Nao pơ Anih ngă hră pơ-ar să Nhân Cơ, tơring čar Lâm Đồng hơdôm hrơi anai, mơnuih ƀon sang tŭ ư biă kơ anih ngă bruă hiam, phrâo, bơwih brơi djơ̆ lăp. Bruă yua măi tut mrô pơhlom djơ̆ hlâo dơi, kơnar, huăi gô̆, huăi bơrơsua, huăi dŏ tơguan dong tah. Ngă hră anăn tơkeng kơ ană ñu, ayong Trần Đình Khương, să Nhân Cơ lăi: “Kâo hrơi anai ngă hră ƀuh anih anom ngă bruă hiam agaih, măi mok hai phrâo, hră pơ-ar hơmâo ngă tañ mơn”.

Hnun mơn, ƀơi să Quảng Tín, yua hơmâo măi mok phrâo, rim blan Anom bruă hơmâo čơkă pơkra brơi năng ai 600 hră pơ-ar, 100% ngă amăng glông online, pơkra brơi hră djơ̆ hrơi pơkă rơbêh 99%. Tui hăng ơi Lưu Văn Gia, Khua anom bruă ngă hră să Quảng Tín, mơ̆ng blan 2 thun anai, să mă prăk blơi gơnam yua, măi mok mơ̆ng anun djru pơkra hră pơ-ar kơ mơnuih ƀôn sang klă hloh: “Să tuh pơ alin pơkra ming, pok prong anih mă bruă, blơi măi tut mrô, măi ĕp lăng tơlơi pơhing, măi computer, măi in, măi scan hăng pơkra klă tui glông internet”.

Bơ ƀơi să Kiến Đức, bruă čơkă, pơkra hră pơ-ar amăng plang internet jai hrơi gêh găl hloh yua hơmâo boh thâo mrô jai klă tui. Tui hăng ơi Phạm Xuân Anh, Kơ-iăng khua Anom bruă ngă hră să Kiến Đức, măi computer, camera krăp lăng, măi ĕp lăng hră pơ-ar hơmâo mă yua dưm kơnar, djru brơi ƀing amăng să ngă bruă: “Măi sem lăng, ĕp hră pơ-ar hăng mạng mut ĕp internet hơmâo pơkra klă tui, anun jing bruă čơkă, pơkra brơi hră tañ biă”.

Tơring čar Lâm Đồng glăk hơmâo 100% anom bruă, plơi pla mă yua mạng internet, pơƀuh 2.310 pok hră pơ-ar kiăng ngă. Mrô hră hơmâo ngă ƀơi să djơ̆ hrơi pơkă hơmâo 98,38%, jing “anih bơngač” amăng pơplih ngă hră pơ-ar.

Bruă tuh pơ alin dưm kơnar, pơlir hăng boh thâo mrô glăk djru să mơ̆ng tơring čar Lâm Đồng sit jing “anih kơnang” giăm ană plơi, thâo rơđah bruă, bơwih brơi mơnuih ƀôn sang jai hrơi tañ, rơđah hăng tŭ yua hloh./.