Ƀơi sang pơkra gơnam đang hmua phường Buôn Ma Thuột, hơdôm boh sầu riêng tơsă kơñĭ amra ba pơmut uă krô-măi mok uă kiăng djă pioh ia ƀâo hiam, boh kơñĭ hăng ƀong ñu mơmih tui hơđăp. Mơng boh troh mơtah mơda tui rĭm bơyan, sầu riêng ră anai jing gơnam pơkra brơi kơ klă ƀiă, jing gơnam pơyơr yôm. Yă Nguyễn Thị Hường, Khua kông ti pơčruih ngăn Ngă hmua N&H ƀơi Buôn Ma Thuột brơi thâo:

“Sầu riêng uă krô lăp djơ̆ hăng hơnong pơkă lĕ dŏ djă pioh ia ƀâo mơnâo, dŏ kơñĭ hiam, hơnong pơkă 5 ƀu hơmâo: ƀu hơmâo sik, ƀu hơmâo jrao, ƀu hơmâo pơluk gơnam pơkŏn, ƀu uă pơ-iă kơtang hăng ƀu yua ia mơmuă. Mơnuih blơi yua mơng Dak Lak lêng čang rơmang hơmâo sa gơnam ƀong đôč ôh ăt dŏ djă pioh ia ƀâo mơnâo mơng Dak Lak ba hyu hơdôm anih pơkŏn dong, anŏ yôm phara mơng Dak Lak anun lĕ sầu riêng uă krô hăng ƀing gơñu ăt mơ-it pơyơr nao rai amăng bơyan tê̆t anai”.

Hrŏm hăng boh troh uă krô, asar makka-arăng juăt iâu lĕ “asar yôm amăng djop djuai asar”-ăt glăk ƀuh amăng hơdôm khay dưm ƀañ mưt akŏ thun phrâo. Mơng bruă uă krô kiăng dŏ ik lơm ƀong, truh kơ hơna amăng apui djuh ngă ƀâo hiam phara, makka Dak Lak glăk ƀơƀrư̆ jing gơnam ƀong kơ lu sang anŏ amăng hơdôm hrơi ƀong tê̆t. Yă Phạm Trần Tú Anh, pô sang pơkra makka hơna amăng apui djuh ƀơi să Krông Năng, tơring čar Dak Lak brơi thâo:

“Ƀing gơmơi hok mơ-ak biă mă lơm ƀuh gơnam pơkra mơng ƀing gơmơi hơmâo pơdă amăng kơƀang mơñum ia če bơyan bơnga kơ lu sang anŏ. Makka ƀu djơ̆ kơnong lĕ gơnam ƀong jơman đôč ôh mơ̆ ăt pơƀuh tơlơi pơplih yua gơnam pơhlôm brơi tơlơi suaih pral, thâo yua gơnam hăng pơpŭ gơnam đang hmua mơng plơi pla.”

Amăng bơyan ƀong tê̆t rơgao, rơnoh yôm mơng hơdôm gơnam OCOP mơng Dak Lak hơmâo pơƀuh tong ten. Ƀu djơ̆ kơnong jing gơnam pơyơr đôč ôh, hơdôm gơnam mơng plơi pla jing anŏ tơkuh nao rai, ngă hơdor glăi gơnam ƀâo mơnâo mơng plơi pla, ba glăi tơlơi phara amăng hrơi mông pơtum jơngum akŏ thun phrâo. Amăng kơƀang mơñum ia če akŏ thun phrâo, hrŏm hăng mưt ria, mưt boh đung tui hơđăp, ƀuh wŏt asar makka, sầu riêng krô, kơphê hăng če ngă pơmut hrŏm kơplah wah sô hơđăp hăng phrâo, kơplah wah gru grua hăng tơlơi pơplih phrâo. Amai Nguyễn Minh Anh, mơnuih ƀôn sang dŏ ƀơi phường Buôn Ma Thuột, tơring čar Dak Lak brơi thâo:

“Rĭm bơyan ngui ƀong tê̆t, sang anŏ gơmơi juăt pơdă lu gơnam yôm phara mơng Dak Lak amăng khay ƀañ mưt. Tuai rai ngui pơ sang hor ƀong sầu riêng krô ƀudah asar makka. Ƀong ñu jơman, mơmah mưn phara, tơlơi anai kiăng pơdah pran pơpŭ kơ gơnam đang hmua mơng plơi pla ta.”

Bruă pơƀuh mơng hơdôm gơnam OCOP-gơnam yôm phara mơng hơdôm kual plơi pla amăng hơdôm hrơi ƀong tê̆t, ƀu djơ̆ kơnong lĕ tơlơi bơră ruai mơng mơnuih blơi yua đôč ôh mơ̆ ăt lĕ tơlơi yak nao yôm phăn amăng bruă đĭ tui rơnoh yôm. Amăng bơyan bơnga ƀơi kual Dap kơdư, ia ƀâo mơnâo mơng kơphê, makka, sầu riêng krô por hyu jum dar, ba glăi asăp ƀâo hiam phara mơng Dak Lak. Hơdôm gơnam OCOP glăk mơ-it nao pran pơ-ư ang kơ anŏ yôm phara gru grua hăng tơlơi gir run pơplih phrâo mơng mơnuih ƀôn sang. “Ia ƀâo mơnâo mơng bơyan bơnga” mơng gơnam đang hmua Dak Lak glăk lar hyu ngă pơđao amăng rĭm sang anŏ, rĭm tơlơi bơră ruai amăng hrơi pơtum jơngum amăng akŏ thun phrâo. /.