Hơdôm hrơi hăng anai, ƀơi jơlan guai dêh čar gah să Quảng Trực, tơring čar Lâm Đồng, lăng hyu hyơr hyar hla gru mriah pơtŭ kơñĭ tong krah hăng hmua đang kơphê hlăk čuh bơnga, boh makka, phun tiu hñơr djop anih mơtah mơda hla kyâo amang glai klô. Sit lăng amăng mlam, bral apui bơngač jơlan nao rai amăng plơi pla giăm guai dêh čar. Anun lĕ ring bruă pơ anăp “Tŭi apui bơngač jơlan guai” yua khul hlăk ai tơdăm dra să Quảng Trực pô mă bruă. Ayong Y Nhật Minh, Kơ-iăng khua Jơnum min djop djuai ania mơnuih mơnam dêh čar, Khua khul tơdăm dra mut phung să brơi thâo, amăng să hơmâo dưm truă pul apui bơngač rơbêh 5 km hrĕ apui lơtrik, pơčrang bơngač djop ară jơlan gum hrŏm pơgang tơlơi rơnuk rơnua hơđong pioh kơ plơi pla ƀôn lan mơak hlak. Ƀrô bơyan phang čơkă thun phrâo-mơak ping gah, ƀing hlăk ai ƀơi să guai dêh čar či Quảng Trực nao hrŏm hyu tir hăng ƀing tơhan pơgang guai dêh čar laih anun pơphun ngui ngor hrŏm adoh suang, atông čing hơgor-suang arap, kiăng pơjing mông ngui ngor mơak.

 “Hrŏm hrŏm hăng bruă mă wai pơgang tơlơi rơnuk rơnua guai dêh čar, hlăk ai tơdăm dra să Quảng Trực dŏ ba tơlơi ngui ngor mơak adoh suang gru grua pioh pơphun amăng mông jơnum hlăk ai. Hơdôm wơ̆t jơnum lêng kơ hơmâo ngă hrŏm pơdah atông čing, adoh tơlơi adoh đưm Bơnông, hơmâo pơtrut pơsur pran jua ƀing tơdăm dra hlăk ai mut jơnum lu tui, re se hloh ƀiă rơkut, mrô mut jơnum mơ̆ng 60-85%. Thun pơ anăp, hlăk ai să ăt pok pơhư prong hơdră dưm truă pul  apui bơngač jơlan plơi pla ƀơi guai dêh čar, pơphun brơi lu hlăk ai tơdăm dra hyu tir hrŏm ƀing tơhan laih anun djru hyu pơtô pơblang tơlơi phiăn kơ ƀing hlăk ai hăng tui bruă mă rơđah rơđong, lir hơbit hăng amăng plơi pla gơñu pô”.

Bơyan phang bơnga čuh blang hiam mơak laih ƀơi să Thuận An, tơring čar Lâm Đồng, anih mơ̆ hơmâo bruă mă gru grua, adoh suang yua ƀing hlăk ai pô pơdah, hơmâo pơphun na nao. Ayong Y Arôn-Kơ-iăng khua hlăk ai să brơi thâo, mơ̆ng thun 2022 truh ră anai, ñu hơmâo pơphun na nao rơbêh 20 mông jơnum, pơtô pơblang hăng pơtô glăi tơlơi adoh đưm djuai ania Bơnông, hơmâo pơhưč hơdôm rơtuh wơ̆t tơdăm dra ngă hrŏm, wơ̆t ƀing tơdăm ngek dra muai nao hrăm adoh.

Lu gơyut hlăk ai tơdăm dra mơ̆ng blung aka ƀu thâo phe phô ôh adoh đưm, ră anai hlong thâo adoh pơtưh glăi, hyu pơdah tơlơi adoh suang amăng mông ngui ngor ngă yang amăng plơi pla. Thun 2025 phrâo laih rơgao, ayong Y Arôn hơ̆k mơak yua dưi pơ ala kơ ƀing tơdăm dra hlăk ai Việt Nam hăng Jơlan hơdră “Jơlan nao bruă ngă ia mriah-kơsem min, hrăm tui kơ hlăk ai” ƀơi dêh čar Khač. Ñu hơ̆k mơak lăi:

“Tal nao anun, djru kơ ta thâo thăi lu mơta tơlơi, biă mă ñu ƀuh rơđah bruă mă glăm ba mơ̆ng hlăk ai djuai ania Bơnông amăng rơnuk pơblih phrâo. Bưp nao rai lu mơnuih, pơhiăp hrŏm, tơña bla hrăm tơdruă tơlơi hiam mơak mơ̆ng ƀing gơyut gơyâo dêh čar tač rơngiao. Thun pơ anăp, gơmơi amra akŏ pơjing khul grup ngă hrŏm sa tơlơi či kiăng ƀing adoh đưm kơ ƀing hlăk ai, laih dơ̆ng pơjing rup video clip pơdah thâo tơlơi adoh đưm djuai ania Bơnông amăng plang facebook kiăng kơ lu ơnuih thâo, lăi pơthâo kơ ƀing hlăk ai brơi gơñu pơ-ư ang hăng anăm wor rơbit hĭ ôh djuai ania phun akha plơi pla ta pô”.

Hrŏm hăng bruă mă gru grua, lu hlăk ai djuai ania Bơnông ƀơi tơring čar Lâm Đồng khin hơtai pơphun bruă mă hăng anŏ hiam amăng gru grua djuai ania pô mơtam. Ƀơi ƀôn Bu Dak, să Thuận An, amai H’Her, sa čô dra thun dŏ čơđai djuai ania Bơnông, hơmâo pơphun hơbô̆ bruă mơñam mrai đưm, pơsir bruă mă kơ rơbêh 10 čô adơi amai, hăng prăk blan sa čô truh 5 klăk prăk. Hmao kiăo tui anŏ kiăng amăng rơnuk phrâo, ñu hơmâo ba pơdah gơnam pơkra ming pioh sĭ mơdrô pơdah amăng facebook, Zalo, Tiktok, pơdah ƀơi anăp livestream pơdah thâo gơnam sĭ mơdrô. Amai H’Her brơi thâo: Hơbô̆ bruă ñu ngă hơmâo tŭ mă pri apah bơni mrô Klâo amăng tal pơplông Ƀing đah kơmơi pơphun bruă mă tơring čar Dak Nông hơđăp.

 “Kâo čang rơmang ƀing adơi amai thâo mơñam mrai đưm kiăng ĕp prăk hơđong tơlơi hơdip mơda, mơnuih ƀôn sang amra djă pioh mă bruă ngă. Kâo kiăng gơnam mơñam mrai đưm djuai ania Bơnông ƀu kơnong ba sĭ mơdrô amăng dêh čar đôč ôh, dŏ ba sĭ amăng plang điện tử jar kmar, kiăng hơmâo lu mơnuih thâo hluh hăng khăp kơ gru grua djuai ania ta pô hloh”.

 Amăng bruă mă adoh suang, mơnuih kơhnăk adoh Điểu Nap Bunong ră anai glăk dŏ mă bruă amăng gơnong bruă gru grua tơring čar Dak Lak, ñu ruah mă jơlan hơdră adoh suang, pơčeh tơlơi adoh suang kiăng ba gru grua djuai ania Bơnông nao giăm lu mơnuih ƀôn sang hloh. Amăng hơdôm tơlơi adoh ñu pơdah, ñu kiăo tui er tơlơi adoh đưm Bơnông, pơčeh pơmut hrŏm er tơlơi adoh rơnuk anai hăng pĕ gông atông brô̆ đưm kual Dap Kơdư, pơjing rai hơdră adoh suang phara hơjăn ñu đôč, samơ̆ bang hyu kơtang.

Mơnuih thâo adoh Điểu Nap Bunong kah pơpha tơlơi mơak mơ̆ng ñu: phrâo anai, khul adoh suang anăn Nap Bunong Band yua ñu akŏ pơjing hơmâo mă pri A tui hơdră adoh suang gru đưm amăng plơi pla samơ̆ pơhrua nao hrŏm tơlơi adoh anŏ hơdip phrâo ră anai ƀơi mông pơplông tơlơi adoh suang tơring čar Dak Lak pok pơhư prong thun 2025. Plang Youtube anăn “Điểu Nap Bunong Official” hăng bruă ngă hyu pơdah tơlơi adoh suang lu mơta jua er tơlơi adoh mơak, amăng anun, hơmâo pơdah adoh suang hăng gru grua djuai ania Bơnông hơmâo pơhưč lu mơnuih đing nao, biă mă ñu ƀing hlăk ai tơdăm dra.

 “Rim kơ tơlơi adoh kâo ba pơdah kiăng ơ ƀing hlăk ai thâo hluh lĕ gru grua djuai ania Bơnông ƀu kơnong tơlơi ră ruai anŏ laih rơgao ôh, ñu dŏ hơdip amăng tơlơi hơdip rơnuk anai. Thun pơ anăp, kâo čang rơmang hơmâo lu tơlơi adoh phrâo lăi nao bruă ngă amăng tơlơi hơdip ră anai mơ̆ng mơnuih ƀôn sang kiăng kơ gru grua thâo thăi dưi pơlar tui kah hăng ñu phiăn hơmâo mơ̆ng đưm”.

Mơ̆ng hơdôm ring bruă “Tŭi apui bơngač jơlan guai”, truh pơ bruă pơphun bruă či ngă mơñam mrai đưm, truh kơ bruă pơčeh tơlơi adoh suang ba glăi tơlơi hơdip suă pran amăng lŏn mơnai glai klô Dap Kơdư, hơdôm bruă mă hur har sơ̆n pran jua ƀu pơdơi ôh mơ̆ng ƀing hlăk ai djuai ania Bơnông hlăk djru hrŏm ngă pơblih phrâo tơlơi hơdip mơda amăng plơi pla, kiăng kơ gru grua đưm djuai ania nao hrŏm anŏ pơblih phrâo. Yak nao thun phrâo bơyan phang Bính Ngọ 2026, hlăk ai djuai ania Bơnông ăt  hlăk ngă tui kiăng bang bơngač tơlơi kiăng pơyơr pran jua, gum tơngan hrŏm man pơdong plơi pla phrâo hiam, rơnuk rơnua, bă blai gru grua hiam dŏ djă pioh rông ba tơlơi đăo  kơnang kơ kơñ pơgi ni anăp rơđah tui, bơngač kơtang hloh hăng hơđong kơjăp mơ̆ng kual Dap Kơdư.