Thun 2007, ayong Lê Văn Thuận, dŏ pơ thôn 7, să Hàm Thuận, tơring čar Lâm Đồng, pơdjuai 100 phun pơđung (djuai pơđung anet, arăng iâu dừa xiêm). Ƀuh phun pơđung xiêm čăt hiam pơ kual lŏn čuah, truh thun 2010, ñu pla thim 400 phun dong, ƀơi đang prong rơbêh 1,7ha. Tơdơi kơ 2 thun, pơđung bơnga, adai boh, laih anun truh thun tal 3 mơboh lu. Thun 2015, ƀuh đang pơđung ñu rơhuaih, ƀu hơmâo đơi ôh rok čăt, djơ̆ biă či rông mơnŭ, anun jing ayong Thuận blơi war pơsơi B40 glăi bư̆ jum dar, pơkra war, tơda mơnŭ, laih dong brơi mơnŭ djuai ta juăt rông, prưh lui gah yŭ tơ-ui phun pơđung.

Blung a ñu rông rim hnưr hơdôm rơtuh drơi đôč. Mơ̆ng lu wơ̆t rông ƀuh klă, anun jing ñu blơi măi krŏm boh, kiăng hơmâo ană oač či rông. Tui anun, pô̆ mơnŭ ñu jing hơdôm rơtuh drơi mơtăm, truh thun 2018 ñu rông hơnong yah 3.700 drơi truh ră anai mơtăm. Ayong Lê Văn Thuận brơi thâo, yua rông klă, bruă pla pơđung hăng rông mơnŭ tañ hơmâo biă mă: “Blung a sang anŏ pơmin kjăp laih bruă pla phun đung wơ̆t hăng rông mơnŭ hlao kiăng hơmâo prăk lu ƀiă kơ sang anŏ. Sit hnun yơh, sang anŏ rông mơnŭ lu mơtăm či ba sĭ hơđong kơ anih blơi, rơngiao kơ rông mơnŭ čuh ƀong, sang anŏ gơmơi ăt krŏm boh kiăng čeh ană oač či rông, wơ̆t hăng sĭ kơ neh  met wa kiăng blơi či rông”.

Ayong Thuận lăi pơthâo, kiăng pơgang klin kơ mơnŭ, pô rông kiăng čem rông djơ̆, krăp lăng mơnŭ na nao mơtăm yơh. Bruă tlâ̆o pơgang tui hrơi blan pơkă khŏm ngă mơtăm yơh, tơdah lăng mơnŭ ñu ƀu-ai, kơañuk ta khŏm nao blơi ia jrao tañ mơtăm yơh. Rơngiao kơ sĭ mơnŭ čuh ƀong, ayong Thuận ăt sĭ ană oač, nua ñu 17.000/drơi, rim blan ñu sĭ 2.700 - 3.000 drơi. Prăk mơ̆ng bruă rông mơnŭ hơmâo biă, rim thun rơbêh 1,5 klai, kah hĭ prăk hnun hnai, dŏ glăi rơbêh 450 klăk.

Ayong Nguyễn Quốc Tuấn, pơ ala Khul ngă hmua să Hàm Thuận, tơring čar Lâm Đồng brơi thâo, mơnuih ngă hmua Lê Văn Thuận khin pơmin, khin ngă, thâo ngă, ñu mă yua klă tơlơi gêh găl kual lŏn čuah mơ̆ng plơi pla ñu:“Mơ̆ng kual lŏn čuah krô krañ, rơkơi bơnai ayong Thuận gir ngă bruă, bơwih ƀong ƀơi đam lŏn ñu hơmâo, kiăng hơmâo prăk rông sang anŏ. Amăng hơdôm thun rơgao, hơbô̆ bruă pla pơđung, rông rah mơnŭ mơ̆ng ayong Thuận jing tŭ yua, hơmâo prăk biă. Anai jing sa amăng hơdôm hơbô̆ bruă hmư̆ hing mơ̆ng să laih anun pok prong tui pơ anăp, kiăng pơđĭ tui prăk kơ neh met wa pơ anai”.

Hăng bruă bơwih ƀong tŭ yua tui anai, ră anai bruă pla phun đung wơ̆t hăng rông mơnŭ mơ̆ng ayong Thuận glăk hơmâo lu mơnuih hla tui. Ayong Lê Văn Thuận ăt jing sa amăng hơdôm boh sang anŏ nao hlâo pla djuai pơđung xiêm ƀơi lŏn čuah thôn 7, să Hàm Thuận, tơring čar Lâm Đồng, pok rai jơlan đĭ kyar bơwih ƀong hơđong, ngă pơdrong kơ pô sang hăng mơnuih tơpuôl./.