Amăng hơdôm sang pơkra gơnam mơng anom bơwih ƀong hrŏm gah Ngă hmua hăng pơkra pơjing Bún-Miến Phở krô Chi Lăng- Khánh Xuân, phường Thành Nhất, tơring čar Dak Lak hơdôm ară bún-miến-phở hơmâo pơkra, uă krô, dưm amăng adung ječ ameč kiăng tañ ba sĭ mơdrô. Ơi Hà Văn Tuyến, Khua anom bruă ngă rah Khua khul wai lăng anom bơwih ƀong hrŏm brơi thâo: Rĭm thun anom bơwih ƀong hrŏm hơmâo ba sĭ mơng 15-20 tơ̆n gơnam djop mơta. Mơng hrơi hơmâo hră tŭ yap gơnam OCOP 3 asar pơtŭ, gơnam tam mơng anomm bơwih ƀong hrŏm jai hrơi hơmâo lu tui mơnuih thâo hăng blơi yua. Ơi Hà Văn Tuyến brơi thâo:

“Mơng akŏ thun ƀing gơmơi hơmâo prap lui giăm 40% gơnam tam pơhmu hăng hơdôm blan hlâo anun. Hrŏm hăng anun ƀing gơmơi hơmâo gơnam prap tui tlôn pơkra kiăo tui bơyan bơkơnar hăng mrô gơnam him lăng amra đĭ lu kiăng lăp djơ̆ hăng tơlơi kiăng laih dong pơhlôm djop gơnam ba sĭ mơdrô amăng bơyan ƀong tết anai”.

Ngă bruă ječ ameč ăt ƀuh mơn ƀơi hơdôm anom bruă pơkra gơnam đang hmua pơprong. Ƀơi Kông ti TNHH Đức Thịnh-sa amăng hơdôm anom bruă pơkra pơjing asar boh ñông amăng tơring čar-hơdôm bruă pơkra gơnam, anung gơnam glăk đuăi hmar hloh.

Yă Nguyễn Ngọc Thùy Sơn, Khua kông ti brơi thâo, hrŏm hăng ba sĭ mơdrô pơ tač rơngiao, sit biă ñu lĕ pơ dêh čar Khač, bơyan rơnuč thun anom bơwih ƀong sĭ mơdrô đing nao lu ƀiă dong sĭ  mơdrô amăng lŏn ia, sit biă ñu pơhlôm gơnam yua amăng bơyan ƀong tết anai. Anom bơwih ƀong sĭ mơdrô hơmâo pơkra pơjing lu gơnam phrâo, đing nao pơplih hruh anung kiăng mơnuih blơi yua thâo krăn tong ten anăn gơnam.

“Anom bơwih ƀong sĭ mơdrô hơmâo gơgrong pơkra glăi hruh anung gơnam phrâo hăng anăn apăn kiăng pơdah tơlơi tum jơngum. Kơ nua gơnam, kông ti ăt tŏ tui hơđong tui nua mơng sang măi, kơnong sa, dua gơnam pơplih glăi nua đĭ ƀiă giăm 5% yua gơnam pioh pơkra rai đĭ. Amăng bơyan ƀong tết anai, gơnam ba sĭ mơdrô amăng lŏn ia đĭ giăm 10%”.

Ƀơi hơdôm anih kual Ngŏ tơring čar Dak Lak, lu anih pơkra gơnam OCOP amăng sang anŏ ăt găn rơgao tơnap tap yua hơjan ia dăo, hmao tlôn ba gơnam sĭ mơdrô amăng bơyan tết anai. Ƀơi hơdôm sang sĭ mơdrô hơdôm gơnam OCOP ƀơi să Sông Hinh, hơdôm mơta gơnam anun lĕ mơnŭ đăm mơsin, mơnong rơmô krô, mơnong rơmô bhu hăng pra, mơnong un krô hăng pra, mơnŭ krô, un krô hơmâo pơkra ra hăng dưm amăng adung ba sĭ na nao.

Ơi Nguyễn Duy Hùng, Khua anih bruă pơkra gơnam Hùng Miên brơi thâo, hơjan ia dăo rơgao bơdjơ̆ nao kơtang biă mă gơnam pioh pơkra kah hăng kaih lơm pơkra gơnam ba sĭ samơ̆ anom bruă hmao tlôn rŭ pơdong glăi bruă pơkra kiăng hơmâo gơnam ba sĭ mơdrô:

“Ƀing gơmơi pơphun pơkra gơnam na nao kiăng hmao tlôn ba sĭ bơyan ƀong tết anai. Ƀrô bơyan tết anai, mơnuih blơi yua gơnam him lăng đĭ giăm 35% pơhmu hăng hrơi pơkŏn, samơ̆ nua gơnam amra ƀu đĭ lu ôh”.

Hrŏm hăng tơlơi gir run mơng hơdôm anom bơwih ƀong sĭ mơdrô hăng hơdôm boh sang anŏ, bruă wai lăng sĭ mơdrô, pơhlôm gơnam hơdjă ăt hơmâo hơdôm gơnong bruă kơtưn ngă. Trung tá Nguyễn Đức Huy, kơ-iăng Khua tơhan pôlih wai lăng bơwih ƀong huă, kông ang tơring čar Dak Lak brơi thâo, anom bruă bơdjơ̆ nao amra hruă kjăp bruă ple ĕp, krăo lăng amăng bơyan lu mơnuih kiăng blơi gơnam anai.

“Tơhan kông ai amra đing nao biă mă bruă wai lăng hơdôm gơnam pioh pơkra kiăng djru pơhlôm pơkra rai djop gơnam sĭ brơi hơdôm sang ƀong huă, sang sĭ mơdrô, pơhlôm ƀu yua tơpung jrao kŏm, mơng anun pơgăn hĭ bruă ngă măt mơnong ƀong huă, pơgôp kiăng mơnuih ƀôn sang čơkă thun phrâo rơnuk rơnua”.

Găn rơgao lu tơnap tap yua ayuh hyiăng pơplih sat, hăng pran gơgrong, gir run mơng hơdôm anih pơkra gơnam, anih sĭ mơdrô hrŏm hăng tơlơi mut hrŏm kht khăt mơng hơdôm anom bruă bơdjơ̆ nao, bruă sĭ mơdrô gơnam ƀơi Dak Lak pơhlôm brơi djop gơnam, djop mơta, lăp djơ̆ tơlơi kiăng mơng mơnuih blơi yua amăng bơyan ƀong tê̆t tui phiăn juăt anai./.