Amăng lan sang hră prong rơhaih 5 hektar kơčăo bruă man pơdong sang hră đôm lăm, kơnuk kơna čem rông dua gưl, gưl sa hăng gưl dua ƀơi Ia Puč, tơring čar Gia Lai, ƀing tơhan blah ngă hrŏm hăng ƀing kơhnăk kỹ sư man pơdong, ƀing kông ñơn mă bruă pơpha jing lu grup, lu čăl mă bruă amăng anih man pơdong pioh ngă pơgiong djop črăn bruă jao, man pơdong anih hrăm amăng sang hră, anih pơđok hră, sang pioh pơhrăm lu tơlơi thâo, anih čơđai sang hră dŏ đôm lăm…

Lăng tơngan juăt ngă bruă djă phao hyu tir đôč, pơgang tơlơi dưi ngă pô kơ lŏn ia mơ̆, ră anai gum hrŏm greh gruñ pơdŭ tơlô̆ ƀrik, boh pơtâo, pâo simăng, lŭk ia simăng, čuah man pơdong, man đĭ pơnăng sang, man atur kiăng tañ giong sang hră pioh kơ ană amôn čơđai sang hră ƀơi guai dêh čar hơmâo anih hrăm phrâo hiam hloh. Uă hĭ tơdjôh ia hô̆ luh trun bơbră ƀơi meng, ƀô̆ mơta hơtăm dơnar yua adai pơ-iă kơtang pơčrang, Trung úy Cao Kiến Giang, tơhan pơgang guai dêh čar, puih kơđông amăng jang guai dêh čar hăng jar kmar Lệ Thanh kah pơpha tui anai:

“Mut mă bruă, ƀơi anŏ dŏ sư̆ rơbư̆ đôč samơ̆ hơmâo tơlơi pơčrâo ba mơ̆ng ƀing met anong ayong adơi juăt ngă bruă man pơdong sang, kâo gir hrăm tui pơsir ƀiă tơlơi kơƀah tơnap tap kiăng ngă giong bruă jao. Rim hrơi mă bruă gleh glar, kâo hơmâo mơnuih djru ba tui klô, hơmâo ƀing khua mua tơhan djru mơnong ƀong huă, ia mơñum, pơdơi pơdă djơ̆ hơdră, kiăng pơhlom hơđong drơi jăn pran jua laih anun abih bang ƀing adơi ayong ling tơhan hnun mơ̆n gir run ngă bruă rim hrơi khom giong bruă jao”.

Trung tá Phạm Tiến Sỹ, Kơ-iăng khua puih kơđông tơhan pơgang guai ƀơi Ia Pnôn, khua git gai tơhan nao djru man pơdong sang hră brơi thâo: ƀing tơhan gum hrŏm lêng kơ sem lăng hlâo, pơpha bruă mă djơ̆ găl hăng tơlơi thâo, pran jua hăng anŏ dưi ngă mơ̆ng rim čô; laih dơ̆ng ngă hrŏm tong ten hăng djop anom bruă man pơdong kiăng ngă giong bruă jao tŭ yua hloh. Bruă djru tui klôn čem rông ling tơhan, mơnong ƀong huă djop, jơman hloh, anih dŏ dong ƀong huă truh kơ anih pit đih khom djru ba khua mua, ling tơhan dŏ mă bruă amăng anih man pơdong pơhlom klă soh.

“Ƀing gơmơi ngă hrŏm hăng ƀing man pơdong, brơi dăp bruă kơ tơhan djơ̆ găl, djru hrŏm hruaih pơgiong bruă jao. Anai lĕ bruă mă kơđi čar yom pơphăn biă mă, laih dơ̆ng tơlơi khăp mơ̆ng khua mua, ling tơhan pơgang guai dêh čar djru kơ ană plơi pla dŏ ƀơi guai dêh čar. Ƀing gơmơi pơtô hrăm na nao kơ khua mua, ling tơhan thâo hluh anŏ tŭ yua yom kơđi čar, mơnuih mơnam hăng tơlơi khăp pap mơ̆ng ring bruă anai. Mơ̆ng anun, ngă gêh găl brơi ƀing adơi ayong ling tơhan khut khăt tơlơi pơmin pran jua djru hrŏm pơsir tơlơi tơnap tap, kiăng khom giong bruă jao”.

Kiăng djru ba djop plơi pla  hăng sang bruă man pơdong ngă djơ̆ tơhnal pơkă bruă man pơdong, mơ̆ng plah wah blan 5/2026 truh ră anai, hrŏm hăng ƀing ling tơhan pơgang guai dêh čar, Khua tơhan blah ngă tơring čar Gia Lai, Khul ling tơhan Quân đoàn 34 hăng kông an tơring čar Gia Lai hơmâo iâu pơtum abih bang 500 čô khua mua, ling tơhan nao djru abih bang ƀơi 7 ring bruă man pơdong sang hră či guai dêh čar. Ƀu kơnong man pơdong đôč ôh, djop puih kơđông dŏ pơtô ba tơlơi mă bruă tơpă, pơpŭ kơ tơlơi phiăn juăt đưm mơnuih ƀôn sang  plơi pla ieo gah. Mơ̆ng anun, djru hrŏm ngă kơjăp hloh tơlơi khăp lir hơbit ling tơhan, mơnuih ƀôn sang, đah mơ̆ng pơgang tong ten kơđi čar, tơlơi rơnuk rơnua mơnuih mơnam ter guai dêh čar. Tơhan phrâo mut Hà Minh Hùng, sa čô tơhan puih kơđông pơgang guai dêh čar či Ia Čiă, brơi thâo:

“Lơ̆m dŏ mă bruă, kâo gir run na nao đôč kiăng pơgang hơđong, rơnuk rơnua kơ mơnuih mơnam hăng gơnam yua mă bruă. Hăng drơi jăn kâo pô laih anun ƀing gơ̆p ling tơhan hơmâo hmư̆ laih tơlơi pơtô ba mơ̆ng khua git gai kiăng thâo hluh ring bruă anai yom hiư̆m pă hăng ƀing adơi đeh ană amôn čơđai sang hră ƀơi guai dêh čar, mơ̆ng anun djru ƀing adơi ayong ƀing gơmơi gir pran jua mă bruă klă hloh, pơsir mă tơlơi tơnap tap kiăng ngă giong bruă jao”.

Kơčăo bruă man pơdong 7 boh sang hră đôm lăm, kơnuk kơna čem rông lir hơbit dua gưl sa hăng dua ƀơi djop să guai dêh čar amăng tơring čar Gia Lai hơmâo rơnoh prăk tuh pơ alin abih tih 1.500 klai. Truh ră anai, abih bang amăng kơčăo bruă hơmâo ngă giong tui 47% rơnoh bruă man pơdong. Mah hơdôm sang bruă hơmâo pơđĭ tui laih gơnam yua mă bruă, pơđĭ tui mrô mơnuih mă bruă hăng ba yua djop tơlơi thâo, hnơ̆ng mă bruă man pơdong ăt kaih hloh rơnoh pơkă mơ̆ng 15-40 hrơi tui hăng anŏ ƀuăn hlâo.

Tơlơi djru ba mơ̆ng ling tơhan blah ngă hơmâo gum hrŏm “pơpha apui” hăng djop sang bruă man pơdong, gir run kiăng ngă giong bruă jao djơ̆ tui khua mua tơring čar pơtrun. Ơi Nguyễn Trung Quyến, khua pơ ala kơ anom bruă man pơdong sang hră đôm lăm dua gưl ƀơi ia Puč lăi:

“Thun blan khom ngă giong pioh ba ring bruă anai či yua ƀu lu ôh. Ƀơi anăp lĕ bơyan hơjan hlim, yua kơ anun pơtrut hmar bruă man pơdong jing sa bruă mă ječ ameč biă mă yơh, ƀu hơmâo jơlan pơpă dơ̆ng tah. Hăng ring bruă djru mơnuih ƀôn sang lĕ hơdră pơtrut kiăng pơhrua nao lu mơnuih kah hmao. Bruă ling tơhan djru pơhrua mơnuih mă bruă, kiăng djop sang bruă man pơdong plai ƀiă tơnap, pơtrut hmar ƀiă man pơdong ring bruă”.

Hơmâo tơlơi gum hrŏm ƀuh ƀô̆ mơta mơ̆ng khul ling tơhan pơgang guai dêh čar, tơhan kông an Gia Lai ƀu kơnong djru pơsir brơi tơlơi tơnap, kơƀah mơnuih mă bruă đôč ôh, dŏ pơtrut hmar bruă man pơdong hăng pơdah rai bruă ngă glăm ba, pran jua thâo pơdjru nao rai mơ̆ng khul ling tơhan blah ngă hăng bruă pơtô hrăm ƀơi kual giăm guai dêh čar gah yŭ tơring čar Gia Lai.