Hơdôm amăng luh či pla kơphê hơmâo klơi ƀơi hmua kơdư ter tơkai čư̆, sang anŏ ơi A Đŭi, dŏ ƀơi plơi Ngọc Leng, dưi pla hăng anah kơphê arăng rah hlâo amăng kơdung kơsu kơphê ngă pơjeh. Pô pơdŭ ba, pô pla trun amăng luh, pô dor lŏn, bruih ia. Kơnong hơdôm mông mă bruă, đang hmua hlâo adih mơ̆ng pô hmua pla hơbơi plum đôč ră anai buh ao mơtah hla mơda phun kơphê phrâo yơh.

Giăm 9 ar hmua sang anŏ lu thun laih kơnong pla hơbơi plum đôč, rơnoh pơhrui glăi ƀu hơđong. Kiăng pơblih pla kơphê samơ̆ prăk blơi pơjeh hăng apah mơnuih mă bruă lĕ lu prăk đơi. Ơi A Đŭi lăi, tal anai, phun pơjeh kơphê hơmâo kơnuk kơna ƀơk brơi soh sel, bruă hyu pla hơmâo ƀing apăn bruă hăng ƀing tơhan tơdăm dra mut phung djru ba sang anŏ, anun hơmâo pran jua hur har hloh kơ bruă pla kơphê, anăp ngă tui tơlơi bơwih ƀong huă phrâo.

“Bruă kơnuk kơna djru anah phun pla pơjeh kơphê kơ sang anŏ plai ƀiă prăk blơi pơjeh hnang blung laih anun hơmâo anŏ gêh găl či pok prong hmua đang či mă bruă. Sang anŏ gơmơi čang rơmang phun kơphê amra đĭ kyar hiam, ba glăi boh tŭ yua hơđong hloh”.

Ƀu kơnong hơjăn sang anŏ ơi A Đŭi đôč ôh, hơdôm hơpluh boh sang anŏ ƀun rin, ƀing tha rơma, mơnuih ƀu klă drơi jăn, sang anŏ ƀu hơmâo ană bă, hyăl amăl ƀơi Tu Mrông ăt dưi hơmâo kơnuk kơna djru amăng tal blung a anai. Gah klôn kơ rơbêh 1 klăk anh phun kơphê djru ba anun, sa hơdră ngă bruă phara biă mă.

Pơhrua kơ bruă mă yua prăk kăk blơi bơnga pioh bơni kơ mông jơnum, pơphun bruă mă ƀơi să jak iâu anăn “Jơnum ruah khua ƀu hơmâo pŏ bơnga”, să jak iâu tơlơi djru hrŏm, mă prăk blơi bơnga anun, jing prăk blơi pơjeh phun pla, djru rah anah hăng wai lăng phun pơjeh pla brơi klă, laih anun nao ƀơk brơi kơ mơnuih ƀôn sang. Hơdôm pŏ bơnga, guang bơnga bơni kơ mông jơnum prong ruah khua hlâo adih, pơhrua hăng phun anah kơphê mơda hyu ƀơk pơpha brơi kơ ană plơi pla, ba sa tơlơi čang rơmang prong kơ hơdră bơwih ƀong huă phara brơi mơnuih ƀôn sang ƀơi kual čư̆ siăng.

Amăng blan 7 anai, să Tu Mrông gir run ngă giong bruă hyu ƀơk brơi anah phun pla kơ mơnuih ƀôn sang ngă hmua 1 klăk phun kơphê amăng đơ đam hmua năng ai 200 hektar. Tơhnal pơkă ƀu kơnong kiăng pok pơhư prong đang hmua đôč ôh, dŏ yak nao bruă akŏ pơjing kual ngă hmua pla kơphê sa anih, pơƀut sa kual, ngă atur pơđĭ kyar pla kơphê pơgang sa rơnoh sĭ mơdrô kơñ pơgi.

Ơi Võ Trung Mạnh, Khua git gai ping gah să Tu Mrông brơi thâo, rơbêh 1 klăk phun kơphê dưi pla amăng bơyan hơjan anai phrâo yak nao amăng bruă mă blung a đôč. Črăn mơ̆ng thun 2026-2030, să anai pơkă tơhnal djru mơnuih ƀôn sang pla 1000 hektar đang kơphê; gir run truh thun 2030, đơ đam kơphê amăng să him lăng kiăng hơmâo năng ai 1.588 hektar, anăp nao tơhnal pơkă rim boh sang anŏ boh ƀiă 1 hektar đang hmua, pioh pơđĭ kyar bơwih ƀong huă sang anŏ. Kiăng dưi ngă sit nik bruă anai, să Tu Mrông ăt dŏ djă pioh jơlan hơdră ƀơk anah phun pla pơjeh kơphê kơ mơnuih ƀôn sang, tuh pơ alin man pơkra bơnư̆ pơkong iq, pơtô brơi hơdră pla pơjing, lir hơbit hăng sang bruă mơdrô, krăp blơi glăi abih kơphê pĕ pơhrui tơdơi anai mơ̆ng mơnuih ƀôn sang, brơi tuh pơ alin sang măi kơ-uă pơkra tong ten. Hloh kơ anun dơ̆ng akŏ pơjing kual pla kơphê hơdjă rơgoh djơ̆ hnơ̆ng pơkă VietGap, yak tui ƀơƀrư̆ čih anăn kơphê plơi pla pơ anun, mơnâo kơphê jơman djă anăn Tu Mrông.

Ơi Võ Trung Mạnh brơi thâo dơ̆ng: Tơdah pla pơjing wai lăng klă laih anun hơmâo anih blơi hơđong, rơbêh 1 klăk phun kơphê phrâo pla amra đĭ hiam gôm ba ia mơtah ƀơi kơdư ter tơkai čư̆, pok brơi anŏ gêh găl phrâo bơwih ƀong huă kơ hơdôm rơbâo boh sang anŏ mơnuih ƀôn sang djuai ania Sedang, kiăng ƀơƀrư̆ ba kơphê jing phun pla phun mơtam gơgrong ba amăng kual lŏn anai.

“Ping gah să Tu Mrông hơmâo ngă hơdră akŏ pơjing kual lŏn pla kơphê jơman phara anăn Tu Mrông. Tui hăng anun, gơmơi pơtô brơi mơnuih ƀôn sang pơphun pla, wai lăng, ngă djơ̆ tui tơlơi pơkă VietGap, čih anăn kual ngă hmua pla pơjing, laih dơ̆ng lir hơbit hăng sang bruă mơdrô, anom ngă hrŏm djru ba mơnuih ƀôn sang, pơjing rai gơnam sĭ mơdrô mơ̆ng să Tu Mrông, kiăng pơgang anăn kơphê hơdjă Tu Mrông, anăp nao ba sĭ mơdrô pơ anih anom sĭ mơdrô prong hơđong hloh”.