Ơi K’Bé jing sa amăng hơdôm čô mơnuih ană plơi đăo kơnang biă ƀơi să Phan Sơn. Thun anai ñu rơbêh 60 thun laih, hơmâo ngă lu bruă laih amăng plơi pla, ngă bruă hơget tŭ mơn ăt hơmâo neh met wa K’ho, Raglai pơ anai hmư̆ tui, ƀu-eng soh kơ ñu.

Tơdơi kơ pơdơi bruă thun tha, ñu hơmâo neh met wa ruah ngă Mơnuih ană plơi đăo kơnang. Ơi K’Bé gir ngă bruă hăng Khul git gai bruă plơi hyu pôr pơthâo kơ neh met wa tơlơi pơtrun, jơlan ngă bruă mơ̆ng Ping gah, tơlơi phiăn mơ̆ng Kơnuk kơna. Biă ñu lĕ pơtô brơi neh met wa gum man pơdong plơi pla phrâo, đĭ kyar bơwih ƀong, akŏ pơjing tơlơi gum pơgôp, hơdip rơnôm, bong kjăp rơnuk rơnua amăng plơi pla hăng gir djă pioh anŏ yom gru ama grua amĭ: “Kâo lăng tơlơi gơgrong bruă mơ̆ng pô kâo kơtang hloh hăng ană plơi pla. Yua hnun, hrơi blan rơgao, kâo hrŏm hăng neh wa amăng plơi pơgôp hiăp brơi ping gah, gong gai kiăng ngă klă hăng djŏp hloh hơdôm tơlơi pơtrun mơ̆ng ngŏ, ngă hiư̆m pă tơlơi hơdip mơ̆ng neh wa pơ anai jai hrơi đĭ tui. Hnun kah, pran jua đăo kơnang mơ̆ng neh met wa hăng Ping gah, Kơnuk kơna mơ̆ng kjăp hloh. Boh nik ñu hơdôm tơlơi pơtrun anun, amăng thun blan rơgao, djru pơđĭ tui tơlơi hơdip mơda mơ̆ng mơnuih ƀôn sang djuai ania ƀiă ƀơi să Phan Sơn”.

 Pơtrut tui pran jua ngă pô nao hlâo, ngă gru ba jơlan, ơi K’Bé ƀu kơnong ngă djơ̆ tui tơlơi pơtrun, tơlơi phiăn mơ̆ng Ping gah, Kơnuk kơna đôč ôh ăt jing pơjeh asar klă amăng đĭ kyar bơwih ƀong mơ̆ng sang anŏ, jing kơnuih ană tơčô hăng mơnuih ƀôn sang pơ anai hla tui.

Ƀu kơnong ngă pơdrong brơi sang anŏ ñu đôč ôh, ơi K’Bé ăt iâu pơthưr neh met wa, kơnung djuai plih djuai phun pla, hlô rông, čan prăk mơ̆ng sang bruă prăk či bơwih ƀong. Ñu ăt iâu neh wa lui hĭ tơlơi phiăn soh sat, biă ñu lĕ bruă dŏ rơkơi bơnai aka ƀu truh thun.

 Ơi K’Vi Ang, dŏ pơ să Phan Sơn, tơring čar Lâm Đồng brơi thâo, hlâo adih, amăng plơi dŏ hơmâo lu mơnuih dŏ rơkơi bơnai aka ƀu truh thun, hơmâo ƀing čơđai đah bơnai dŏ rơkơi mơ̆ng 13-14 thun đôč. Tơdơi kơ hơmâo ơi K’Bé pơblang brơi tơlơi ƀu djơ̆ kơ bruă dŏ rơkơi bơnai mơ̆ng anet amăng mông jơnum plơi, djru neh wa thâo hluh anŏ soh glăi. Hơdôm thun hăng anai, bruă anai jing aset tui laih: “Met Bé jing mơnuih bơdjơ̆ nao prong biă hăng tơlơi đĭ kyar bơwih ƀong huă ăt kah hăng bruă mă amăng plơi pla. Boh nik ñu iâu pơthưr neh wa kăng pơpha brơi lŏn či pơkra jơlan, ngă bơnư̆ kŏng ia. Met K’Bé ăt iâu pơthưr neh wa djă pioh gru ama grua amĭ, laih dong jak iâu ngă hơđong rơnuk rơnua plơi pla să Phan Sơn”.

Yua hơdôm tơlơi gir run, gum pơgôp mơ̆ng Khul ană plơi đăo kơnang, truh ră anai, să Phan Sơn, tơring čar Lâm Đồng hơmâo laih boh tŭ yua amăng djŏp bruă: jơlan nao rai amăng plơi hơmâo pơkra hăng bêtông, sang anŏ hơmâo apui lơtrik; hơdôm boh plơi leng kơ hơmâo sang gru grua; rơnuk rơnua amăng plơi; kơđi čar hơmâo bong kjăp, khul gum pơgôp djuai ania hơmâo pok prong tui mơn.

Ơi Bùi Ngọc Sơn, Kơ-iăng khua Gơnong bruă Djuai ania hăng Tơlơi đăo tơring čar Lâm Đồng brơi thâo, kiăng pơđĭ tui tơlơi gơgrong bruă mơ̆ng Mơnuih ană plơi đăo kơnang, hmư̆ tui, truh ră anai, Gơnong bruă hơmâo pơphun 4 anih pơtŏp hrăm hăng pơđĭ tui tơlơi rơgơi kơ Mơnuih ană plơi đăo kơnang amăng tơring čar, kiăng Mơnuih ană plơi đăo kơnang thâo rơđah hăng pơblang glăi tŭ yua hloh hăng neh met wa.

Hăng tơlơi kơdrưh mơ̆ng pô, ơi K’Bé ƀu kơnong pơtrut tui tơlơi gơgrong ngă pô pơtruh brơi đôč ôh, ăt djru bang hyu tơlơi pơtrun hăng pơtrut đĭ kyar plơi pla djuai ania ƀiă ƀơi să čư̆ siăng Phan Sơn, tơring čar Lâm Đồng./.