Ƀơi anih čuă ngui ƀuôn Akŏ Dhông, phương Buôn Ma Thuột, bruă ngui ngor atông čing hrŏm hăng tơlơi adoh suang, pĕ goong atông brô̆ đưm jing pơhưč lu tuai rơnguai nao ngui amăng akŏ thun phrâo. Amai Freya, tuai mơ̆ng čar Mi, brơi thâo, anih anom pơ anai ñu hiam, adai lăp djơ̆ mơn, hrŏm hăng neh met wa pơ anai thâo čơkă, ƀu-eng biă kơ tuai, laih dong gru grua plơi pla yơh pioh glăi tơlơi lăp hơdor biă mă: “Ƀing gơmơi hơmâo neh met wa čơkă klă biă, mơak biă mă lơ̆m rai ngui pơ anai, adai pơ anai kah hăng bơyan pơdơi prong, adai rơ-ơ̆ găp lăp, pơđao hơmâo mơn, tơlơi anai pơ čar Mi gơmơi ƀu juăt hơmâo ôh, pơ dêh gơmơi rơ-ŏt kơtang kơtit amăng akŏ thun phrâo. Yua hnun gơmơi mơak biă yua dŏ amăng adai pơđao bơyan anai. Pơ čar Mi, gơmơi juăt ngui ngor mơñum ƀong yơh lu, bơ pơ anai, kâo lăng hơmâo anŏ tum jơngum sang anŏ, mơak amăng sang anŏ hloh kơ ngui mơak hăng gơyut gơyâo hăng pô pơkŏn”.

Hăng ƀing tuai dêh čar, Dak Lăk ăt jing anih či nao ngui amăng bơyan akŏ thun phrâo, đih pơdơi rah, hyu lăng glai klo rah, hơduah ĕp gru grua djŏp plơi pla. Ayong Nguyễn Ngọc Chân, pơ ƀon prong Hồ Chí Minh lăi, hơdôm wơ̆t hyu ngui tui hăng anai, brơi ñu thâo hluh hăng sem lăng tơlơi hơmâo sit nik hloh: “Amăng akŏ thun phrâo lĕ dua čô ană kâo pơdơi sang hră, anun jing sang anŏ gơmơi rai pơ Buôn Ma Thuột anai, jing anih hmư̆ hing kơphê mơ̆ng Việt Nam mơn, kiăng dua čô ană kâo sem lăng gru grua mơ̆ng rim plơi pla, ăt kah hăng anih anom, lŏn tơnah pơ anai, kiăng gơñu thâo hluh kual lŏn Dap Kơdư hiư̆m pă”.

Amăng gru grua djuai ania Êđê, bruă huă asơi ƀong añăm tui gru plơi pla pơ anai, lăng arăng pĕ goong atông brô̆, adoh suang jing ba glăi kơ ƀing tuai tơlơi hơdor biă mă. Mơ̆ng anŏ yom hơmâo hơđăp, neh met wa amăng plơi pơplih phrâo tui bruă čơkă tuai, kiăo tui gru hơmâo hơđăp amăng plơi pla.

Tui hăng ơi Y Nuel Niê, tha plơi ƀuôn Akŏ Dhông, hơdôm thun giăm anai, ƀing tuai amăng plơi hơmâo neh wa amăng plơi lăng ba tuh pơ alin, akŏ pơjing bruă čơkă tuai hơmâo wơ̆t glai rưng hăng gru grua đưm. Amăng thun phrâo, khul wai lăng anih čơkă tuai amăng plơi hơmâo pơkra tui lu bruă čơkă tuai, bruă ngui ngor kiăng bơwih brơi kơ tuai klă hloh: “Hơdôm gơnam pơkra pioh čơkă tuai, biă ñu lĕ mơnŏng ƀong huă amra lu hloh kơ thun 2025, bruă pơkŏn gah tơlơi adoh suang, atông čing amra plih tui mơn. Amăng plơi gơmơi rim blan amra hơmâo hrơi ngui atông čing adoh suang brơi ƀing tuai nao lăng đôč, huăi rơngiă prăk ôh”.

Hăng hơdôm anom mơdrô gah tuai čuă ngui ƀơi Dak Lăk, đĭ kyar bruă čơkă tuai hyu ngui mut hrŏm hăng anih anom glai klo, gru grua amăng plơi pla jing jơlan bơwih ƀong hơđong kjăp. Yă Nguyễn Thị Ngọc Anh, Kông ti pơčruh ngăn čơkă tuai hyu ngui amăng plơi Ko Tam, phương Tân Lập, brơi thâo, anih hyu ngui amăng glai klo - plơi pla ƀu kơnong hơmâo prăk đôč ôh, ăt jing bruă pơgang ayuh hyiăng, pơtrut tui tơlơi apăn bruă ngă hmua - rông hlo mơ̆ng tơring čar: “Yua jing anih čơkă tuai hyu lăng glai rưng, anih anom rơ-ơ̆, gru grua amăng plơi pla, anun jing gơmơi pơƀut pơhrup hiam anih anom, prăp lui añăm pơtăm boh troh gơmơi pla mă či rơyă hơbai brơi kơ ƀing tuai. Yua gơmơi prăp rơmet hlâo hăng rông mă anun jing djŏp hrơi pơdơi prong, hrơi tê̆t, nua dŏ hnong đôč, huăi mă thim prăk lơi pơhmu hăng hrơi pơkŏn”.

Pơtrut tui gru grua amăng plơi pla hăng anŏ tơpă sit amăng bruă hyu čuă lăng, bruă čơkă tuai Dak Lăk glăk hơmâo ƀing tuai lăng djơ̆ pran, hor nao ngui biă mă. Amăng hrơi akŏ thun phrâo, sit jua čing, yŭ suang hăng tơlơi thâo ƀu-eng thâo čơkă tuai mơ̆ng neh met wa yơh pơhưč kơ ƀing tuai nao ngui pơ plơi pla./.