, să Tuy An Đông, tơring čar Dak Lak pơ-ư ang biă mă hơmâo kông ngăn lŏn pơtâo kli amăng plơi pla, dŏ djă pioh na nao đôč laih anun ră anai, yua hơmâo anŏ anun yơh ñu čơkă tuai hyu ngui, ĕp lăng pơ anai.

“Tuai rai pơ anai, jak kâo, brơi ba nao gơñu đĭ pơ kơdư cổ thạch, gơñu tơña kâo pơtâo anai hiư̆m pă, kâo lăi pơthâo pơtâo hơmâo mơ̆ng đưm đă laih, ơi yă đưm adih pô dăp pơkra lui ƀu hơmâo pơsir, man hăng simăng ôh, samơ̆ ăt kơjăp phik mơ̆n. Mơ̆ng rơnuk đưm truh ră anai dŏ na nao hnun đôč”.

Lu anih amăng plơi Phú Hạnh ră anai dŏ djă pioh hơdôm ring bruă hăng pơtâo, lir hơbit hăng tơlơi hơdip mơda mơnuih ƀôn sang pơ anai. Anai ƀu kơnong anih djă pioh kông ngăn boh pơtâo hơmâo laih mơ̆ng hlâo đôč ôh hăng lu mơta gơnam hơmâo pơjing rai rơgao hơdôm rơtuh thun hăng anai, jing sa rup rap hiam rô̆ biă mă yua lŏn adai glai klô pơjing rai, pơhưč pran jua ƀing tuai hor nao ngui ĕp lăng hơduah tơña kơ gru phun đưm đă hăng anŏ hiam hnơ̆ng hnăi plơi pla kual lŏn hơmâo kông ngăn yom phara biă mă.