Rơnuč rơwang hrơi tơjuh, ƀơi să Ea Kly, tơring čar Dak Lak, ƀuh dik dak mơ-ak prap lui hrơi plĕ hră. Mơng mơguah sing bring truh pơ tlam mơmŏt, ƀing apăn bruă amăng hơdôm boh plơi pla hơmâo pơčlah jing lu grup đơđet, bra hyu djop plơi pla ala ƀon, “nao tơl sang, poh tơl amăng” kiăng ba hyu hră ruah khua mua hăng pơtô pơblang, pơtrut pơsur mơnuih ƀôn sang ruah khua nao plĕ hră ruah Khua pơ ala mơnuih ƀôn sang dêh čar tal XVI hăng khua mua jơnum min pơ ala mơnuih ƀôn sang djop gưl rơwang thun 2026-2031. Ƀơi plơi Chợ, să hơmâo akŏ pơjing 7 grup mă bruă nao tơl rĭm boh sang anŏ ba hyu hră brơi mơnuih ƀôn sang ruah khua. Ayong Nông Ngọc Thắng, ding kơna Grup wai pơgang rơnuk rơnua plơi Chợ brơi thâo, plơi hơmâo giăm 1.400 čô mơnuih ƀôn sang ruah khua. Truh ră anai, hră plĕ hơmâo ba hyu tơl tơngan mơnuih ƀôn sang laih.

“Ƀing gơmơi lĕ mơnuih ba hyu hră brơi neh met wa, bơ nao pơ anih plĕ hră amra hơmâo grup črâo brơi neh met wa kơ bruă giăt ƀudah ƀu giăt brơi djơ̆ tơlơi pơkă. Nao tơl hơpă neh met wa lêng kơ gum hrŏm, yua anai lĕ tơlơi glăm ba mơng ƀing gơñu”.

Bruă ba hyu hră plĕ tơl rĭm boh sang anŏ hơmâo pok pơhai ha amăng plĕ, ječ ameč ƀơi hơdôm boh să, phường amăng tơring čar Dak Lak. Ƀu djơ̆ kơnong lĕ ba hyu hră plĕ tơl tơngan mơnuih ƀôn sang đôč ôh, ƀing apăn bruă ăt pơlir hăng bruă pơtô pơblang, lăi pơthâo, črâo ba mơnuih ƀôn sang hluh rơđah tơlơi pơhing bơdjơ̆ nao ƀing tơbiă anăn, thâo rơđah tơlơi dưi hăng tơlơi glăm ba mơng ƀing gơñu hlâo kơ hrơi plĕ hră. Mơng anun, ngă kơ tơlơi pơhing kơ hrơi plĕ hră jai lar hyu djop anih, pơgôp hrưn đĭ tơlơi pơmĭn hăng tơlơi glăm ba mơng mơnuih ƀôn sang ruah khua hăng hrơi jơnum ngui prong amăng lŏn ia ta. Ơi Nguyễn Doãn Kiều, dŏ amăng ƀut plơi 6A, phường Thành Nhất, tơring čar Dak Lak brơi thâo:

“Kâo hơmâo pơtô pơblang ƀơi ƀut plơi pla, laih anun amăng gong pôr pơhing brơi mơnuih mơnam, laih dong lĕ Jơnum min djop djuai ania mơnuih mơnam hơmâo pơblang brơi djop mơta hăng kâo ăt hur har mơ-ak. Hăng kâo amra ngă tui bruă jao hăng pơtrut pơsur abih bang mơnuih ƀôn sang mut hrŏm hrơi plĕ hră ruah khua mua tal anai”.

Ƀơi Dak Lak, hrŏm hăng bruă pơblang brơi ƀơi anăp, lu ƀon lan hơmâo pok prong plang pôr pơhing kiăng mơnuih ƀôn sang tŭ mă amuñ ƀiă. Rơngiao kơ jơnum ană plơi pla, loa pôr pơhing, pano, djop ƀon lan ăt yua boh thâo ia rơgơi, plang mơnuih mơnam, pôr pơhing mơng ataih kiăng lăi pơthâo tơlơi pơhing ƀing tơbiă anăn hăng jơlan hơdră bruă mă mơng ƀing tơbiă anăn ruah ngă khua. Bruă mă anai ngă mơnuih ƀôn sang ruah khua tañ thâo djop tơlơi pơhing, amra pơmĭn kiăng kơ ruah hlơi brơi djơ̆ hloh. Ơi Đặng Gia Duẩn, Khua git gai Ping gah, Khua jơnum min pơ ala mơnuih ƀôn sang phường Ea Kao, tơring čar Dak Lak brơi thâo:

“Ƀing gơmơi pơphun lu jơlan hơdră pơtô pơblang phara, mơng pơblang brơi tui hơđăp truh pơ bruă yua boh thâo phrâo ră anai. ƀing gơmơi ba jơlan hlâo amăng mă yua boh thâo ia rơgơi amăng bruă pơtô pơblang lăi pơthâo tơlơi pơhing kơ ƀing tơbiă anăn ruah ngă khua”.

Hrŏm hăng hơdôm bruă pơtô pơblang ƀơi ƀon lan, hơdôm hơdră pôr pơhing ăt hơmâo pok pơhai ha amăng plĕ đơ đam tơring čar. Amăng hơdôm ară jơlan, kual plơi pla ƀơi Dak Lak hơmâo yơl pano, ƀăng rôn, áp phích pơsur brơi hrơi plĕ hră, ba glăi tơlơi hur har pran jua anăp nao hrơi jơnum ngui prong amăng abih bang mơnuih ƀôn sang. Tui ơi Trần Hồng Tiến, Khua gơnong bruă gru grua, bơrơguăt drơi jăn hăng tuai čuă ngui tơring čar Dak Lak, hơdôm bruă pôr pơhing hơmâo pok pơhai ha amăng plĕ mơng tơring čar truh pơ ƀon lan, pơgôp ba tơlơi pơhing kơ hrơi plĕ hră tơl giăm ƀiă dong mơnuih ƀôn sang.

“Ƀing gơmơi hơmâo pơjing hơdôm jơlan hơdră pơtô pơblang anun lĕ hơdôm video clip, laih dong tơlơi pơhing lăi pơthâo tơl ƀon lan, gum hrŏm hăng hơdôm plang mơnuih mơnam kiăng kơtưn amăng bruă pơtô pơblang brơi hlâo, amăng hăng tơlơi kơ hrơi plĕ hră ruah khua mua.”

Rơbêh 2,4 klăk čô mơnuih ƀôn sang ruah khua ƀơi tơring čar Dak Lak glăk hur har pran jua dŏ tơguăn hrơi plĕ hră. Tơlơi mut hrŏm ha amăng plĕ mơng djop anih anom kơđi čar hrŏm hăng lu jơlan hơdră pôr pơhing phara hơmâo pơgôp ba tơlơi pơhing kơ hrơi plĕ hră ruah khua jê̆ giăm mơnuih ƀôn sang, ba glăi tơlơi hok mơ-ak hăng amra mut hrŏm hrơi jơnum ngui prong amăng abih bang mơnuih ƀôn sang./.