Hơdôm hrơi blung a akŏ thun 2026, ƀơi anih man pơdong sang hră đôm lăm dua gưl Ƀuôn Đôn, plơi Thống Nhất, să Ƀuôn Đôn, tơring čar Dak Lak, hơdôm hơpluh čô mơnuih mă bruă, ƀing ki sư hrŏm hăng măi mok gơnam yua mă bruă, pơpha lu khul, grup, črăn mă bruă, trơ̆i kuăt pơsơi, lŭk ƀêtông tuh tơmeh, tuh atur pơnăng; ƀing pơkŏn dơ̆ng jăng kuăt, prăp lui tuh ƀêtông atur sang dlông tal sa, amăng ruăi sang dlông 3 tal pơngŏ. Ơi Trần Văn Long, Khua git gai ring bruă anun brơi thâo, pô sang bruă tuh pơ alin prăk kăk, man pơdong hơmâo pơpha djop mơnuih mă bruă, rơdêh, gơnam yua mă bruă pơtum abih bang kiăng ngă hmar hloh. Ră anai, ring bruă hlăk ngă hmar hloh hrơi blan pơkă:

 “Ră anai, amăng ring bruă dŏ hơmâo 5 pô anom ngă hrŏm hơbit, hlăk pơpha bruă sa čô ngă khua pô git gai, 5 čô ki sư hrŏm hăng mơ̆ng 40-50 čô mơnuih mă bruă, kông ñơn man pơdong 5 črăn bruă pơpha ngă. Hơdôm kơčăo bruă hơmâo pơpha brơi anun, pok pơhai ngă tui djơ̆ tơhnal pơkă. Ƀing gơmơi hlăk gir run pơsir hơdôm tơlơi tơnap ƀu gêh găl mơ̆ng ayuh hyiăng lŏn adai pơđiă hơjan pơblih bơyan, phang pơđiă kơtang, hlim hơjan pơsah samơ̆ ăt gir ngă kiăng giong djơ̆ hrơi blan pơkă, jao glăi ba yua”.

Tui hăng khua pơ ala mơ̆ng anom bruă tuh pơ alin, ơi Võ Văn Lợi, Kơ-iăng khua wai lăng anom bruă kơčăo bruă tuh pơ alin man pơdong ring bruă pioh kơ mơnuih ƀôn sang hăng bruă tuh tia pơkra ming tơring čar Dak Lak iâu klah čun Ban B, truh ră anai abih bang sang hră đôm lăm dua gưl ƀơi guai dêh čar amăng tơring čar hơmâo tuh giong črăn ngă atur, prăp lui tuh atur gah ngŏ tal sa. Rơnoh prăk mă yua tuh pơ alin 32% laih, dưm dưm hăng 120 klai prăk, kiăng hmao thun blan pơkă. Yak nao amăng bơyan phang adai pơđiă kơtang, Khul lăi Ban B hơmâo dăp hơdră djru hơdôm sang bruă man pơdong anun pơtum ngă giong ring bruă amăng blan 8, wơ̆t adai hơjan hlim, angin rơbŭ hai khom ngă giong. Ơi Võ Văn Lợi lăi pơthâo:

“Truh ră anai, ring bruă ngă giong, djơ̆ tơhnal pơkă laih. Khă hnun, yua hơjan amăng bơyan hlim kơthel ngă ƀơi kual guai dêh čar tơring čar Dak Lak amăng thun 2026 him lăng amra tơnap tap đôč, ƀing gơmơi hơmâo prăp lui laih hơdră djru ba măi mok, rơdêh mă bruă, mơnuih gum hrŏm hăng amra mă bruă pơblih nao rai 3 gưl sa hrơi mlam kiăng hmao kru. Mơ̆ng anun, hneč mă đut tơhnal hơdôm hrơi adai pơđiă bơyan phang mă bruă man pơdong hmar hloh”.

Tui hăng ơi Nguyễn Thiên Văn, Kơ-iăng Khua Jơnum min mơnuih ƀôn sang tơring čar Dak Lak, tơdơi kơ git gai sang bruă tuh pơ alin, djop plơi pla, să hơmâo anih man pơdong gir run ngă hrŏm djru man pơdong, kiăng tañ giong ring bruă jao pioh bơwih brơi kơ čơđai sang hră kual ataih, laih dơ̆ng čơkă mơak ba jơlan hơdră hră pơtrun mơng Ping gah dêh čar ngă tui sit nik amăng tơlơi hơdip. Ơi Nguyễn Thiên Văn lăi pơtong.

“Pok pơhai ngă tui jơlan hơdră hră pơtrun tal XIV mơ̆ng ping gah phrâo pơsit laih, tơring čar amra pok pơhai pơrơđah hloh kiăng gêh găl hăng anŏ dưi ngă tui ƀơi tơring čar, kiăng čih pơkra pơhrua lu jơlan hơdră pioh ngă tui amăng tơring čar pioh kơ ƀing nai pơtô hrăm hăng čơđai sang hră đôm lăm, ngă gêh găl klă hloh kơ ƀing nai pơtô hăng čơđai sang hră hơđong hrăm hră, mă bruă. Mơ̆ng anun, ngă tui tŭ yua tơhnal pơkă pơtô hrăm amăng djop să kual ataih hloh, giăm guai dêh čar lăi pha laih anun amăng đơ đam tơring čar Dak Lak hnun mơ̆n”.

Hơdôm anih tuh atur ngă kơjăp pơdong sang, tơmeh tuh hăng pơsơi hlăk jăng đĭ pơngŏ, ngă anŏ gơgrong či tuh ƀêtông atur tal sa, tal dua hăng đĭ dlông hloh dưi kơjăp pơdong sang hră đôm lăm ƀơi kual guai dêh čar tơring čar Dak Lak hlăk jing tui laih. Mơ̆ng thun 2026-2027 pơ anăp, anih anai amra jing anŏ ưh kơnang rah pơtem ia rơgơi tơlơi kơhnâo kơ rơbêh 3000 čô čơđai sang hră ƀơi kual giăm guai dêh čar. Hơdôm čơnuh mơda mơtah hiam anun amra gir run hrăm hră thâo, kơtưn kiăng dĭ da gla kơñ ƀu sui ôh, ƀu ataih lơi, hăng pran jua čơđai muai hrun đĭ pô, djru man pơdong brơi kual lŏn giăm guai dêh čar amăng Dak Lak jai hrơi hơđong, pơđĭ kyar, pơdrong sah.