Jing tơlơi juăt yơh, rĭm mơguah, amai Kơ Să K’Hà (djuai ania K’ho) dŏ amăng ƀut plơi 4, să Đam Rông 4, tơring čar Lâm Đông tơgŭ mơng mơguah sing bring brơi kơ hlăt ƀong. Hơdôm tơdŭ phun kơbuă mơtah mơda hơmâo đŏi glăi yang hrơi hlâo anun pioh čem brơi hlăt mrai. Amai K’Hà brơi thâo, hlâo adih, sang anŏ ñu kơnong pla kơphê hăng hơdôm phun pla ƀiă hrơi, samơ̆ pơhrui ăt ƀu hơmâo lơi. Ngă tui tơlơi črâo trun pơplih phun pla amăng ƀon lan, hrŏm hăng bruă pơtô pơblang, pơsur mơng ƀing apăn bruă Khul đah kơmơi să, thun 2022 sang anŏ ñu khin hơtai pơplih ha bơnah đang hmua pla kơphê hơdai nao pla phun kơbuă, rông hlăt mrai.

“Kâo lăi hăng rơkơi kâo lĕ sang anŏ gơmơi kiăng pla phun kơbuă hlâo, tơdơi anun mut hrŏm anih pơtop hrăm rông hlăt mrai kiăng thâo bruă rông hlăt, lơm hlăt mrai djơ̆ kman kah mơng tañ thâo hăng pơjrao brơi. Tơdơi kơ pla phun kơbuă, sang anŏ gơmơi rơkâo blơi dua lạng ha mơkrah hlăt. Tal rông lông lăng anun, sang anŏ gơmơi dưi pơhrui 20 kilogam hruh hlăt ană, mơng anun ƀing gơmơi pơplih hơmâo dong prăk pơhrui hăng hơmâo dong bruă mă mơng bruă rông hlăt mrai”.

Rông hlăt mrai ba glăi pơhrui lu samơ̆ ăt amuñ ngă rơngiă mơn yua hlăt amuñ djai lơm ayuh hyiăng pơplih. Hlăt mrai ƀă kman ngă djai lu biă mă, anai lĕ tơlơi bơdjơ̆ mơng ayuh hyiăng, măt gơnam ƀong yua ia jrao pruih brơi phun pla, hăng bơdjơ̆ sat nao hlăt pioh rông. Hăng sang anŏ amai Kơ Să K’Hà ăt tui anun mơn; lơm pă wŏt rông lêng kơ răm, hlăt djai lu biă mă, khŏm tuh đuăi. Đa ñu pơmĭn ƀu gưt rông dong tah.

Samơ̆ hăng pran gir run ngă tui tơlơi črâo trun pơplih phun pla, sang anŏ amai Kơ Să K’Hà tŏ tui tuh pơ alin pơđĭ kyar bruă pla phun kơbuă rông hlăt mrai. Tal blung a pơhrui glăi 7 klăk, đa dưi pơhrui rơbêh 10 klăk prăk. Thun 2025, pơhrui mơng bruă pla phun kơbuă rông hlăt mrai mơng sang anŏ rơbêh 50 klăk prăk tơdơi kơ duh hĭ prăk tuh pơ alin.

Hơbô̆ bruă mơng amai Kơ Să K’Hà ƀu djơ̆ kơnong ba glăi boh tŭ yua amăng bơwih ƀong huă kơ sang anŏ đôč ôh mơ̆ ăt ngă lar hyu amăng mơnuih mơnam, pơgôp ngă hơkrŭ pran đăo gơnang mơng ding kơna đah kơmơi amăng tơlơi črâo trun pơplih ngă hmua ƀơi ƀon lan. Amai Kơ Să K’Bích- Khua khul đah kơmơi ƀut plơi 4-ră anai lĕ Khua grup pơlir hơbit pla phun kơbuă rông hlăt mrai să Đam Rông 4 brơi thâo, ră anai hơmâo giăm 30 čô ding kơna, amăng anun hơmâo 20 čô ding kơna tŏ tui bơwih ƀong na nao. Mơng anun, ƀing ding kơna ƀu djơ̆ kơnong pơlăi nao rai tơlơi găn rơgao amăng pla phun kơbuă rông hlăt mrai đôč ôh mơ̆ ăt kơtưn pran gum pơgôp, djru tơdruă amăng tơlơi hơdip mơda.

“Hơbô̆ bruă anai hơmâo akŏ pơjing hăng hơnong pơkă pơlir hơbit, pơlăi nao rai tơlơi găn rơgao amăng rông hlăt hăng djru tơdruă. Pơhmutu lơm kơƀah hla kơbuă ƀudah kơƀah tơdŭ, ƀing adơi amai djru nao rai. Bruă blơi hlăt rông yua rĭm boh sang anŏ nao ĕp mă, anun lĕ nao blơi pơ kông ti Duy Phương ƀudah hơdôm anih pơkŏn, grup pơlir hơbit ƀu tek nao ôh bruă anai”.

Amăng bruă mă, kiăng kơtưn pơlir hơbit kơplah wah ƀing ding kơná, grup pơlir hơbit pla phun kơbuă rông hlăt mrai să Đam Rông 4 hơmâo pok grup Zalo, Facebook kiăng pơlăi nao rai tơlơi pơhing, pơlăi nao rau hăng hrăm tui tơdruă amăng bruă rông, sĭ mơdrô gơnam. Hluai tui hơbô̆ bruă anai, ƀing adơi amai ƀu djơ̆ kơnong hơmâo dong prăk pơhrui đôč ôh mơ̆ ăt thâo hluh dong amăng pơplih phun pla, hlô rông, ƀơƀrư̆ thâo rơđah ƀiă dong hăng pơplih tơlơi pơmĭn amăng bruă mă. Amai Kơ Să K’Bích brơi thâo dong:

“Amăng bruă pơtô pơblang pơplih phun pla, Khul đah kơmơi ăt pơlir bruă pơtô pơblang lui hĭ tơlơi phiăn ƀu klă hiam. Samơ̆, tơlơi anai kiăng ngă tui sui pơ anăp. Čang rơmang pơ anăp anai, ƀing adơi amai amra hluh rơđah ƀiă dong, samơ̆ hơdôm tơlơi phiăn ƀu klă hiam amăng ngă hmua hăng tơlơi hơdip ngă pơgăn bruă pơđĭ kyar amra ƀơƀrư̆ lui hĭ. Tơlơi pơmĭn pơplih ngă tơlơi hơdip jai hrơi klă ƀiă dong, plai ƀiă tơnap tap. Pơ ala brơi grup pơlir hơbit, kâo pô lêng kơ gir run ba gru amăng bruă pla phun kơbuă, rông hlăt mrai kiăng čung ba adơi amai thâo gum pơgôp, pok prong hăng pơđĭ kyar hơbô̆ bruă. Kâo čang rơmang jai hrơi hơmâo lu dong adơi amai mut hrŏm kiăng hơmâo dong prăk pơhrui, pơplih tơlơi hơdip amăng sang anŏ”./.