Kơčăo bruă pơdong plơi phrâo, dŏ hơđong dong kơjăp ha boh plơi brơi kơ mơnuih ƀôn sang đuăi mơ̆ng anuh juăt ia ling na nao ƀơi să Ia Hiao, tơring čar Gia Lai dưi man pơdong ƀơi plơi ƀut 9, đơ đam amăng 15 hektar, rơnoh prăk tuh pơ alin 120 klai prăk. Kơčăo bruă anai pơpha lŏn pơdong sang brơi kơ 180 boh sang anŏ. Ră anai, djop anom bruă hlăk dŏ ngă bruă tañ ngă giong glông bruă čuk jơlan rô nao rai amăng plơi, dăng nao hrĕ apui pơtrun jua kơtang, ring bruă či kiăng pơkŏn kah hăng đing pơđoh ba ia yua, sang jơnum plơi sang rung, sang hră gưl muai.

Ơi Ksor Tin, sa amăng hơdôm mơnuih blung a mơ̆ng ƀôn Čư̆ Plah Jai, să Ia Hiao, nao tŭ mă lŏn, anih dŏ amăng plơi phrâo pơdong sang ñu brơi thâo:

 “Gơmơi mơak biă mă rai lăng lŏn pơ anai hiam yơh. Pơ anai, hơmâo sang hră, hơmâo tơdron boh lông djop soh. Lŏn dŏ ƀơi kơdư čư̆ siăng, rơnuk rơnua hơđong kơ ană tơčô; huăi đuăi kơ ia ling kah hăng hlâo adih; pơ anai klă yơh pơkă hăng hlâo. Hơmâo kơnuk kơna djru, khua mua gong gai tơring čar čuk brơi pơdong plơi phrâo, hơmâo anih dŏ hơđong, gơmơi mơak hăng bơni lu biă mă”.

Kiăng kơ mơnuih ƀôn sang tŭ ư hrŏm đuăi mơ̆ng anih dŏ hơđăp, juăt ia ling, tơlơi truh hŭi rơhyưt na nao, pơdŭ nao dŏ pơ anih phrâo, gong gai kơnuk kơna pơphun jơnum bưp ană plơi pla lu wơ̆t, pơđing hmư̆ tơlơi kiăng hăng pơblang rơđah tơlơi truh ia ling ngă, krăp lăng bruă čuk pơkra plơi phrâo, hơduah ĕp jơlan hơdră kơnuk kơna djru. Hơdôm sang anŏ dưi ruah mă hơbô̆ či pơdong sang, pang war ngă bơnư̆, mă gai pơđăo djơ̆ anih pơpă lĕ tŭ mă laih anun nao ĕp hlâo anih pơdong plơi phrâo. Sang anŏ bơn Nay Čŭk dŏ ƀơi ƀôn Sô Ama Lơng, sa amăng 67 boh sang anŏ blung a nao dŏ pơ ƀôn phrâo, hơ̆k mơak yua dưi mă gai pơđăo ruah mă anih dŏ, djơ̆ hĭ anih hiam tui hăng ñu či kiăng biă mơ̆n.

“Sang anŏ gơmơi hlâo adih dŏ jĕ hang ia krông, bơngơ̆t biă mă hŭi ia kor đuăi, lŏn tơhlŏm dlưh hang ia. Kâo tơphă mơ̆n mă djơ̆ hĭ gai pơđăo mrô 63, anih pơdong sang giăm sang hră gưl muai, djơ̆ thun ană kâo thun anai dưi mut hrăm gưl muai, anih lớp lá”.

Hlâo kơ djru ană plơi pla đuăi plơi hơđăp, nao dŏ pơ ƀôn phrâo, să jơnum bưp pơphun brơi hơbô̆ pơdong plơi pla hiam, sang phrâo pơđao-anih pla kyâo tơ-ui ƀơi ƀôn phrâo. Pơ anai, khua mua să, djop khul grup mơnuih tơpuôl gum hrŏm mơnuih ƀôn sang pla 250 phun kyâo bàng Đài Loan treng jơlan amăng plơi. Jơnum tơgŭ ngă bruă pla kyâo anun kiăng pơdah rai bruă ngă khut khăt abih bang amăng glông bruă kơđi čar hăng hơmâo tơlơi tŭ ư hrŏm mơ̆ng mơnuih ƀôn sang amăng bruă man pơdong plơi pla anih dŏ phrâo rơnuk rơnua hơđong hloh. Ơi T’Ô Thí-Kơ-iăng khua anom bruă Bơwih ƀong huă să Ia Hiao brơi thâo, kơčăo bruă anai hlăk ngă giong djop mơta anŏ gêh găl pioh čơkă abih bang 180 boh sang anŏ mơnuih ƀôn sang nao dŏ pơ plơi phrâo hơdôm blan pơ anăp.

“Hrơi blan rơgao, să Ia Hiao hơmâo ngă klă bruă pơtô lăi, jak iâu djop sang anŏ mơnuih ƀon sang bơbeč djơ̆ ia ling dăo rim thun, brơi pơdŭ nao dŏ pơ plơi phrâo truh ră anai hơmâo 100 boh sang laih tŭ ư. Amăng blan 8 hăng 9 ăt jak iâu abih bang hơdôm sang anŏ dŏ glăi nao dŏ pơ plơi phrâo, kiăng dưi pơhlom hơđong tơlơi hơdip mơda, rơnuk rơnua kơ ană plơi wơ̆t kông ngăn gơñu hai”.

Hrŏm hăng jơlan hơdră kơnuk kơna djru, thun blan laih rơgao lu sang bruă, anom bruă ling tơhan dŏ amăng să, nao sem hlâo, ngă tui hơdră djru mơnuih ƀôn sang pơdŭ gơnam đuăi plơi, nao pơdong sang phrâo amăng plơi dŏ hơđong či să Ia Hiao. Rơbêh 50 čô khua mua, ling tơhan gah khul tơhan Đại đại bộ binh 1, sang bruă khua tơhan pơhlom kual mrô 3-Thống Nhất gah sang bruă khua tơhan tơring čar Gia Lai hơmâo nao pơ să Ia Hiao djru mơnuih ƀôn san ruh sang, pơdong glăi sang pơ anih dŏ phrâo, plơi kơnuk kơna čuk pơdăo brơi.

Sa boh plơi phrâo hlăk akŏ pơdong đĭ ƀuh hiam rô̆ ƀơi kual lŏn ƀut 9. Mơ̆ng anih dŏ hơđăp ia juăt ling na nao rim thun, an pơhŭi na nao kơ tơlơi hơdip mơda mơnuih ƀôn sang să Ia Hiao, ră anai abih bang mơnuih ƀôn sang hơ̆k mơak yơh nao dŏ pơ anih phrâo či kơdư čư̆, čuk pơdăo pơjing plơi phrâo, hơmâo djop mơta, jơlan glông klă, sang hră giăm, apui yua, ia truh pơ sang amăng plơi soh, hơdip mơda rơnuk rơnua, hơđong yơh kơñ pơgi.