Ƀơi ƀuôn Hwiê, phường Ea Kao, bruă hơduah tơña, pơhmư̆ tơlơi pơgôp hiăp mơ̆ng mơnuih ƀôn sang kơ bruă dăp glăi plơi pla hơmâo tơña kơ rim boh sang anŏ laih. Tui hăng mrô wai lăng, tơdơi kơ pơmut hrŏm, ƀuôn Hwiê phrâo jing hơmâo 454 boh sang anŏ hăng 1.914 čô mơnuih, lŏn tơnah prong rơbêh 496 ha. Bruă pơƀut 2 boh plơi hơmâo lu mơnuih tŭ ư yua dah amăng lu thun rơgao, lu neh wa dua boh plơi jê̆ giăm, juăt nao rai mơn. Amai H’Trang Buôn Yă, mơnuih amăng ƀuôn Hwiê hơđăp brơi thâo: “Rim wơ̆t hơmâo tơlơi ngui ngor pơdô̆ rơkơi bơnai, djai rơngiă gơñu ăt rai pơ anai mơn, anun kâo lăng dua boh plơi jê̆ giăm, thâo ƀu-eng nao rai. Tŭ tă anai pơmut hrŏm jing kâo tŭ ư, huăi hơget ôh, lăng dua boh plơi mut hrŏm jing jê̆ giăm hloh dong, klă hloh mơn. Kâo čang rơmang ƀing khua jê̆ giăm, thâo hluh hloh kơ tơlơi phiăn juăt mơ̆ng neh met wa pơ anai, đah mơ̆ng ba plơi pla jai hrơi đĭ kyar hloh”.

Tơlơi tŭ ư mơ̆ng mơnuih ƀon sang ƀuôn Hwiê hơmâo pơƀuh rơđah hăng bruă hơduah tơña mơnuih ƀôn sang, hăng 96% mrô mơnuih tŭ ư pơmut hrŏm. Yom hloh dong, mơnuih ƀôn sang ƀu kơnong tŭ ư hăng bruă dăp glăi plơi pla đôč ôh, ăt čang rơmang plơi phrâo amra gêh găl hloh či bơwih ƀong, djă pioh gru grua hiam hăng pơđĭ tui tơlơi hơdip mơda. Anun ăt jing jơlan gah anăp nao mơ̆ ping gah ƀuôn Hwiê pơsit mơ̆ng blung lơ̆m prăp rơmet pơmut hrŏm plơi pla. Ơi Y Vui Ayun, Khua ping gah ƀuôn Hwiê lăi: “Dua boh plơi pơmut hrŏm amra gum đĭ kyar čơkă tuai hyu ngui amăng plơi laih dong đĭ kyar gru grua djuai ania Êđê kah hăng eng ao, djŏp bruă ngui ngor adoh suang, atông čing, bruă ƀing gơmơi prăp rơmet lĕ pơđĭ hloh dong bruă mơñam eng ao. Gơmơi ăt kiăng rơkâo hăng Ping gah pok anih pơtô atông čing kiăng ƀing čơđai dưi tŏ tui rơnuk ƀing ama, ƀing ơi”.

Mơ̆ng tơlơi ră ruai ƀơi ƀuôn Hwiê ta ƀuh laih, kiăng sa tơlơi pơtrun prong dưi mut amăng tơlơi hơdip, tơlơi yom hloh ƀu djơ̆ kiăo tui hơnong pơkă mrô ană mơnuih ƀudah lŏn tơnah anet prong hiưm pă ôh, ăt jing bruă ta khŏm bong kjăp tơlơi gum pơgôp amăng plơi pla hăng gru grua hiam hơmâo djă pioh amăng djŏp rơnuk. Hăng pran jua anun, phường Ea Kao hơmâo čih pơkra bruă dăp glăi mơ̆ng 25 boh plơi dŏ glăi 18 boh plơi, laih dong pioh hơnong plơi pla hơmâo gru phun hing ang, gru grua hiam phatta mơ̆ng djuai ania Êđê. Ơi Đặng Gia Duẩn, Khua ping gah phường Ea Kao brơi thâo: “Hơmâo lu hơnong pơkă či dăp glăi plơi pla, gru phun mơ̆ng đưm hlâo hơmâo lăi nao blung a. Hăng hơdôm boh plơi hơmâo gru grua đưm đă ră hlâo kah hăng hơdôm plơi pla djuai ania Êđê đưm hlâo lĕ gir djă pioh glăi hăng pơtrut tui anŏ yom gru ama grua amĭ. Mơnuih ƀôn sang ăt bơngơ̆t mơn tơdơi kơ pơmut hrŏm, hră pơ-ar pơplih hiưm pă? Pơ anăp anai Ping gah să amra git gai ƀing khua nao tơl plơi pla tơdơi kơ pơmut hrŏm či plih hĭ djŏp hră pơ-ar kơ mơnuih ƀôn sang, laih anun mơnuih ƀôn sang dưi nao mă pô pơ Sang bruă ngă hră pơ-ar kơnuk kơna či plih hĭ hră pơ-ar tơdơi kơ pơmut hrŏm, laih anun abih bang bruă plih hră leng kơ pơkra brơi soh đôč”.

Hơdră ngă bruă mơ̆ng phương Ea Kao ăt jing jơlan ngă bruă hrŏm mơ̆ng tơring čar Dak Lăk: pơmut hrŏm plơi pla ƀu djơ̆ jŭ yap mrô ană plơi, lŏn tơnah đôč ôh, ăt khŏm yap nao gru grua hăng tơlơi jê̆ giăm mơ̆ng rim plơi pla.

Tơlơi gơñăm ngă mơ̆ng Dak Lăk lĕ pơhrŏ trun mrô plơi pla, ƀut plơi prong mơ̆ng 2.801 dŏ glăi 1.556 boh plơi. Ơi Vũ Lê Các, Kơ-iăng khua Gơnong bruă čar tơring Dak Lăk brơi thâo, amăng mông prăp rơmet ngă bruă, Dak Lăk lăng yom biă kơ anŏ phara mơ̆ng rim boh plơi: “Hăng tơring čar Dak Lăk, anih hơmâo lu plơi pla djuai ania ƀiă hơdip mơda, gơmơi lăng yom kơ bruă djă pioh gru grua hăng bong kjăp tơlơi gum pơgôp, jê̆ giăm mơ̆ng ană plơi. Yua hnun, hăng hơdôm kual ñu phara kah hăng kual ataih yaih, guai dêh čar, nao rai tơnap ƀudah plơi pla hơmâo gru grua yom phara, hơdôm boh tơring sem lăng djŏp tui hăng tơlơi pơtrun hlâo či brơi pơmut hrŏm”.

Tơdơi kơ pơmut hrŏm, hơmâo boh plơi amra ƀu hơmâo dong tah amăng hră pơ-ar. Samơ̆ tơdah gru grua hiam ăt dŏ djă pioh, plơi pla ăt khăp ƀu-eng nao rai mơn, mơnuih ƀôn sang ăt ngă pô mơn, rim wơ̆t pơmut hrŏm ƀu djơ̆ rơngiă hĭ ôh, anun jing tơlơi pơphun phrâo dong pok rai anih đĭ kyar phrâo mơ̆ng hơdôm boh plơi pla ƀơi dap kơdư Dak Lăk./.