Bơnư̆ pơgăn ia rơsĭ Xóm Rớ ƀơi phường Phú Yên, tơring čar Dak Lăk hơdôm hrơi giăm anai pơhưč lu biă mơnuih ƀôn sang hăng ƀing tuai hyu ngui. Pơ anai adai rơ-ơ̆, hơmâo angin thưt, jê̆ ƀơi anun lĕ tơdrun mă akan Đông tác, ƀơi anăp lĕ bah amăng ia rơsĭ Đà Diễn hơmâo lu ƀat tô, song nao rai. Lăng nao gah Kơdư ƀuh čư̆ Chóp Chài, hăng plơi prong Tuy Hoà. Lăng nao gah Yŭ dong hơmâo tơdrông tơtua Hùng Vương găn nao ia krông Đà Rằng. Abih bang pơjing rai anih anom hiam biă.

Năng ai 3 thun hăng anai, amăng bơyan pơdơi prong, pơ anai pơhưč lu ƀing čơđai nao ngui lơ̆m yang hrơi tlam mơmot. Mơ̆ng sa boh plơi juăt hơmâo ia rơsĭ jroh, tlă đĭ hăng kơdư, ră anai Xóm Rớ jing anih hơmâo lu tuai hăng mơnuih ƀôn sang hor či nao ngui. Sa čô mơnuih ƀôn sang hok kơdok lăi: “Mông anai pơkra glăi tui hăng anai jing ƀing tuai rai ngui lu biă. Anun jing mơnuih ƀôn sang pơƀut pơ anai sĭ mơdrô lu mơn, anun jing plai mơn tơnap”.

Anŏ pơhưč mơ̆ng bơnư̆ pơgăn kriang ia rơsĭ Xóm Rớ hmư̆ hing hloh mơ̆ng krah blan 6 phrâo rơgao, lơ̆m tơlŏ ƀê tông pơprong pơgăn ia rơsĭ tơglăk hơmâo “plih brơi ao phrâo” laih hăng ia iŏm mơtah, mriah, kơñĭ, lăng ƀơƀlip hiam hloh yua hơmâo adai hăng ia rơsĭ mơtah dong. Hơmâo lu mơnuih ƀôn sang hăng tuai rơnguai nao ngui, sem lăng, phin rup, biă ñu mơng mơguah hăng tlam hơhuñ, lơ̆m pơ-iă pơčrang hơmâo ia iŏm phara. Sa čô tuai hok mơak lăi: “Hlâo kơ anun kâo rai laih mơn pơ anai, lơ̆m phrâo pik glăi ia kulơr jing kâo rai lăng dong mơn. Djơ̆ hăng arăng pia view triệu đô mơtăm, hiam kah hiam”.

Mơ̆ng ia kulơr hơmâo arăng djru, phường Phú Yên iâu pơthưr ƀing juăt djru bruă amăng plơi pla, hrŏm hăng ƀing rơguăt bruă pik ia kulơr pik brơi hơdôm boh pơtâo ƀê tông pơgăn ia rơsĭ Xóm Rớ anai. Ƀing djru bruă brơi thâo, adơi ayong ngă bruă adai pơ-iă ƀu lăng ôh, pik ia mơ̆ng blung mơtăm, rao rơgoh ƀê tông, pik ia kulơr blung a, giong anun pik ia hiam dong...samơ̆ gơñu lăng mơak biă lơ̆m hơmâo lu mơnuih bơni: “Lăng phrâo, hiam hloh kơ phường ƀing ta, adơi ayong lăng tui anun jing plai mơn glêh. Ngă bruă hơdôm hrơi mơtăm, ƀuh bruă ta ngă hơmâo lu mơnuih bơni jing mơak biă”.

Bruă “buh ao phrâo” kơ hơdôm tơlŏ pơtâo ƀê tông pơgăn ia rơsĭ Xóm Rớ ƀu kơnong ngă hiam ia rơsĭ đôč ôh mơ̆, ăt pơjing rai anih brơi tuai hyu ngui amăng bơyan pơdơi prong thun 2026. Anai ƀu kơnong ngă hiam brơi anih anom, pơtrut bruă čuă ngui amăng plơi đôč ôh, ăt brơi ƀuh anŏ hmư̆ hing mơ̆ng bruă hyu ngui ƀu kiăng anŏ hơget ta pơjing rai yom, pơmă ôh, ñu hơmâo amăng sit tơlơi pơhiăp, tơlơi thâo čơkă mơ̆ng gong gai, mơ̆ng mơnuih ƀôn sang hăng anih anom hơmâo mơ̆ng tơring ta./.