Mơ̆ng mơguah, neh met wa nao ngă bruă ik ak laih pơ đang pla añăm amăng sang mơnil, sang klum hơñôl ƀơi Đơn Dương, tơring čar Lâm Đồng. Añăm pơtăm hơmâo pĕ, buč, ba pơkra, jĕp amăng kơdung tui hăng hră arăng blơi; bơnga hơmâo ba nao pơ anih sĭ pơƀut. Ơi Khắc Bình, mơnuih ƀôn sang dŏ pơ să D’ran, hok mơak brơi thâo, tơlơi pơplih pơ anih pla añăm anai nao hrŏm hăng bruă man pơdong plơi pla phrâo:

“Neh met wa bơwih ƀong dưi dăi mơn lah. Yua hơmâo tơlơi lăng ba, djru brơi mơ̆ng Kơnuk kơna anun yơh tơlơi bơwih ƀong đĭ đăi hloh. Pla gơnam kah hăng boh trong mơsăm, añăm pơtăm, hăng...hơdôm djuai phun anai hơmâo mă yua boh thâo phrâo soh. Ră anai hơmâo thim bruă pla bơnga dong. Tơlơi hơdip ră anai đĭ đăi laih pơhmu hăng hlâo, neh wa hơmâo prăk kăk, hơdip jơnap hloh laih”.

Man pơdong plơi pla phrâo ƀơi anih pla añăm Đơn Dương hơmâo 4 boh să Đơn Dương, Ka Đô, Quảng Lập hăng D’ran mơ̆ng tơring čar Lâm Đồng, pơlir hăng pơkra gơnam rơgơi. Truh rơnuč thun 2025, añăm hăng bơnga pla tui boh thâo phrâo hơmâo năng ai 95% đơ đam hmua; rơnoh pơkra gơnam mơ̆ng hmua hơmâo rơbêh 220klăk/ha/thun. Hơdôm boh să anai leng jing să plơi pla phrâo pơkă hơnong phrâo, ngă gru kiăng hla tui.

Tui hăng tơlơi đĭ kyar anai, hơdôm boh plơi djuai ania ƀiă pơ anai ăt plih tui tañ mơn. Ơi K’Bril, Khua plơi Kambute, să Đơn Dương brơi thâo, tơlơi plih phrâo ƀu kơnong ƀơi djuai gơnam pơkra pơjing đôč ôh, ăt pơƀuh tơlơi rơgơi ngă hmua hăng tơlơi hơdip mơda mơ̆ng mơnuih ƀôn sang:“Neh met wa hơmâo mă yua rơdêh kai prong či ngă hmua, dưm truă đing pruih ia rơgơi mơn, boh thâo ngă hmua jai hrơi đĭ tui. Mơ̆ng anun jing bơwih ƀong đĭ, hơmâo prăk kăk, tơlơi hơdip jai hrơi đĭ tui. Plơi Kambute ră anai hơmâo man sang glông 2 gưl, 3 gưl, blơi rơdêh ôtô hai lu mơn. Mơ̆ng anun, plơi pla lăi hơjăn, să lăi hrŏm plih prong biă mă, pơplih rim hrơi”.

Amăng hrơi mông dăp glăi anom bruă čar hăng ngă bruă tui gong gai dua gưl, bruă lăng glăi, čih pơkra glăi hơdră man pơdong plơi pla phrâo hơmâo hơdôm boh să amăng kual Đơn Dương pơsit jing bruă akŏ phun. Tui hăng ơi Trương Quang Kiên, Kơ-iăng khua Jơnum min mơnuih ƀôn sang să D’ran, plơi pla phrâo hơmâo pơlir hăng pok pơhai Tơlơi pơtrun 57 kơ pơtrut mă yua boh thâo ia rơgơi, pơčeh phrâo hăng mă yua boh thâo mrô:“Tơlơi pơtrun Jơnum ping gah să D’ran 2025-2030 pơsit rơđah laih jơlan ngă bruă. Amăng anun yom biă ñu akŏ pơjing hơbô̆ bruă đĭ kyar, mă yua măi mok boh thâo phrâo ngă hmua pla pơkra gơnam, akŏ pơdong anom ngă ƀong hrŏm (HTX), ƀut ngă ƀong hrŏm, hơmâo pơkra gơnam OCOP, mơ̆ng anun iâu pơthưr anom mơdrô pơkra sang măi pơkra gơnam mơ̆ng hmua, pơđĭ tui prăk pơhrui kơ neh wa”.

Bơ hăng să Đơn Dương phrâo - hơmâo akŏ pơdong yua pơmut tơring kual Thạch Mỹ, să Đạ Ròn hăng să Tu Tra hơđăp - gong gai să pơsit rơđah jơlan bơwih ƀong kơ rơwang thun pơ anăp. Ơi Trần Hùng Dũng, Khua jơnum min mơnuih ƀôn sang să Đơn Dương brơi thâo:“Tơdơi kơ hơmâo rơnoh pơkă man pơdong plơi pla phrâo rơwang thun 2026-2030, jing să hơmâo prăp rơmet hlâo laih bruă či ngă, đah mơ̆ng pơđĭ tui prăk, hơdip jơnap hloh, anih anom hiam tui mơn, ngă na nao hăng pơkra klă tui hiam hloh anih anom, pơkra gơnam, tơlơi hơdip mơda...Ngă hiư̆m pă kiăng dưi man pơdong să plơi pla phrâo kiăo tui rơnuk phrâo”.

Mơ̆ng kual ngă hmua Đơn Dương, tơring čar Lâm Đồng brơi ƀuh, jơlan hơdră man pơdong plơi pla phrâo glăk mut amăng rơwang thun “pơđĭ anŏ klă”, anăp nao plơi pla rơgơi, pơplih tui rơnuk phrâo, pơkra gơnam nao hrŏm hăng anih mơdrô hăng bruă pơjing rai nua gơnam. Hơdôm tơlơi pơplih anun ƀu kơnong ngă plih ƀô̆ mơta plơi pla đôč ôh, pơđĭ tui tơlơi hơdip mơnuih ƀôn sang đôč ôh, ăt pơsit brơi djŏp hơnong pơkă đĭ kyar kjăp phik mơ̆ Ping gah ta pơsit./.