Ƀơi sang bruă bơwih brơi ngă hră pơar să Tây Sơn, kơnong aka ƀu abih 10 mơnit ôh, ayong Nguyễn Minh Phi, dŏ ƀơi khul plơi Tây Xuân, hơmâo ngă giong hơdră pơmut čih anăn, rơkâo ngă bruă sang anŏ sĭ mơdrô pơdah amăng plăng mrô. Mơ̆ng bruă ba pơdah thâo hră pơar online, ăt pơtong rơđah amăng plăng mrô truh kơ duh prăk apah mơ-it amăng plang điện tử soh, ƀu ba prăk mơta ôh, djop bruă ñu ngă mơ̆ng ataih soh, dưi hơmâo khua mua apăn bruă pơtô pơčrâo brơi ƀơi “Anih djru ba tơlơi thâo ba yua mrô”. Ñu hơ̆k mơak lăi:

“Kâo ƀuh bruă čih anăn rơkâo sĭ mơdrô tui anai hmar biă mă. Hlâo adih lĕ 3 hrơi kah giong samơ̆ ră anai ngă hră pơar tañ, huăi lŭk pŭk, pơkrem hrơi mông. Ƀing khua mua apăn bruă djru brơi pơtô ba tong ten biă, djơ̆ lăp anŏ ta či kiăng”.

Tơlơi pơblih anai jing boh tơhnal mơ̆ng abih bang pok pơhai sa amăng plĕ tui atur ia rơgơi mrô ƀơi Sang bruă ngă hră pơar bơwih brơi bruă čar să Tây Sơn, djru mơnuih ƀôn sang thâo laih anun kơnong ngă mă sa wơ̆t đôč, mut ĕp čih anăn tui plăng điện tử sa anih đôč huăi rô nao rai lu wơ̆t kah hăng hlâo.

Mơ̆ng akŏ thun truh ră anai, sang bruă bơwih brơi bruă čar să Tây Sơn hơmâo tŭ mă hră pơar rơbêh 3.400 pok hră; abih bang pơsir tañ hloh hrơi pơkă ƀudah djơ̆ hrơi pơkă abih bang pơsir online mơ̆ng ataih hăng ngă tui plăng boh thâo ia rơgơi mrô soh đôč. Truh rơnuč blan 7 thun 2026, să anai ngă tañ hloh hăng rơgao tơhnal pơkă 9/10 tơlơi jao jing să phun ngă tui ba yua ia rơgơi mrô, mrô mơnuih ƀôn sang mơak pran jua, sang bruă mơdrô tŭ ư hrŏm 100%.

Ayong Trần Lam Sơn, Khua git gai Khul tơdăm dra mut phung să Tây Sơn brơi thâo, ră anai să hlăk pok pơhai sa hnơ̆ng djop grup ngă bruă ba yua ia rơgơi mrô ƀơi abih bang 10 boh plơi pla.

“Grup djru ia rơgơi mrô ƀing gơmơi pơpha hyu djru ba mơnuih ƀôn sang pơdưm mrô, anăn plăng mut ĕp lăng anŏ gêh găl. Hăng abih 10 boh plơi, pok pơhai tơgŭ mă bruă rim hrơi, biă mă ñu dưm anăn hlă anăn iGiaLai, djru ană plơi mut ĕp boh thâo ia rơgơi phrâo”.

Ƀu kơnong dŏ glăi ƀơi bruă pơblih phrâo ngă hră pơar, pơblih yua mrô ƀơi să Tây Sơn đôč ôh, bruă ngă anun hlăk bang bơngač hyu lu anih amăng tơlơi hơdip mơda mơnuih ƀôn sang. Gong gai plơi pla git gai tui mrô djă pioh amăng plang tơlơi pơhing internet; sang čơ sĭ mơdrô hơđăp ăt hlăk pơblih tui ƀơƀrư̆, sĭ mơdrô, tla prăk hăng ia rơgơi mrô soh mơ̆n; anom ngă hrŏm hăng sang anŏ mơnuih ƀôn sang sĭ mơdrô mă yua gru mrô ia rơgơi soh pioh tla prăk duh jia, ƀudah sĭ blơi gơnam sĭ mơdrô hăng điện tử soh; anom bruă ia jrao čih pơmut anăn hră pơar pơkă lăng tơlơi suaih pral mơnuih ƀôn sang ăt pơmut abih amăng điện tử mơ̆n; bruă pơtô hrăm, čih anăn anih hrăm, puang čơđai sang hră ăt pơmut amăng plăng điện tử mơ̆n jing sang hră thâo rơgơi. Atur ia rơgơi mrô akŏ pơjing khul ngă bruă ba yua mrô mơ̆ng plơi pla, ƀơi să mơtam.

Ơi Đỗ Thành Quyết, Kơ-iăng khua anom bruă gru grua-mơnuih mơnam să Tây Sơn, tơring čar Gia Lai brơi thâo, amăng sa thun laih rơgao, să hơmâo pơphun 34 wơ̆t jơnum ƀu čih hăng hră pơar dơ̆ng tah, pok pơhai bruă mă tui hơbô̆ sang čơ mrô hăng 155 boh sang anŏ mơnuih ƀôn sang sĭ mơdrô anet mut hrŏm tla prăk duh jia ƀu yua prăk mơta dơ̆ng tah hăng mrô ba yua 5G truh 99,3% mrô mơnuih ƀôn sang. Kiăng djă pioh bruă ngă na nao djơh hăng anai ƀơi să ngă tui atur mrô, să kiăo tui 37 bruă ngă tum teč tui akŏ bruă yua tơring čar Gia Lai pơtrun.

“Să Tây Sơn đing nao man pơdong sang bruă bơwih brơi bruă čar ba gru hlâo. Truh ră anai, sang bruă hơmâo ngă giong djop bruă jao, tơhnal pơkă. Hrơi blan pơ anăp, să gir ngă hrŏm djop gơnong bruă ƀơi tơring čar, anom bruă wai lăng brơi gum hrŏm git gai ngă giong tui akŏ bruă tơring čar pơtrun”.

Hơdôm boh tơhnal dưi ngă blung a mơ̆ng să Tây Sơn hơmâo pơjing rai boh tơhnal hơmâo sit nik, yom biă mă pioh kơ tơring čar Gia Lai akŏ pơdong hăng pok pơhư prong bruă ngă tŭ yua hiam jing “Să phun ba yua mrô” pơtruh hăng 30 boh să pơkŏn amăng tơring čar pơ anăp anai.

Ơi Lâm Hải Giang, Kơ-iăng Khua jơnum min mơnuih ƀôn sang tơring čar Gia Lai, brơi thâo, bruă pok prong tui hơbô̆ bruă hiam klă anai ƀu kơnong ngă tui sa hnơ̆ng tui să Tây Sơn đôč ôh, dŏ anăp nao akŏ pơjing khul ngă bruă pơblih yua mrô pơtruh nao rai hăng lu mơnuih, lu sang bruă, plơi pla, să phường ngă hrŏm, pơsir bruă mă sit nik hlăk hơmâo gêh găl hloh, ngă amuñ brơi mơnuih ƀôn sang djop mơta bruă. Tơhnal pơkă sui thun lĕ akŏ pơdong gong gai kơnuk kơna ba yua mrô, bơwih ƀong huă mrô hăng mơnuih mơnam mrô soh mơ̆ng plơi pla mơtam, kiăng pơblih yua mrô ia rơgơi phrâo jing kah hăng pran jua kơtang pơtrut bơwih ƀong huă đĭ kyar-mơnuih mơnam amăng tơring čar rơnuk phrâo.

“Hơdôm hơbô̆ bruă phrâo pơblih yua mrô ngă hră pơar hăng pơblih pơčeh phrâo ngă hră pơar kơ mơnuih ƀôn sang jing anŏ gêh găl yom pơphăn biă mă, yua djru ngă amuñ brơi mơnuih ƀôn sang, sang bruă mơdrô, pok pơhai ngă hră pơar, djru hrŏm pơhrŏ hrơi mông pơsir. Lu mrô rơnoh čih djă pioh, pơmut ƀiă um djop laih, anŏ anun ngă gêh găl brơi git gai wai lăng kơnang kơ mrô rơnoh, kiăng thâo tơlơi pơhing hơmâo sit nik amăng tơlơi hơdip mơda laih anun hơmâo hơdră pơtrun brơi ngă klă bơwih brơi pơđĭ kyar hrŏm amăng tơring čar”.

Mơ̆ng hơbô̆ bruă lông ngă hlâo anun, să Tây Sơn brơi ƀuh pơblih yua mrô ia rơgơi phrâo ƀu kơnong tơlơi ră ruai kơ boh thâo ia rơgơi juăt công nghệ đôč ôh, dŏ jing bruă ngă pơblih phrâo ƀơi anăp hơdră git gai wai lăng hăng bruă bơwih brơi kơ mơnuih ƀôn sang klă hloh. Sit djop tơlơi pơkă bruă ngă gêh găl hruaih laih, djop mơta hră pơar, rim bruă ngă sĭ mơdrô, duh jia, tla prăk tui hơbô̆ bruă “să gru phun ba yua mrô” amra jing atur kơjăp pioh kơ Gia Lai akŏ pơdong bruă kơnuk kơna hăng mrô, bơwih ƀong huă hăng mrô laih anun mơnuih mơnam mrô mơ̆ng plơi pla, jing pran kơtang phrâo pơtrut hmar pơđĭ kyar hăng hơđong kơjăp amăng črăn phrâo pơ anăp adih.